Ermənistoni iminnə vəzir, məntəğədə bə İroni vey muhimmə roli təkidış karde.

Nikol Paşiniyan, məntəğə iyən beynəlxalğədə İroni vey muhimmə roləkə elanış kardə.

Noyabrə manqi 1 minnə rujədə, Ermənistoni iminnə vəzir, Nikol Paşiniyan de yolə heyəti bə ico ki siyasi və iğtisodi rəsmi şəxsonku şomil be, bə İron İslam Respublika prezident, Ayətullah Sed İbreym Rəyisi dəvəti əsos bə Tehron səfərış kardə be.

Rəyisi de işorə bə 2 qılə kişvəri miyono ticari rabitəon 43 faiz əlovə bey, İron-Ermənistoni mıbodiləon əlovə beyro və bə 3 milyard dollar rəseyro bə cəhdon dəvomi təkidış karde. iğtisodi, ticari və siyasi baxşonədə rabitəon hevujətiro, İron və Ermənistoni cəhdon dəvomış heste.

Bə İrna aqentiyəti raporti əsos, Ermənistoni iminnə vəzir, Nikol Paşiniyan bə məntəğə və beynəlxalğə məsələonədə muhimmə rolon təkidış karde iyən bə Tehron-İrəvani nığıləti və bə inkişof rəsey zərurəti təkidış karde.

Paşiniyan ıştə msohibədə de Ermənistoni dıvləti televeziya kanali bə Tehronədə bıə "Qaz bə Ruşna əvəzi" nomo bıə təvafuğnomə dıroz kardey imzo işorə iyən əlovəş karde: Erməniston de İron-Ermənistoni ruşnə ovoştoniye 3 minnə xətti komil kardey vositə, İroniku veyə qaz seydə.

Ermənistoni iminnə vəzir, ım məsələ ki Tehron-İrəvani hevujə rabitəon bə Erməniston-Rusiyə rabitəon mənfiyə təsir icod ko, botil zıneydə və təsdiğış karde: İroniku qaz qətey iyən Ermənistoniro ruşna icod kardey de Rusiyə mənafe əksətiş ni.

İroniku Ermənistoni qazi varid bey mığdori 100 faiz əlovə beyro, İron və Tehron təvafuğışon kardə. ruşna əvəzi,İron ıştə qazi ixrac kardedə, bə həminə əncom bıə təvatuğon əsos, tosə 2030 minnə sori zəmonədə, İroni qaz bə Erməniston 2 bərobər əlovə bəbe.