531-ə hissə-Məryəmi surə-61-65 şərifə ayəon

531-ə hissə

جَنَّاتِ عَدْنٍ الَّتِي وَعَدَ الرَّحْمَنُ عِبَادَهُ بِالْغَيْبِ إِنَّهُ كَانَ وَعْدُهُ مَأْتِيّاً (61) 

Əbədiyə vəhışton ki, Rəhmonə Xıdo çı ğeybiku bəştə bandəon və`dəş doə. şəkk ni çəy və`də bə həyğət bərəsə.

لَا يَسْمَعُونَ فِيهَا لَغْواً إِلَّا سَلَاماً وَلَهُمْ رِزْقُهُمْ فِيهَا بُكْرَةً وَعَشِيّاً (62) 

Əyo bihudə sıxan nibəməseyn. (və çəvon sıxan)ğərəz səlomi(co çi ni) və əyo har sıb və şəv çəvon ruzi hozzıe.

تِلْكَ الْجَنَّةُ الَّتِي نُورِثُ مِنْ عِبَادِنَا مَن كَانَ تَقِيّاً (63) 

Im həmonə vəhışte ki, bəştə ha pərhizkorə bandə bə irs bədomon.

In ayəon vəhışti vəsf kardedə iyən çəy kali xısusiyyəton bəyon kardedə.min cumlə ımbe ki, vəhışt əbədi iyən dayimiye və hakəs bə vəhışt varid bıbu,çəyu xaric nibəbe. ım həmonə Xıdo və`də doə ğeybiyə vəhışte ki,mominon bəy imonışon vardə iyən ımruj  əy mışohidə kardedən və dərk kardedən.

Dınyoədə çı mominon əziyyətonku qıləyni,norəvo iyən bihudə sıxanon məseye ki, ım məxsusən çı kofiron iyən dini mıxolifon tərəfiyo bedə.əmmo vəhıştədə ğərəz dustəti, məhəbbət iyən səlomi co çi nibəməseyn və əyo hejo ilahi rızğo-ruzi cariye.

Çın baxşi oxo bə dıqlə nuktə işorə kardedə və hamyedə:qıləyni ıme ki,bə vəhışti varid bıey kilid təğvay  və pərhizkorəti nıbə iyən çı yavə koonku bə diyəro nımandey, bə vəhışt varid bıey əbıni.co qıləyni ıme inson deştə dınyoədə kardə koon, bə jıqo yolə mıkofoti loyığ  vindey bedəni.liza votey bəbe ki,Xıdovənd bə pokon iyən çokə şəxson əto kardedə,bənə qıləy irsiye ki,dədəon boştə fərzəndon baği oqəteydən və əvon hiç qıləy zəhmət nıkəşə holədə çəyku bəhrə bardedən.

Çın ayəonku umutedəmon:

1-vəhışti həyğət çəməku məxfiye və əv çı ğeybiyə koonkue.əmmo vəhışt qıləy və`dəy ki, əmə bəy imonımon  vardə ta ğıyoməti ruji de Xıdo lutfi əy dərk bəkamon.

2-ehanə dılımon heste bə vəhışt varid bıbəmon,səykəmon dınyoədə bə bihudə sıxan votə bıə məclison daxil məbəmon.

3-vəhışt çı pərhizkoron mirose,harçənd çı dınyəviyə mirosonku foydə həm nıbon.

وَمَا نَتَنَزَّلُ إِلَّا بِأَمْرِ رَبِّكَ لَهُ مَا بَيْنَ أَيْدِينَا وَمَا خَلْفَنَا وَمَا بَيْنَ ذَلِكَ وَمَا كَانَ رَبُّكَ نَسِيّاً (64)‏

Əmə(firiştəon) fəğət deştı pərvərdıqori əmri nozil bedəmon.çəmə peştono iyən çəmə vədə bıə çiyon iyən çımon miyono ğərol qətə çiyon bəy məxsuse və ıştı pərvərdıqor hiçfaxti yodo bekardedəni.

