Dılon mahbub (de Vəhdəti haftə mınosibəti məxsusə bərnomə)
Əzizə duston, dəvardə rujonədə votımone ki mısılmonon miyono vəhdət, əcumlə mevzuonku qıləynie ki İslomi qiromi peyğəmbər(s)-i nəzəku vey təkid bıə və ım məsələ barədə Peyğəmbər(s) həmişə ulqu iyən simvol be.
əmmo qıləy holədə ki Kərimə Ğıron, Peyğəmbər Əkrəm(s)-i rəftor, sıxanon və metod bə çəmə bə yod dənoe ki həmişə İslomi nizomi oqətey və umumi xəyr bə şəxsi və qrupi mənafe iminnə dərəcədə ğərorış qəte və har qıləy hərəkət ki İslomi cəmiyəti miyono dave və ixtilofi boyis bıbu vey mızəmmət bıə, əmmo ijən islom dınyoədə çand sədo bey şoyd hestimon. Çəy barzə nımunə bə Ğəzzə be qınohə hırdənon ələyh sıtəmkoron oşkoə zılmon vədə sukut və passivə hərəkətone, həmonə hırdənon ki de dəhşətinə bombardımoni sədoon larzedən və kıştə bıdən. Çı qıləy bə oxo nırəsə dard və əzobe ki Ğəzzə bəy dıço bıə və hırdən kıştey və etosniye, inəon və dədəon har rujə əzobe. Quya dınyo pərəsti ğalməğalədə, vəhdət, dusti və bıvəti iyən bə yande komək rosniye barədə Kərimə Ğıroni ruşinə təlimon və Xıdo Rəsul(s)-i vanq qim bıə.
Bə Kərimə Ğıroni əsos, hiç vaxt hiç qılə mısılmon zılmi vədə sukut kardey həxış ni və ım qıləy məsuliyəte ki bə İslomi həmmə umməton qərdənədəy.
Ehanə Fələstini məzlumiyətiku mudafiə kardeyədə İslomi devləton və mısılmonon deyande i bebun ijən Ğəzzə hırdənon hənək və sırə sədo bə quş bərəse.
Əzizə həmzıvonon, dınyo vey ğəşənq əbi ehanə həmmə mısılmonon vəhdət məsələ barədə bə Kərimə Ğıroni ozodəbaxşə ayəon diğğət əkin iyən mıştərəkə restədə deyande həm sədo əbin. Oxonəsə dınyo muxtəlifə məntəğəonədə zolımon vədə ki bə mısılmonon zılm kardedən, İslomi ummət vey ğudrətış bəbe, ijən di bıə ni, ijən Ğıroni sədo əməni dəvət kardedə və Həcci surə 40 minnə ayədə hamyedə:
(Bə zılmi məruz mandə məzlumon)Ə kəsonin ki, nohəxədə ıştə kə-bəyku tojnıə bıən(və hiç qıləy qınoşon ni) və fəğət ımi voteydən: çəmə Xıdo i bıə Xıdoe və əgər Xıdovənd çı məxloği kali qılə de co qılə vositə dəfnıko, sovmiyyəon, sinaqoqon, kilsəon iyən məçiton ki, Xıdo nom bəvədə ziyod zikr bedə, viron bəbe və hukmən Xıdovənd bəçəy dini koməqəkəyon koməq bəkay. həyğətən, Xıdovənd zumand, məğlub bıənin ni.