Nəhcul-Bəlağə hikməton

Nəhcul-Bəlağə hikməton

Və min kəlamih İmom Əli(ə) li-Kumeyli  bin Ziyod Ənnəxəyi... Allahummə....

İmom Əli(ə) 147-ə hikməti oxonə baxşədə ıştə sıxanonədə bə Kumeyl bin Ziyodi jıqo hamyedə:”Allahummə...bəli! zəmin Xıdo huccəton bərpo kardə kəson oşko iyən məşhur ya tarsnok ya anonim  və benom xali nibəmande tayinki,Xıdo din çe miyoniku nışo.çəvon vucud bə ın səbəbi xotoye ki,İlahi dəlilon və çəy ruşinə nışonəon botıl nıbu və çe dasto nışo”.

Əmirəl-Muminin həzrət İmom Əli(ə) çın sıxanon dəvomədə bəçəvon ədəd iyən bəçəvon sıfəton işorə kardedə və hamyedə:”Və kəm ...Əvon çandə nəfərin iyən komcoon?.bə Xıdo ğəssəm çəvon ədədon kam iyən çəvon Xıdovəndi nəzdədə bıə ğədr və məğam vey barze”.

Məcidə-Ğıron həm Sadi mıborəkə surə 24-ə şərifə ayədə çe imoni barzə dərəcədə bıə muminon barədə jıqo hamyedə:”Və ğəlilon mahum...Əvon ki,imonışon heste iyən salehə əməl əncom doydən və bə iyande zılmo-sıtəm kardedənin,çəvon ədəd kame”.

Peşo Əmirəl-Muminin həzrət İmom Əli(ə) çe Xıdo barzə məğami soy bıə iyən şənışon bəpe bıə bandəon və ın kamə dastə vəsfon zikr kardedə,boəvon şəş qılə sıfət aşmardedə və hamyedə: ”Yəhfəzullah bihim....Xıdovənd deçəvon vositə huccəton iyən dəlilonış hifz kardə ta bə bənə əvon bıə kəson bəspardon və çəy tumi bə bənə ıştə bıə şəxson dılon peşandon,elm iyən zıney de bəsirəti həyğəti bəvon dimış qətə.əvon  çe yəğıni rufışon ləms kardə”.

Əmə zıneydəmon ki,çe yəğıni çandə qılə mərtəbə və dərəcəonış heste:Elmul-Yəğın,Eynul- Yəğın və Həğğul-Yəğın.Elmu-Yəğın ıme ki,inson çe mıxtəlifə dəlilonku bə qıləy çi imon vardedə.bənə ə kəsi ki,de diyəroə royku mışohidə kardey,bə otəşi vucudi imon pəydo kardedə. Eynul-Yəğın bə vırədəy ki,inson bə şuhudi mərhələ rəseydə və deştə çəşon məsələn otəşi çe neziku vindedə.Həğğul-Yəğın həm çəysə bəpe qıləy vırədəy və bın mənoədəy ki,məsələn inson otəşi deştə dasti ləms kardedə və bənə otəşi bıə mevcudi bə otəşi daxil beydə və çəy sıfəton bəştə peqəteydə və bənə çəy i hissə beydə ki,ım çe yəğıni həmməysə barzə mrətəbəy və bə İmom Əli(ə) hamye əsos,çe Xıdovəndi ın vıjniyə bıə bandəon bə ın mərhələ rəseydən.