Ğasımi: Trampi səfər bə Bəğdad bə İraği milliyə hakımiyəti tovhin kardeye.
İroni xarıci vəzarətxonə sıxənəvot bə İrağ Amerkə prezident Donald Trampi diplomatiyə ğaydəku xarıc bıə səfəri İraği milliyə hakımiyəti rioyət nıkarde zınəş be.
Bə İrna raporti əsos, Bəhram Ğasımi təkidış karde ki məntəğə milləton iyən dıvləton bə dışmətəti və coəti eğande xoto hiç vaxt bə təcavuzkorə xarıci kişvəron sui-istifodə karde icozə nibədoən, votışe: məntəğə oğoə milləton bıən ki Amerkə və sionist rejimi himoyəon zentonədə bıə terroriston məhv kardeşone.
Ğasımi təsdiğış kardə: kırtə zəmonədə məntəğə həmmə kişvəron təsdığ bəkan ki məntəğə əmniyyət və stabiləti bə daxıli, məntəğə və beynəl xalğiyə zərfiyyəton iyən mənbəon əsos mımkun bəbe və xarıci ğıvvon ijən rə-di bə məntəğə tərk kardey məcbur bəben.
İroni xarıci vəzarətxonə sıxənəvot de təkid bə ım ki çok əbi Tramp ıştə prezidentəti dıvrəonədə bə dınyo və Asiya Ğərb məntəğə vəzyəti həmmə tərəfinə əvəz bey ciddiyə diyə bıkə, əlovəş kardə: ım nəzəri vositə tojə dərson omote bəbe.
Amerkə prezident Donald Tramp çoşəmbə şəvi qıləy elan nıbıə səfərədə bə İraği ğərb Ələnbarədə bıə Eynul Əsəd həvoiyə baza varid bıə.
Trampi səfər bə İrağ fəğət bə 3 saət be və əv be ım ki İraği rəsmi şəxson vindemon bıkə ım kişvəri tərkış karde.
Amerkə prezidenti ım 3 saətə səfər bə İrağ, Suriyəku Amerkə hərbion xarıc bey barədə Trampi elanon 1 haftə bəpeştə əncom bəy.
Suriyə dıvləti məhv kardeyədə terroriston 7 sornə cinoyəton be foydə bey bəpeştə Tramp ım ğəroli elanış karde.
Çandə Amerkə hərbi ğıvvon tojədən Suriyəku xarıc bey bəpeştə bə İraği Kırdıston məntəğə varid bıən.
Təhliləkəon Trapmi ım ğəroli Suriyədə Amerkə strateqiaon məğlub bey nışonəş zıneydən.
