Nəhcul-Bəlağə pand iyən hikməton

Nəhcul-Bəlağə pand iyən hikməton

Əmirəl-Muminin Həzrət İmom Əli(ə) Nəhcul-Bəloğə 158-ə hikmətədə de qıləy ğəşənq iyən bə dıl nıştə tevsiyə bo qıləy dusti cəlb kardero jıqo hamyedə:”Atib əxakə bilihsani....ıştə bıvə(çəy xəto kardə zəmonədə)de bəy çokəti kardey mızəmmət bıkə.(bəy tehmət jey əvəzi,bəy çokikə ta xəcolət bıkəşo.çunki,çe xəcolətin bey bəsə har qıləy mızəmmətisə veyə təsirış heste) və çəy bevəci de bəy baxşeşi bərtərəf bıkə(zira baxşeş bə dustiyəti boyis beydə və çe bədi vədə bədi kardey,bə dışmenəti ziyodəti səbəb bəbe).

Qahi zəmon duston çəmə həxədə bemehibbəti kardedən.ehyanə çe qiloyə,mızəmmat və əvəz beşey bə oj bıbu,mumkine ın ixtilof rujbəruj vey bıbu iyən nomehrbonətiyon eksponensial surətədə bənav şeydə və dışmenəti çe dustiyəti vırədə ğərol qəteydə.əqər əmə çe cokəson nomehrbonətiyon vədə həmonə hərəkəton nıkəmon,çoko ki,bə İmom Əli(ə) bın hikmətədə hamyey əsos əməlkəmon,vey rə xətokorə fərd ıştə kardə koyku peşmon bəbe iyən çəy əvəzi beşey dumo bəbe.məsələn əqər qıləy dust niyoz və ehtiyoci zəmonədə bəmə qıləy ğarz nıdo,əmə həm çəy niyozin bıə vaxti hiss kardeyədə,bəpe bəçəy soyəx bışəmon iyən ziyodə ğarz çəy ixtiyorədə bınəmon.yəğınən əv,ayəndə və omə rujonədə ıştə bemehr iyən bemehibbətə koon təkror nibəkarde.

Əmirəl-Muminin Həzrət İmom Əli(ə) çın sıxani əsos və məbno,Fussiləti mıborəkə surə 34-ə şərifə ayədə omə və hamyedə:”İdfə` billəti....bədi de çoki dəf bıkə,ğəflətən(bəvindeyş)həmonə şəxs ki,ıştə deçəy miyono qıləy dışmenəti heste,jıqo bızın qıləy qam iyən səmimiyə dustəti heste”.

Həlbəttə,har kəsi bın həddədə zərfiyyət iyən ojə sinəş ni və bə bədiyon de mehrbonəti iyən çokəti cəvob doey zıneydəni,liza Xıdovənd dəvomədə 35-ə ayədə jıqo hamyedə:”Və ma yuləğğaha...Əmmo ğərəz qıləy səbr iyən tovinətişon nıbə kəson,bə ın məğami rəsey nibəzıneyn və sıvoy(imon iyən təğvoku)qıləy dıjdə bəhrəşon nıbıə kəson,bəy noyil bey əzınin.

Həzrət İmom Həsəni(ə) qıləy helm və səbrış hestebe və Əmirəl-Muminin Həzrət İmom Əli(ə) çın hikmətiku qıləy bəhrəş bardəbe.joqo ki,Şamiku bıə qıləy merdi mehibbətış bəştə səmt cəlb kardeyış zıne və əvış de həyğəton oşnoş karde.həmonə merd çe İmomi(ə) sıxanon məsey bəpeştə, binoş karde bo bəme və voteşe:”şəhodət doydəm ki,şımə çe Xıdo bəsə zəminisə bıə xəlifəyon və Xıdovənd vey çok zıneydə ıştə risolət və xilofəti kom co ğərol bıdo və detı mıloğoti bənav,çımı palu,tı iyən ıştı pıə çe məxloğoti həmməysə dışmenə qıləyni zıneydəbim,əmmo ısət çımı nəzdədə şımə çe Xıdo məxloğoti həmməysə mahbubə qıləyniyon”....