Nurə Banu,Həzrəte Məsumə(s)
Nurə Banu,Həzrəte Məsumə(s)
Həzrəte Məsumə(ə) bə İroni bıə mısofirəti dəlil,İmom Rıza(ə) boəy vığandə nomə be və həmonə məktubədə çəyku tələbış kardəbe ki,bəçəy dido boy.Həzrəte Məsumə(ə) çəy bıvə İmom Rıza(ə) bə İron daxil bey i sor bəpeşt,deştə bıvon,hovon iyən nezə odmonku çandə qıləyniyon bə ico de İmom Rıza(ə) vindemon kardey məğsədi bə ın diyori varid be.Həzrəte Məsumə(ə) bə İroni Savə şəhri rəsey bədiqə,de Əhli-Beyti(ə) iyən deçəvon şiəyon dışmenəti kardə hukuməti məmuron, bəvon həmləşon karde və çəvon merdonışon bə şəhodəti məğami rosneşeone.ə həzrət ki,bə ın canqi iyən bəştə ğıryətmandə bıvon məzlumonə şəhodəti şoyd be və çoko ki,ıştə bıvon iyən bıvə zoon poə-poə bıə bədənonış vinde,çə həzrəti lətifə ruf rəncidə be və çəy qırd vucudi huzn,ğəm iyən ğussə dəqəteşe və həmonə ğəm iyən norohətçəti ə həzrətış noxəş karde.mıhəğğiğonku kali qıləyniyon jıqo hisob kardedən ki,Həzrəte Məsumə(ə) Savədə de dışmenon dasti məsmum iyən zəhrin be.bə Həzrəte Məsumə(ə) noxəşəti ğələbə pəydo kardey bəpeşt,ə buzurquvarə banu ıştə həmroonku dəparseşe:çiyo tosə Ğomi şəhri çanədə məsofə heste?.voteşone:təğribən 65 kilometr. Həmonə buzurquvarə banu hamyeşe:mıni çiyo bə Ğomi şəhri mıntəğilkənən,bobənən.zira az ıştə pıku məsəme ki,hamyeşe:”Ğomi şəhr çəmə şiəyon mərkəze”.
Həmonə zəmonədə Mosə ibn Xəzrəc ki,çe Ğomi şəhri buzurquvarə şəxs iyən şiəyonku be iyən Həzrəte Məsumə(ə) və de ə həzrəti bə ico bıə kəson bə Xorasani səmt bıə səfəku xəbədo be və həmçinin məsəş be ki,çe hukuməti məmuron bə ın buzurquvarə banu kərvoni hucuumışon kardə, de i dastə şiyə və muhibbon bə ico,bə ro dəqınin.əv,roy nimədə bə Həzrəte Məsumə(ə) xıdməti rəse və bəvon veyə dılvandiş doe.peşo çə həzrəti asbi ləğomış qəte və bəştə kəş barde.de Həzrəte Məsumə(ə) bə Ğomi şəhri daxil bey,çın şəhri mərdum qıləy mısofiroşon ğəbul karde ki,2 manqi mıddətədə qıləy dırozə məsofəku dəvardey bəpeşt,ısət oqıniyə iyən əziyyət vində holədə çəvon şəhrışon vıjniyəbe.
Ğomi şəhri millət ki,çın hodisəku vey xoşhol və şo bıəbin,ıştə məhəbbəti nışon doey iyən bə ə həzrəti dılvandi doeyro,bə Həzrəte Məsumə(ə) xıdməti rəsin və səy kardedəbin ta çı Əhli-Byetiku(ə)bıə ın buzurquvarə banu mıolicə bıkon.əmmo çəvon kəşə zəhməton bə qıləy vırə nırəse və nəhoyətədə Həzrəte Məsumə(ə) ki,de “Əhli-Byeti(ə) Kərimə” yəni de Xıdo Rəsuli(s) xanedani səxovətinə xanımi nomi məşhur be,çe Ğomi şəhri bəmə iyən ğəmqinə milləti miyono Hicri-Ğəməri 201-ə sori Rəbiyus-Sani daminə ruji (Milodi 816 noyabri 9)17 rujnə saxtə noxəşəti dəvordıney bəpeşt,bə şəhodəti məğami rəse.çə həzrəti pokə bədən Baylan nomo qıləy vırədə dəfn kardey be ki,çə həzrəti ısətnə pokə mərğəd iyən hərəm bə hisob omeydə.çe Həzrəte Fatməye-Məsumə(ə) mədfəi peyo sıftədə qıləy sayebon və peso qıləy ğımbəd bina kardey və soxtey be.ın mdəfən de tədrici qıləy əndozə və həddədə hevuj be ki,ımruj çe İmom Rıza(ə) Məşhədədə bıə Hərəmi bəpeşt,İronədə həmməysə əzəmətin iyən məşhurə oromqo və mərəğəd bə hisob omeydə.
