Ğəzzədə bıə Ğuds ruji aksiya cərəyonədə 386 nəfər Fələstinıj zəxmin bıən.

Fələstini səhiyyə vəzərətxonə elanış kardə: zinə Ğuds beynəl xalğə ruji çərçivədə oqarde nomo bıə aksiya cərəyonədə 386 nəfər fələstinıj zəxmin bıən.

Bə İrib raporti əsos Livani Əlməyadini kanali nəğliku, zinə Ğuds beynəl xalğ rujədə oqarde aksiya bino bey həmzəman, sionist hərbion de canqi qullə və çəşə ars vardə qazi bə Ğəzzə şərğədə aksiyaəkəyon həmlə kardeşone.

Ğəzzə tanğəku Fələstini səhiyyə vəzərətxonə elanış kardə siyonist rejimi zinə ruji həmləon nəticəku ta bə ım zəmon 386 nəfər Fələstinıj zəxmin bıən ki çəvonku 5 nəfər saxt və qıvonə vəzyətədən.

Zəxmiyonədə 1 nəfər jen və çand nəfər mıxbir vindey bıdə.

İşğalqərə Sioniston bə imdodəkə qrup iyən maşinon həm həmlə kardeşone.

Əl-Əğsa kanal həm Ğəzzə şərğədə bıə Fələstinıjon və sionist hərbion miyono daveonku filmon nışo doe elanış kardə: Rəfəh şərğədə Fələstinıjon i qılə çı sionist rejimi bepilot təyyorəon ki bə cəmaəti tərəf çəşə ars vardə qazi ğande holədə be, məhv kardeşone ijən bo sionistə snaperon vindeyro problem icod kardeyro maşini rezin və şini otəşışon jə.

Ələğsa ijən Ğəzzə şərğədə fələstinıjon bə sionist irejim mərkəzon hucum iyən de otəş icod kardə balonon həmonə vırəon otəş jeyku xəbəş do.

Çand həzo Fələstinıj zinə Ələğsa məçidədə cımə nımoji bərpo karde bəpeştə Ğəzzədə oqarde nomo bıə aksiya bino kardeşone.

Ğuds beynəlxalğ ruji şemon və aksiya zinə İyoni 8 bərobər de mıborəkə Rəməzani manqi oxonə cımə, de İron islam həmzəman, dınyo co kişvəronədə həm bərpo bıə.

Ğəzzə tanqə sərhədədə bıə oqarde yolə aksiya cərəyonədə ki dəvardə Martə manqi 30 ku bino bıə, 130 nəfər şəhid bıən ki 10 nəfəri vəzyət çox ni.