Əmirəbdullahiyan: İron və İraği rabitəon ozavziye, bə 2 qılə kişvər iyən bə məntəğə mənafe əsose
İroni xarıci vəzir de təkid bə İron və İraği nez, nığıl və bıvə rabitəon, həmmə baxşonədə 2 qılə kivşəri rabitəon ozavziyə və hevujətioku ıştə şoəti nışoş do və ım rabitə bə 2 qılə kişvər və həmmə məntəğə mənafe əsos zınəşe.
Bə Fars aqentiyəti raporti əsos, zinə Pencşəmbə rujədə Cenevrədə " Fələstini işğol bıə sərzəminonədə insoni həxon vəziyət, beynəlxalğə humanitarə həxon və bəşər həxon qlobal eloniyə" iclosi kənoədə, İroni xarıci vəzir Huseyn Əmirəbdullahiyan de İraği Kırdıstoni məntəğə daxıli vəzir Riber Əhməd Xaledi vindemonədə 2 qılə kişvəri miyono əmniyyəti sazışi komilə icro beyro İraği irodəku ğədrdonətiş kardə və bə 2 qılə milləti mənafe əsos, İron və İraği mıştərəkə marzon bə ticori, iğtisodi və ozavziyə rovnəğinə marzon əvəz bıey təkidış kardə.
İroni xarıci vəzir ijən əmniyyəti mıştərəkə sazışon icro bıeyədə, İraği devlət və ım kişvəri Kırdıstoni məntəğə səmtiku əncom bıə hərəkətonku ıştə rizoyəti elanış kardə və mıştərəkə marzon əmniyyəti komil qarantiya kardey cəhətədə komil surət çəy icro bıey tələbış kardə.
Im vindemonədə həm İraği Kırdıstoni məntəğə daxıli vəzir Riber Əhməd, İron və İraği rabitəon mislış nıbıə rabitə zınəşe və de işorə bə 2 qılə kişvəri miyono imzo bıə əmniyyəti sazışon, komil surət çəy icra bıeyədə bə Kırdıstoni məntəğə irodə təkidış kardə və votışe: marzon əmniyyət çəmə iminnə və muhimmə koonkue və kali dəvardə əmniyyəti problemon hiç vaxt bə mıştərəkə marzon nibərəse.
