İroni sərprokuror: bə Azərbaycan Respublika səforətxonə həmlə de 2tərəfi həmkoəti həl bey holədəy
İroni sərprokuror votışe: ım hodisə həmonə iminnə ləzzəku ciddi surəti çəmə tərəfo təğib bıə və ısət həm de diplomatik fəaliyəton və 2tərəfi həmkoəti bə tojə mərhələ rəseydə.
Bə İrna raporti əsos, İroni sərprokoror Huccətull Islom Muhəmməd Cəfər Montəzeri ımruj bə Azərbaycan Respublika sərprokoror Kamran Əliyev zanqış karde və bə İronədə bıə Azərbaycan Respublika səforətxonə silohinə həmlə detali barədə suhbət kardışe.
Huccətull Islom Muhəmməd Cəfər Montəzeri votışe: ım hodisə məhkəmə və siyasi cəhəto təğib kardedəmon iyən çəy detalon de həmkoətion bənav şedə ta həl bıbu.
İroni sərprokoror bə 2 qılə dustə kişvəri əloğəon inkişofi işorəş kardə və votışe: bənə həmişə, İron və Azərbaycan Respublika məhkəmə və dıvləton miyono əloğəon 2 qılə milləti miyono həmkoəti və dustiyə nığıləti bois bəbe.
Kamran Əliyev həm çı İroni cəhd və tədğiğonku ğədrdonətiş karde iyən votışe: jıqonə hodisəon bəpe 2 qılə kişvəri miyono həmkoəti və 2 tərəfi əloğəonədə problem ığande icozə bəpe doə nıbu.
Yanvari 27 qıləy silohinə şəxs de ailəvi problemon bə Tehronədə bıə Azərbaycan Respublika səforətxonə həmləş karde ki ın səforətxonədə bıə məmuron i nəfəri kıştə və 2 nəfəri zəxmin bey bois bıə.
