Qilonədə Ğuds beynəl xalğə ruji aksiya de səhiyyəvi protokolon rioyəti əncom bəbe.
Mehribonə əməson səlom, dıvo kardəm Rəməzan mıborəkə manqi oxonə rujonədə şımə nımoj-rujəon və ibodəton ğəbul bıbu. Dəvət kardəm bə ımrujnə xəbə reportaj baxşi quş bıdənən.
Xosə Tolışon, Qilonədə vəli fəğih nımoyəndə votışe: Ğuds beynəl xalğə ruj, bə İslam və dınyo bəşəriyəti məxsuse iyən Əyyamullah bə hisob omeydə.
Bə İRİB raporti əsos, Qilonədə Ğuds ruji beynəl xalğə aksiya bərpo bey həmohənqi iclosədə, Ayətullah Rəsul Fəlahəti, votışe: İsrail ğəddorə rejimi mığubilədə islami umməti vəhdət icod kardeyro, İmom Xomeyni(r)-i ım tədbiri yol qətey vey muhim və erjinə roy iyən metod bə hisob omeydə.
həminə iclosədə Qiloni ostandar həm işorəş karde ki sionist rejimi təhdidon iyən deşmənçiyəti, fəğət bə Fələstin və Fələstinıjon məxsus ni və votışe: sionist rejimi deşmənçiyəti, islami umməti hədəf qətəşe ki bo həmmə mısılmonon muşkilaton icodış kardə.
Əsədullah Əbbasi bə İron İslam Respublika viloyətmədorə Qilonıjon aqahi və bəsirəti işorəş kardə iyən əlovəş do: Ğuds beynəl xalğə rujədə milləti hərorətinə iştirok iyən Fələstini məzlumə millətiku həmmə tərəfiyə himoyəon və çəvon hədəfonku himoyədorəti karde, bois bəbe sionist rejim vey rə məhv bıbu.
ım iclosədə Qiloni islami təbliğəkə şura rəis həm, bə korona virusi pandemiya xoto Ğuds beynəl xalğə ruji aksiya 2 sori tətil bey işorəş karde və votışe: ımsor Qiloni 95 qılə mərkəz və vırədə, Ğuds beynəl xalğə aksiya bərpo bəbe.
Ğuds beynəl xalğə rujədə iştirokiro, Qilonıjon həm ıştə hozzohəti elan kardəşone.
Ğuds beynəl xalğə ruji aksiya ğəhrəmanəti, İslami dınyo vəhdəti simvol iyən bə kəromət səmti hərəkət karde mənodəy.
Qiloni millət ım rujədə deşət hərorətinə iştiroki vositə, tojədən de islamiyə inğilobi yolə təsisəkə hədəfon əhd-peymon bastedən, və bə həmmə dınyo nışo dodən ki tosə Şərifə Ğudsi ozodəti, Fələstini məzlumə millətiku himoyədorəti kardən.
maştə, mıborəkə Rəməzanə manqi oxonə cımə ruj iyən Ğuds beynəl xalğə ruje.
