Mubarəkə Rəməzonə manq dame.

İslamədə manqon arədə Rəməzonə manq ən şərafətin və muğəddəs hisob bedə. Rujə qətə mərasim çe hicrəti dıminə sori Peyğəmbər (s.ə.v.s) tərəfo Mədinədə ım manqi təyin kardeku bino bə

Məhz Rəməzonə manqi orəxnə 10 gəvədə Ğıron nazil bıə. Ehtimal heste ki, ım, manqi 22-ku bə 23, və ya 26-ku bə 27-minə şəvonədə vağeə bə. Bə həmonə şəvi “Leylət əl-Ğədr” – yəni, ğudrətinə, əzəmətinə şəv votedən.  Ğıronədə ım şəvi həxədə votə bedə ki, “Əhya şəv həzo manqisən xeyrine. Həmonə şəvi firiştəon və puh de Xıdəvandi-aləmi icazə bə zəmin evodən. Həmonə şəv tosə suhiə sıvion saleməti şəve”. Həzrəte Peyğəmbər (s.ə.v.s) votedə ki, Rəməzonə manq omeədə vəhişti dərvazaon oj, cəhənnəmi dərvazaon bastə, şəyton isə zəncirədə bedə.” Hırdənon, hamilə zənənon, cəbhədə canqi iştirakkaron, musafiron, iyən noxəşinon rujə qəteku azadin. Doktoron adətən bə mədə-ləvə noxəşi, diabet,  dıli və xuni təzyiği əlağədar mərəzon mubtəlo bıə noxəşinon rujə qəte məsləhət zınedənin.

Rujəmoə manqi çokə tərəfono qıleyən çəsəynə (subh vaxti)  və iftor (hanqomi vaxti) oğandə ruziə sufrəonin.

Im məlumaton “Sputnik Azərbaycan” sayti de Rəməzonə manqi dame munasibəti bəştə əhandon rosniəşe. Ğəfğazi Mısılmonon İdarə Ğaziyon Şura de ım mubarəkə manqi bino bıe munasibəti fətva doəşe ki, fıtrə zəkati vaxt manqi orəxnə rujədə bənine. Çey məbləği bo har kəsi 10-15 mənot bıe məsləhət zınəşone. Fıtrə bekarde bo imkaninə har mısılmonə ailə vacib qıley əməle, bə beçizə, fəğır-fuğəra odəmon komək karde ro nəzərədə qətə bedə. Sosialə şəbəkəonədə fıtrə zəkati 10-15 mənot muəyyən bıe xeyli yuzeron tərəfo bə jıqo fikri səbəb bıə ki, ım məbləğ veye, çunki əhali ey doe imkanədə ni. Imən orəxnə sorədə Boku hokuməti bardə sosial siyasəti soyə xalği quzərani səviyyə çand ğədər saru eğande nişon dodə.

İbrimi Zahirəddin, çe Rusiya Yekaterinburğ şəhəriku. İİR sədo, tolışi radio.