Ğasımi: Amerkə prezident məntəğə vəzyətiku lozimə xəbəş ni.

İroni xarıci vəzarətxonə sıxənəvot votışe: Amerkə prezident məntəğə tarix iyən milləti xusiyət ijən tojə soronədə bıə vəzyətiku lozimə xəbəonış ni.

İroni xarıci vəzarətxonə sıxənəvot Bəhram Ğasımi de İroni tələbəon aqentiyəti(İsna) votımon karde təsdiğış ka: Amekə prezident Donald Trampi zınə bıə mışoviron de təəsufi bə ım kişvəri milləti mənafe diğğət nıkarde holədə və de terroristiyə qruponku ğələtə informassiya doe, Miyonə Şərğ məntəğədə Amerkə bə daveon daxil karde, Amerkə milləti mənafe məhv karde və Trampi simo xərob karde bois bıdən.

İroni xarıci vəzarətxonə sıxənəvot de işorə bə "Val Strit jurnal" rujnomə mısohibədə İroni barədə Trampi tojə bəyonat təsdiğış kardə: təəsuf ki Amerkə prezident bə İroni zidd kali beəsos, tikrori və nadırıstə dastanon bəyon kardey vey adətış kardə.

İroni diplomatiyə aparati sıxənəvot Trampi sıxanon barədə ki votəş be çəy prezident bey vaxti bənav İron həmmə vırəon bənə Suriyə və Yəmənədə huzurış be, votışe: dəvardə sa soronədə İron bə hiç sərzəmin və kişvəri təcavuz kardəş ni və bə çəvon sarzəmini işğal karde fikədə nıbe iyən nibəbe, Trampi huzuri bənav həm İron hiç məntəğəş işğal nıkardə ki Trampi ome və ətomiyə təvafuğiku çəy xaric bey bəpeştə ısət çəyku xarıc bıbu ya ıştə siyasəton əvəz bıkə.

İroni xarıci vəzarətxonə sıxənəvot İroni məntıği və dırıstə siyasəton, məntəğə koonədə kamelən oşko və şəffofe zınəş be iyən təkidış kardə: İroni məntəğəiyə siyasəton əcumlə de ifroti və terroristiyə qurupon mubarizə barde, məntəğədə sulh və əmniyyət icod karde xoto cəhd və Miyonə Şərği kişvəronədə inkişof iyən zumandəti icod karde cəhətədə be.

Əv bə Suriyə dıvləti tələbi əsos ım kişvərədə de terrorizmi mubarizə bardey və mışovirə koməkon xoto İroni huzurış ğanuni və rəsmi zınəş be.