Be siloh karde konfransədə Əmirəbdullahiyan: atomiyə sazışi ısətnə vəziyət, Amerkə xəto iyən sue hisob kitobi siyasəti nəticəy
İroni xarıci vəzir votışe: atomiyə sazışi ısətnə vəziyət, Amerkə dıvləti xəto iyən sue hisob kitobi siyasəti nəticəy.
Bə İrna raporti əsos, zinə Seşəmbə rujədə, isveçrəli Cenevrədə İ Bıə Milləton Təşkiloti be siloh karde konfransədə, İroni xarıci vəzir Huseyn Əmirəbdullahiyan əlovəş karde: atomiyə sazışədə baği mandə məhdudə məsələon hoston surəti təğb bəbe.
Əmirəbdullahiyan ijən votışe: de tərəfon irodə və çokə niyyəton vositə və be har curnə şərton votımonon ki əncom bıə, atomiyə sazışi məsələ həl bıbu və karde bəzne uzvon tərəfo oxonə qəm peqətə bıbu.
İroni xarıci vəzir ijən bəyonış karde: ko dəvomiro və tosə bə oxonə təvafuğon rəseyro İron İslom Respublika hozzoe, əv ijən təsdiğış karde: dıroz mıddətə muzakirəon əncom doeyro bəpe Amerkə irodəş bıbu ki muzakirəon cəm bıko.
Əmirəbdullahiyan həmçınin elanış kardə ki İron İslom Respublika Ukrayna canqi sə bey pidəşe və təkidış karde: İron bənə itərəfiyə sanksiyaon və təhdid iyən canqi ğıboni, kişvəron ərzi təmamiyyət, bə İ Bıə Milləton prinsipon və beynəlxalğə həxon ehtırom noey və beynəlxalğə rabitəonədə zu ya təhdidiku istifodə nıkardey tələbış kardedə.
İroni xarıci vəzir əlovəş karde: bə be siloh kardey strukturi hakim bıə vəziyəti əlovə bey vəy qətey xoto, beynəlxalğə ictima cunstroktivə votımonon lozime və be siloh konfrans karde bəzne bənə coyli çand tərəfiyə be silohə muzakirəon təşkilot təsirin surət bə beynəlxalğə əmniyyət və sulh komək bıko.
