Şiiə yolə alimon
Şiyə dınyo yolə alimon-159
Şiiə yolə alimon
Mirzaye Şirozi Nəcəfı-Əşrəfi tərk kardey bəpeştə Rəcəbə mani sıftənə ruji de ziyorəti ğəsdi bə Kərbəlo şəhri daxil be və həmonə sori Nimeye-Şəbani ruji bə Samirra şəhri səmt hərəkətış karde və nəhoyətədə bə ğərol ome ki,hejo həmonaə şəhrədə bımando.de Mirzaye Şirozi çı Nəcəfı-Əşrəfi şəhriku bə Samirra şəhri hicrət kardey,de çın şəhri ziyodə alim iyən tələbəon dimbədim ome və əməli surətədə çı Şiyəon dini hovzəye-elmiyyə mərkəz bə Samirra şəhri intiğol doey və ovoştıney be.Mirzaye Şirozi bo Samirra şəhri tələbəonro qıləy mədrəsəş soxteşe ki,ısət həm həmonə mədrəsə de Mirza nomi zıney beydə.Şiyə ın yolə alim bənə Şiyə məzhəbi tələbə və alimon,bə sınni məzhəbi tələbə və alimon həm mustəmirri ya şəhriyyə pərdaxt kardedəbin,doydəbin və dayima çı mısılmonə umməti məzhəbon miyono vəhdəti çı İslomi camiyə izzət və səbarzəti amil hisob kardedəbe.
Mirzaye Şirozi Samirra şəhrədə bıə iştirok bo çın şəhri milləti de xəy iyən bərəkəti pur be.əv bo çın şəhri milləti ki,bə zəmonədə camaati əksər çı əhlı-sınnətiku iborət be,dıqlə həmom,iqlə vıjor iyən iqlə həm Huseyniyyəş soxte.Samirra məxloğ bo ticorətiro məcbur bin ki,çı ruyku dəvardon və bın zəmon ğoldorə dastəon bəçəvon ticorəti kərvoni həmlə kardedəbin.Mirzaye Şirozi bo bə ım aşuftə iyən bəyənde qıniyə vəzyəti bə səhmon dənoey xoto,çın rudxonə piyo qıləy pardış soxte və ta əmniyyət iyən asyişi şərayit bo nilləti hozzı bıbu.Mirzaye Şirozi Samirra şəhrədə bıə iştiroki bəpeştə,ım şəhr bo şiyə iyən sınni məzhəbi tərəfdoron vəhdətiro bə qıləy simvoli təbdil bıəbe və ım həmonə çi be ki,dınyo zolımkor iyən istemorə ğudrəton çəyku tarsışon hestebe…
Mirzaye Şirozi siyosi hərəkətonku muhimmə qıləyni çəy tənbaku sabksiyə iyən bəçəy zidd bıə torıxi fətvo be.qıləy fətvo ki,bə ironədə qıləy dıjdə milləti hərəkət iyən inğılobi bə formə dəşey boyis be.Tənbaku inğlılob çı mıosirə ironi torıxi həmməysə muhimmə hodisəonku qıləyni bə hisob omeydə.macəra jıqo be ki,1307-ə Hicri-Ğəməri sori dırıst çı Molla Əli Kəni bəfoti I sor bəpeştə ki,deştə mızəmmətamizə nomə bə Nasiruddin şah çı Royteri sanqinə mığovilə ləğv kardeyış tələbış kardə be.şah bə ğərol oməbe ki,bo seminə kərə bə avropə kişvəron səfəko.çın səfə bo ironi milləti noiliyyət çın mığoviləku ım be ki,bəçəy əsos ironi tənbaku məhsuli kaştey, pevolo kardey iyən həvatey ko penco sori mıddətədə bə ingilistoni iminə vəziri nez bıə mışovironku qıləyni ki,çəy nom cerald talbot be,ehdə noey be.qıləy şərayitədə ki,tənbaku çı ironi kaştemoni məhsulon muhimmə qıləyni bə hisob omeydəbe,ım mığovilə çı ironi ixtisod iyən ziyodə ironıjə insonon jimoni de xətər iyən təhlukə dimbədim kardedəbe……