Bə mıfəssıron nəğl kardə rəvoyəti əsos,qıləy kırtə mıddətədə bə peyğombər(s)-i vəhy nozil nıbe  və ım ko bə islomi peyğombəri(s) niqəronçəti iyən bə mıxolifon tanə jıey boyis be.tainki,ın ayə nozil be və bə Xıdo Rəsuli(s)-i xatırcəmətiş doe ki, Xıdovəndi əvış çı yodo bekardəşni.Xıdovənd hiçfaxti çı yodo bekardedəni və çı məlayikon, məxsusən çı vəhyi firiştə nozil bıey, bə ilahi hikmət və tədbiri əsose. qıləy Xıdo ki, çı dəvardə,ısət iyən vəoməyku xəbəş heste və harçi çəy hakimiyyəti və səltənəti jiyədəy.

Çın ayəku umutedəmon:

1-Ğıroni ayəon tədrici surətədə və bə Xıdo əmri əsos iyən mıəyyənə zəmon və məkaonədə nozil bıə və çı peyğombər(s) iyən məlayikon bəvədə hiç qıləy rolışon bıəni.

2-məlayikon bə Xıdo əmron məhzə təslimin iyən ıştəku hiç qıləy ixtiyorışon ni.

3-Xıdovənd hiçfaxti hiççi çı yodo bekardedəni və dəvardə zəmon iyən co amilon, bə Xıdo çı yodo bekardey boyis nibəbe.

رَبُّ السَّمَاوَاتِ وَالْأَرْضِ وَمَا بَيْنَهُمَا فَاعْبُدْهُ وَاصْطَبِرْ لِعِبَادَتِهِ هَلْ تَعْلَمُ لَهُ سَمِيّاً (65) 

Osmonon iyən zəmini və çəvon miyono ğərol qətə çiyon pərvərdıqore.fəğət bəy pərəstışkə və boçəy ibodətiro səbrin bıbu. ayə bo əy qıləy həmto iyən həmnom zıneydəş?

In ayə bə hestemoni-aləmədə bıə mudiriyyət iyən rububiyyətədə bıə tohidi işorə kardedə və hamyedə: qırd hestemoni aləm ısət çı osmonon iyən zəmin bıbu, qıləy vahidə tədbiri jiyədəy və həmməy əvoni ikəsi ofəyəşe iyən ikəs idorə kardedə.bın zəmon hamyedə:ısət ki,jıqoe və bın aləmədə sovə Xıdo co qıləy tədbirəkə Xıdo ni, fəğət boəy bandəçəti bıkəmon iyən cokəson pərəstış kardeyku bə diyəro bımandəmon. təbiiye ki,bın royədə ziyodə mınhərifəkə və mane bıə amilon həm movcude. çən,bəbe Xıdo bandəçəti royədə səbrin bıbəmon iyən ğoym bımandəmon və çı rostə royku mınhərif məbəmon.zira hiçkəs boəy qıləy həmto iyən çəy şə`nədə bıə vucud pəydu kardey nibəzıne.

Bın ayədə çı ibodətiku məğsəd,fəğət nımoj iyən Xıdo zikr kardey ni.zira jıqo ibodət ziyodə saxtəti iyən muşkilatonış ni,bəlkəm çı ibodətiku murad və məğsəd iyo, fərdi iyən iştimayi jimoni qırd koonədə çı Xıdo vədə mutləğə şikilədə təslim bıey iyən fəğət çəy bandə bıeye.boçi ki,inson hejo bə ziddiyyəton dıço bedə iyən çı dıqlə roysədə mandedə. liza bəbe ıştə həxə royədə ğoym bımando iyən istiğomətin bıbu.

Çın ayəku umutedəmon:

1-rububiyyətədə tohid, ubudiyyətədə bıə tohidi mənşəy.liza ibodət fəğət çı i bıə Xıdo mığobilədə cayize.

2-ibodət iyən bandəçəti,de daxiliyə həvəson iyən xariciyə keşməkeşon mıborizə bardeye. çən,bın koyədə səbr iyən poydorəti tələbkəmon.