Nəhcul-Bəlağə pand iyən hikməton

Nəhcul-Bəlağə pand iyən hikməton

Pəyğombəri(s) hamsuyətiyədə qıləy yəhudiyə fərd jimon kardedəbe ki,bə ə həzrəti veyə əziyyət kardedəbe.əv,har ruj ıştə kəy bomiku ıştə mənğəli otəşə xoki ki,hələm həm tat be,bəsə ə həzrətisə rukardedəbe.ın ko zohirədə bənə kuçədə leşt iyən xoki ru kardey be.əmmo əv,həyğətədə bə Pəyğombəri(s) nisbətədə bıə ıştə kin-kudurət və ğəzəbi ibroz kardey məğsədi ımi əncom doydəbe və pəyğombər(s) həm deştə səbr iyən tovinəti çəy kənoku dəvardedəbe.

Tayinki,i ruj pəyğombər(s) sərəse ki,həni çəy sape anc-manc rubedəni.təhğiğış karde və ıştə əshobonku dəparseşe ki,çiç bıə və kom məsələ bə əməl omə.çə həzrəti duston cəvobışon doe ki,ın merd noxəş bıə iyən noxəşəti yonquyədə olaxtə.Pəyğombəri(s) barzə əxloğ iyən rufi ə həzrətış bə həmonə yəhudi kəy səmt bardeşe.qıləy zəmon ki,pəyğombər(s) çə həmonə yəhudiyə merdi kəybəş je,çəy jeni çe kəybə peştono dəparseşe:kiye?kom kəs bə jeydə?.pəyğombəri(s) cəvobış doe:Muhəmməde(s),Xıdo Pəyğombər(s).

Həmonə jeni be ixtiyor bəş oj karde və pəyğombər(s) bəçəvon kə dılə daxil be.ə həzrət çə həmonə noxəşə yəhudi palu nışte və de qılət məhəbbətamizə toni çəy hol-əhvolış dəparse.quya və jıqo bızın çəyku hiç qıləy əzob-əziyyətış vində nıbe.

Pəyğombəri(s) bə qırd mərdumi bıə,hətto bəvon ki,deştə qırd ğıvvə bə ə həzrəti cəfoşon kardə iyən əziyyətışon kardə be,ın mehrbonəti iyən ehson,anədə ziyod be ki,Xıdovənde-Xalığ Kərimə-Ğıronədə bə ə həzrəti əhsən votedə və jıqo hamyedə:”Və innəkə ləəla xuluğin əzim:Yəğınən tı,bə qıləy dıjd iyən çokə əxloği malikiş”.bə cokəson məhəbbət iyən mehrbonəti nışon doey və çe hoziyəti,iftiro ğandey və behtoniku bə diyəro mandey,çə həzrəti dayimiyə rəftor be ki,23 sori dırozi veyə dılonış bəştə səmt cəzbış karde və əvonış çe zəloləti mırdoviku bə siratəl mustəğimi səmt hidoyət və səbəroş karde.Məkkə fəthi cərəyonədə həm çə həzrəti iyən çəy əshobi həxədə həmməysə bevəcə sıtəmon,cəsorəton iyən dışmenətiyon kardə kəsonış həmmə baxşe.ə kəson ki,çe vəhşət iyən dəhşəti dılədə mandəbin iyən çəş kardedəbin ki,pəyğombər(s) çəvonku qıləy şiddəinə intiğom bəstəne,əmmo ə həzrəti hamyeşe:Az,həm bənə Yusifi(ə) ıştə sıtəmkorə bıvon barədə kardə çi bəkardem və bənə əy votedəm:”La təsribə ələykum:Imruj boşmə hiç qıləy mızəmmət ni”.

Qıləy zəmon ki,həmonə mehrbonə rəhbər,hovlnok iyən niqəronə mərdumış orom və sakitış karde,izofəş karde ki,:”Əlyəvmə yəğfirullahu ləkum və Huvə Ərhəmərrahimin:Imruj çe canq iyən intiğomi ruj ni,bəlkəm çe rəhmət iyən məhəbbəti ruje və mı,şımə qırd cinoyət və qınonku dəvardedəm”.

Əvon həmmə jıqo bızın ki,sənibəton çe moku bin iyən qıləy rohətə nəfəsışon se.ğərəz çandə məhdudə xonəxo ki,ijən həm bə Pəyğombəri(s) nisbətədə ıştə dılədə dışmenəti iyən ədovətış oqətəbe,əmandə şəxson çe Xıdo-Rəsuli(s) nışon doə həmonə eşğ iyən məhəbbət bəçəvon vucudi nığılə vırə nufuzış karde və əvon həmmə mısılmon bin.