Şanxay həmkari təşkilati oxonə bəyoniyədə bə İroni ətom sazışi pobənd mande təkid be.
Çinədə Şanxay həmkari təşkilati uzvon 2 ruji iclosi bəpeştə oxonə bəyoniyədə bə İroni ətom sazışi pobənd mande və çəy icra karde bənə qıləy zəruriyat təkid be.
Bə Spotink raporti əsos ım muntəşir bıə bəyoniyədə təsdiğ bəy: həmmə qılə fon bəpe məntəğə və beynəl xalğ stabilə əmniyyəti çərçivədə ətom sazışi jentonədə bəştə əhd-vəzifəon əməl bıkən.
Bəyoniyə co baxşədə bə Suriyə bohrani siyasi royu həl karde əv həm əmniyyət şura ğətnoməon iyən Suriyə hakımiyət, iradə və ərazi təmamiyyəti sayədə işorə be iyən ğeyd bəy: həmmə tərəfon bəpe bo həmonə siyasi prosesi zəminə hozzo karde xoto təsirinə hərəkəton əncom bedən.
De terrorizm mubarizə barədə, narkotik madon vəy qəte iyən əmniyyətiyə bohranon həl karde həm bəyoniyədə çəvon zəroriyat və əhəmmiyəti barədə baxşoni ğeyd be.
Əmmo İroni prezident Həsən Ruhani Çinədə Şanxay həmkari təşkilati 18-nə iclosədə iştirok və nıtğ karde bəpeştə bə Tehron omə; əv ım səfərədə de Çin, Russiyə, Əfğanıstan, Pakiston, Belarus iyən Monğolistani prezidenton həmçınin Hındostani i minə vəzir vindemon və sohbətış kardə.
Zinə həm İroni prezident de Çini prezident vindemon karde ım kişvəri çı İroni ticariyə i minə şərik zınəş be və votışe: de 2 qılə kişvəri pulon ticarət 2 tərəfiyə həmkarion inkişofi bois bəbe ki bankiyə əloğəon inkişof ım sahədə himoyə əkə iyən muğəddəməy.
Ruhani bə ətom sazışi cərəyonədə Çini muhimmə rol işorəş kardə və votışe: ısət həm Piken karde bəzne ım təvafuği dəvom doero muhimmə vırəş bıbu.
Ruhani bə İroni enerji, nəğliyat, sənaye və elmi iyən texnoloqiya sahədə Çini investoron huzur işoderəş kardə və votışe: de terrorizm, radikalizm və ğaçağ mubarizə barde sahədə iyən məntəğə əmniyyəti təmin karde xoto İron və Çini miyono əloğəon hejo təsirinə dəvom peydo bəkay.
Çini prezident həm Şanxay həmkari iclosi çərçivədə İroni huzuri ım təşkilati nıfuzi bois zınəş be iyən iğtisod sahədə stratejik əloğəon 2 qılə kişvəri bə yande bovə mande nışonə hisobış kardə.
Şi Cin Pinq, ətom sazışi bo məntəğə və dınyo sulhi qıləy çand tərəfiyə yolə muğavilə zınəş be və votışe: Amerkə de itərəfəynə hərəkəton və beynəl xalğ həx-ğanuni arşiyə deştə dıli piye dınyo nəzmi vılo karde məğsədışe.
Im vindemoni bəpeştə İron və Çini prezidenton tono 4qılə həmkari muğavilə imzo be.
Şanxay həmkari təşkilat 2001-nə sori və de əmniyyəti, iğtisodi və mədəni əloğəon hədəf məntəğədə Amerkə iyən Nato nıfuzi vəy qətero təsis be.
İron, Əfğanıstan, Belarus və Monğolistan ım təşkilatdə bənə nazirə ozvonin.
