Tehron iyən İroni muxtəlifə şəhronədə bə noəmni, be ğanunə hərəkəton iyən iğtişoşi ələyh aksiyaon dəvoniye.
Zinə və cımə nımoji bəpeşt, Tehron iyən İslamiyə İroni muxtəlifə şəhronədə, muxtəlifə milləton iyən nımoj votəyon, bə noəmni, be ğanunə hərəkəton iyən iğtişoşi ələyh aksiya bərpoşon karde.
Qılə holədə ki kali çı İroni millət, şahrvand Xanım Məhsa Əmini marqiku vey norohətin və çı təhğiğon nəticə intizorədən, dəvardə rujonədə bıə bəzi şəhron əcumlə Tehronədə etırazon bə umumi vırəon zərəl-ziyon varidış karde.
Zinə şəv həm, Tehron iyən İroni çand qılə şəhronədə, bə Xanım Məhsa Əmini marqi bəhonə xoto, iğtişoşçion bə umumi iyən xususi təsisaton və əmniyyəti mudafiə kardə kəson həmləşon karde.
Im həmləonədə, de iğtişoşçion vositə bə İmdod, ambulanson və vəşokıştə maşinon həm zərəl-ziyon varid bıə. jəqo ki tosə bə ısət səhiyyə iyən imdodiyə məmuronku çand nəfər zəxmin iyən noxəşxonəonədə oloxtoniyəşone və 61 qılə ambulans həm xərob be.
Bə Tehroni şəhrdor, Əlirıza Zakani votəyon əsos, dəvardə rujonədə və de etırozi bəhonə, 23 qılə vəşokıştə maşinon qırd zərəl vindəşone iyən 43 qılə avtubos iyən 54 qılə mandəco həm təxrib bıən.
Həmçınin polisi məmuronku çand nəfər ki umumiyə vırəon vılo kardey vəy qəte holədə bin, de iğtişoşqəron vositə, şəhid bıən.
Əmmo de ım xərobkaranə hərəkəton ki de deşmənə mediyaon cəhdi iyən iğtişoşçionku kali şəxson və bə umumiyə fikon təhrikiro əncom bıə, zinə İroni həmmə vırəonədə oroməti bərğəror be.
Həminə cəhətədə və cımə nımoji bəpeşt, Tehron iyən İslamiyə İroni muxtəlifə şəhronədə, muxtəlifə milləton iyən nımoj votəyon, bə noəmni, be ğanunə hərəkəton iyən iğtişoşi ələyh aksiya bərpo kardeşone.
Bə İsna raporti əsos, aksiyaəkəyon de şuaron vanq kardey, noəmni, iğtişoş iyən be ğanunə hərəkəton mnəhkumışon kardə.
Im aksiya oxoədə, fitnə icodəkəyon, bə dini muğəddəsə çiyon be ehtıromətion və be ğanunə hərəkəton məhkumiyətədə, İroni milləti yolə aksiya oxonə ğətnomə ya bəyoniyə handeşone.
