Ostoro rayoni Unuz di əhali quzəron.

Unuz diku tosə Ostoro şəhəri 27 kilometr məsafə heste. Bandə əraziədə, de İroni marzi nezi ğəror qətəşe

Əyo 4 qılə xeyzon jimon kardedə. Əğədadaş Eyvazovən həmonə divoje. Bə “Azadi radio” ıştə dı problemon barədə votəşe ki, diədə məktəb ni, bə səbəbən diy hırdənon təhsil se ro imkanşon ni. Çey 21 sinn hestışe. Səvod nişe. Ço qılə bıyə, 2 qılə hovə hestışe, rukə hırdən 7 sinnədəy, əvonən tosə ısət bə məktəbi həsrətin. Diyku bə ço məntəğəon hiç qıley ro ni, ən nezə di Oamoy ki, bey de aspi bə 6 saat şe bedə. Əğədadaş dıminə Ğərəboğ canqi veterane, de 2 qılə medali təltif bıə. Təhsilış nıbeku hiç vırədə ko peydo karde zınedəni. Çey rukə bıyə Amidi 11 sinn hestışe. Ey bə məktəb peqəti barədə bə Ostoro rayon təhsil şebə, və Zunquləş di miyonə məktəbi muraciət kardəşone. Bəvon votedən ki, Amidi bə məktəb peqətə sinn dəvardə, bəpe bı barədə Təhsilə Vəzarət ğəror bıdo.

Ostoro Rayon İcra hakimiyyəti aparati Ərazi İdarəkardə şebə mudir Xanverdi Şirinovi ım problemi izahədə votəşe ki, rəsmən Unuz nomədə inzibati məntəğə mevcud ni. Çəvrey sakinon co di bələdiyyə idarə ğeydiyyatşon heste. Eyvazovon xeyzoni yol Nəzərəli Şuvi, çey jimoni həmro isə Səncərədi bələdiyyə ğeydiyyatədən. Əvon ıştə hırdənon bə məktəb noe ro vaxtədə muraciət kardəşon ni. Rayon rəhbəriyyətiən pidəşe ki, hiç kəs çe təhsiliku kənoədə nımando.

Ostoro Təhsilə Şebəkuən bə muxbiri votəşone ki, bo təhsiliku kənoədə mandə hırdənon bəpe fərdi sinif oj kardə bıbo, ımən çe Respublika Təhsilə Vəzarəti səlahiyyətədəy. Tojə təhsilə sorədə ım məsələ həll bəkarden, əsas əve ki, həmonə şaqirdon vaxtədə bə məktəb ome bızınon.

Zunquləş di məktəbi səlahiyyətinə şəxsiən məsləhət zınəşe ki, bo nubətinə dərsə sori, vaxtədə muraciət bıkardon, hırdənon bə məktəb daxil karde ro bəvon komək bəkarden.

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.