Əmirəbdullahiyan: Ermənistoni əmniyyəti bənə ıştə əmniyyəti zıneydəmon.

İron İslam Respublika xarıci vəzir, bə Tehron iyən İrəvani miyono 2 tərəfiyə həmkoətion zərrurəti təkidış karde iyən votışe: İron çı Ermənistoni əmniyyəti bənə ıştə əmniyyət zıneydə.

Zinə cımə rujədə, Ermənistoni Ğapan şəhrədə və de İron İslam Respublika xarıci vəzir, Huseyn Əmirəbdullahiyan iyən Erməniston Respublika xarıci vəzir, Ararat Mirzoyani iştiroki, İron İslam Respublika sərkunsol rəsmi surəti oj bıə.

Bə İrna raporti əsos, Ermənistoni Ğapan şəhrədə İron İslam Respublika sərkunsoli oj bey mərosimədə İron İslam Respublika xarıci vəzir, Huseyn Əmirəbdullahiyan bə Ermənistoni əmniyyəti əhəmmiyəti təkid kardışe və votışe: çəmə siyasət bə ərzi təmamiyyət iyən hakımiyəti ehtıron noeye və İrəvanədə bıə İroni səforətxonədə koəkəyon cəhd kardedən 2 qılə kişvəri iğtisodi həmkoətion, əlovə peydo bıko.

Əmirəbdullahiyan ijən əlovəş karde: Siyonik ostan çı şimoliku bə cənub karidoriro vey muhimmə məntəğəy və əmə Ermənistoni çı şimol-cənubi vey muhimmə tranzitə roonku qıləyni zıneydəmon ijən ım roy zumandəti və çəy inkişof ijən mısofiron və kamazon şe-ome vey rə əncom doeyro de Ermənistoni həmkoətion əncom bədomone.

Im mərosimədə Erməniston Respublika xarıci vəzir, Ararat Mirzoyan həm bə İroni heyəti səfəri xoş omey votışe iyən əlovəş karde: Erməniston hozzoe ki Təbrizədə ıştə sərkunsoli oj bıko iyən votışe: İron həmişə çı Ermənistoni şərik be iyən bəmande və siyasi, iğtisodi, enerji və nəğliyot baxşədə həmkoətion əcom dodə, umidımon heste de Ğapan şəhrədə İroni sərkunsoli oj bey vositə dəvardə zəmoniku vey bə ım həmkoətion əlovə bıbun və bois bıbu ki İron və Ermənistoni milləton miyono veyə rabitəon, 2 qılə dustə kişvəri əloğəon qam iyən bə məntəğə əmniyyəti komək bıbu.

Ermənistoni xarıci vəzir həmçınin Ğapanədə bıə İron İslam Respublika sərkunsoli oj bey təbrikış votışe iyən təkidış karde: bə şımə xatircəməti dodəmon ki de Ermənistoni xarıci vəzarətxonə koməki vositə şımə məmuriyətiku himoyədorəti bəbe.