Nəhcul-Bəlağə pand iyən hikməton
Nəhcul-Bəlağə pand iyən hikməton
Həzrət imom Əli(ə) Nəhcul-Bəloğə 148-ə de məno pur bıə iyən kutoə hikmətədə jıqo hamyedə: ”Əlməru...insoni şəxsiyyət iyən çəy personaj çəy zıvoni jiyədə punhon bıə.
Beşək,zıvon çe odəmi rufi qədə bəy.hakəsi kəlməon miyono çok-çoki çəy daxili nığılə vıronku aqah bey bəbe.Muhəmmədi mıborkə surə 30-ə şərifə ayədə bə ın həyğəti işorə kardedə və bə pəyğombəri(s) xitobən jıqo hamyedə:”əqər əmə bıpyimone əvoni(mınofiğon) bətı nışon bədomon ta (tı)əvoni çəvon ğıyofəonku və simonku bızınoş,harçand əvoni çəvon sıxan votey şivəku məlum kardey bəzıneyş”.
Zıvon,fik iyən əğıdə miyono qıləy xassə rabitə və mınosibət heste.joqo ki,de bə zıvoni cari bıə kəlməon dığğət kardə holədə,bə fərdon zehnon daxil bey iyən çəvon fikonku aqah və xəbədo bey mumkine.bə həmonə dəlili xoto,hejo çe şəxson daxili fik,niyyət iyən sırronku xəbədo beyro, bə hisobi əsos iyən mohironə mısohibəonku oko doey bıə iyən oko doey beydə.
Əmirəl-Muminin Həzrət İmom Əli(ə) co qıləy hədisədə jıqo hamyedə:”Hiç qıləy inson hiç qıləy çi ıştə dılədə punhon kardedəni illah ki,qıləy sıxanədə ki,çəy zehniku xaric beydə ya qıləy əsər ki, çəy çehrə iyən ğıyofədə mınəkis beydə,oşko bəbe”.ın sıxan ki,psixoanaliz və psixoloqiya əsosonku qıləyni təşkil doydə,ın həyğəti nışon doydə ki,zıvon çe odəmi rufi tam şikilədə nışon doə ovəynəy.de sıxan votey tərığ və roy,sərəse beydə və fame ki,çın şəxsi çanədə ağl və xırədış heste və həmonə ağli çanədə ruşdış kardə,ozavziyə iyən ıştə jimonədə çanədə çəyku okoş doə.hakəsi ağl və xırəd çe insoni erji mığdori mıəyyən kardedə inson har qıləy mığdorədə ki,ağl və zəkoş vey bıbu və bə kəmoli səmt hərəkət bıko,bə həmonə nisbət kamə sıxan bəkarde iyən ıştə sıxanon bəvıjne,çən bə zıvon bəvarde.əkəson ki, ziyodə sıxan kardedən iyən ıştə zıvoni navi qətey zıneydənin,ağlışon kam iyən çəvon fik kutoye.əvon sıxan votə zəmonədə ıştə votə sıxani barədə fik-fam kardedənin və harçi bəçəvon zehni omeydə,hiç qıləy fik və əndişə nıkardə holədə,əy bəştə zıvon cari kardedən.əmmo çımi əks ağılmandə şəxson çanədə ki, qıləy mevzuşon bərrəsi və təhğığ kardəni və çəy çok ya bevəcəti barədə fikışon kardəni,qıləy sıxan bəştə zıvon vardedənin.
