İmom Həsən(ə)-i şəhodətə ruji məxsus bərnomə.

İmom Həsən(ə) Əhli-Beyt(ə)-i Kərimiku sıvol be: Kərəm çiçe? Hamyeşone: ”tələbi bənav baxşeşi bino kardey iyən zərurət iyən ğəhəti zəmonədə itam kardeye”. sıvol be: exrocəti çiçe? hamyeşone: ”qədə vinde iyən kami həm nıdəvarde”

İmom Həsən Mujtəba (ə) çı İmom Əli(ə)-I de islomi əziz-qramiyə(s) əzizə kinə  mıborəkə vəyə iminə səmərə be ki, Hicrəti seminə sori Ramazonə manqi nimədə Mədinə şəhrədə bə dınyo çəşış oj karde və deştə omey vositə bə məxloği həmməysə çokə kə şoyvonətiş varde.

İmom Həsən(ə) haft sor ıştə buzurquvarə cəddi jimonış dərkış kardə və çə həzrəti mehribonə ağuşədə yol be. Xatəmun-Nəbiyy(s) ıştə fərzənd İmom Həsən(ə)-I çı mısılmınon miyono bıə fəzilət iyən imtiyozon təblığ kardedəbe və çəy de nıbuvvəti məğami rabitə iyən bəy bıə məhəbbətiku həmmə vırədə sıxan votedəbe və hamyedəbe ki, Həsən qıləy xoşə bu doə vıle ki,mı dınyoədə çıniyəme.

Iruj İmom Həsən(ə)-iku tələbışon karde ki,çı peyğombər(s)-i çokə əxloği həxədə qıləy sıxan bıvoto.ə həzrəti hamyeşeş:”hakəs peyğombər(s)-i palu bo qıləy ehtiyociro şedəbe,çə həmonə odəmi hacəti rədd kardedə nıbe və  çanədə zuş vışkiyedəbe bo milləti ehtiyocon bərtərəf kardero  cəhd kardedəbe”.

Peyğombər(s) rehləti bəpeştə İmom Həsən(ə) ıştə əzizə pı tərbiyə jiyədə yol be və çı zuhd, təğva, kəmol, şucoət, ıştə coniku dəvarde iyən ədəbi usvə be.Əmirəl-Muminin Əli(ə)-I xilofəti zəmonədə əv hejo bəştə əzizə pı komək kardedəbe və bə həzrəti ədoləti bərpo kardey koyədə dastək doydəbe.əv nəin ki,bənə qıləy fərzəndi,bəlkəm həyğətədə bənə qıləy şucoətinə sərbozi hejo hozzı be və onoqniyə holədə  ıştə alicənobə pı palu sanqin iyən saxtə koon bə vırə rosnedəbe.ə həzrət bənə Cəməl,Siffeyn iyən Nəhrivan canqonədə de  şucoət,rəşodət iyən  ıştə coniku dəvardey dərsış bə dınyo omutışe və nışonış doe ki,dini mıdofiyə royədə ıştə dasto omə har koyış əncom doe.

İmom Həsən(ə) elmi sahədə ıştə rujqori həmməysə barzə şəxs be.ilahi cəmyəti maarif iyən Ğıroni əslə təlimonış kəsb kardəbe və həmməkəs çə həzrəti hevujə elm iyən nığılə bəsirətiku bəhrə bardedəbin.ə həzrət vey təvazukor be və çəy ın fərə əxloğ bə milləti bəçəy tərəf cəb bıey boyis bedəbe.

İmom Həsən Mujtəba(ə) –i ağılmandə rəftor iyən fəaliyyəton de səbr iyən mığoviməti bə ico be və çə həzrəti bə yolə dıli malik bıey çə hzərəti xos iyən mələkutiyə xıslətonku bə hisob omeydəbe.