Nəhcul-Bəlağə pand iyən hikməton
Nəhcul-Bəlağə pand iyən hikməton
Əmirəl-Muminin Həzrət İmom Əli(ə) Nəhcul-Bəlağə şərifə kitobi 125-ə hikmətədə de qıləy erjinə kəlomi jıqo hamyedə:”la ənsubənnəl-İslomə...
İslomə din çe həzrəte həxı vədə sə təzim kardeye iyən ın ğəbuləti və harcurnə təsliməti qıləy aqah nıbə holədə bıə təğlid ni,bəlkəm qıləy rişəninə bovə iyən etığodi tələb kardedə ki,de yəğıni əv təbir kardey bıə.jıqo qıləy yəğın və rostə bovə de əğedəon təsdıği iyən islomi hukmon təvəssıti mumkine.təsdığ çe iğrori iyən bə bovəon etırofi mənoədəy və bəpe de zıvoni ki,çe İslomə dini sutunon bəyone, iğror kardey bıbu.de qıləy co iborəti isnon əqər əğedə iyən əxloğədə bə həxı təslim bıbu, mısılmone.təslim yəğın bey mənoədəy və ə kəs bə həxı təslim beydə ki,bə ğeybi həyğəton qıləy bovə və yəğınış bıbu və həmonə yəğın bə iğrori səbəb bıbu ki, əmələdə insoni əmələdə təcəlli pəydo kardedə.bəhisobe ki,İslomə din çe əməliku co ni.çoko ki,pəyğombəre-əkrəm(s) jıqo hamyedə:”imon de oruzu,ıştəni dərostey iyən zohiri icod kardey real beydəni.bəlkəm,imon bə insoni daxili həyğiyə əğedə iyən bovə əsos real beydə və bə həyğət rəseydə”.
Həlbəttə,əkəson ki,şəhodəteyni iğror kardedən,əmmo əmələdə səhlənkoəti kardedən,jıqo ni ki,əvon mısılmon nin.bəlkəm,çəvon vardə islom,zəyif iyən jinə mərhələdə ğərol qətə qıləy islome.çıro ki,İslomə din bə fərdon imoni zəyfəti iyən zumandəti şiddəti əsos,mərtəbə və dərəsəonış heste.jimoni hodisəonədə hostonəti iyən saxtəti,bo imonon mığoyisə kardero bıə qıləy test və imtovone.ısət ikəs ki,bə xoş nıomə hodisəon iyən vey saxtə təklif iyən vəzifəon vədə bə İlahi əmron təslime,çəy İslom vey zumand və ikəs ki,çe bə xoş nıomə hodisəon şiddəti mığobilədə darşiyedə və kamə tov vardedə,çəy imoni mərhələ vey zəyife və saruye.
Bəhisob,Əmirəl-Muminin Həzrət İmom Əli(ə) bın şərifə hikmətədə çe həyğiyə islomi ali iyən komilə dərəcə bəyon kardedə.bənə əy bıə məno İslomi co qılə rəvoyətonədə həm omə ki,əməli çe imoni meyor hisob kardedə.
Ğurərul-Hikəm və Durərul-Kəlam kitobədə Əmirəl-Muminin Həzrət İmom Əli(ə) jıqo hamyedə:”Xıdovənde-Subhoni nəzdədə barzə şərəf iyən məğam,de çokə əməliye,nəyinki,de reçinə sıxanon”.bəçəy xoto,bo insoni çe maqi bədiqə və ğıyoməti ruji həmməysə şokə zəxirə iyən sərvət,əməle saleh hisob kardey bıə ki,çe İmom Əli(ə) bə Malik Əştəri nıvıştə məşhurə nomədə ə həzrət bə Maliki xitobən jıqo hmayedə:”ıştə palu həmməysə çokə zəxirə,salehə əməli ğərol bıdə”....
