532-ə hissə-Məryəmi surə-66-70 şərifə ayəon

532-ə hissə

وَيَقُولُ الْإِنسَانُ أَئِذَا مَا مِتُّ لَسَوْفَ أُخْرَجُ حَيّاً (66) 

Və inson voteydə: ayə məxloğ ijən sənibəton bəyji(çı ğəbiku) xaric bəbe?

أَوَلَا يَذْكُرُ الْإِنسَانُ أَنَّا خَلَقْنَاهُ مِن قَبْلُ وَلَمْ يَكُ شَيْئاً (67) 

Ayə inson(ıştə sənibəton bəyji bıey koyədə) şəkk kardedə? (və)bəştə yod vardedəni ki, əmə çımi bənav əvımon ofəyə? qıləy holədə ki, (əv)hiççi nıbe.

Vəynə bərnomədə çı vəhışt iyən vəhışti əhli kali xısusiyyəton barədə bəhs be.ın ayəon məxloği kali insonon çı ğıyoməti barədə bıə şəkk və tərdidiku bəhs kardedə. miadi inkor kardə ziyodə şəxson,boştə bın inkori qıləy dəlil nıvardə holədə əy qıləy ğeyri-mumkinə ko hisob kardedən və voteydən:çokonə mumkine mardə iyən bə tuli oqardə qıləy şəxs,bəyji bəbe ijən sənibəton çı tuli jiku bə bi bebəşe?

Xıdovənde-Aləmi cəvob ıme ki,tı çokonə ıştə dəvardə holı çı yodo bekarde? Iştı bə yode əv tınış hiççiku çoko ofəyəşe? əv ikərə ım koş əncom doə və tınış ofəyəşe,ısət ijən nibəzıne tıni dıminə kərə xəlğkəy?

Təbiiye jıqo sıvolon çın şəxson bə Xıdo benəhoyətə elm iyən ğudrəti imon nıbey iyən əy de bəşəri noğis iyən məhdudə ğudrəti mığoyisə kardey nışon doydə və jıqo koon əncom doey qıləy ğeyri-mumkinə ko hisob kardedən.

Çın ayəonku umutedəmon:

1-insoni ijən sənibəton xəlğ kardey,bəsə iminə kərə xılğətisə vey hostone,harçənd ım ko çı miadi inkor kardə kəson nəzəku qıləy ğeyri-mumkin hisob həm bıbu.

2-miad cismoniye və çı munkiron ziyodə şubhəon,çı insoni ijən sənibıton bəyi bıey barədəy. ehanə miad ruhi bıəbe,çım şubhəonku kam bəhs əbi.

فَوَرَبِّكَ لَنَحْشُرَنَّهُمْ وَالشَّيَاطِينَ ثُمَّ لَنُحْضِرَنَّهُمْ حَوْلَ جَهَنَّمَ جِثِيّاً (68) 

Çən, bəştı pərvərdıqori ğəssəm ki,əmə qırd əvoni de şəytonon məhşur bəkamon. peşo əvoni bə zonısə nıştovnə holədə cəhəndımi qırdo-qırdi hozzı bəkamon.

Təbiiye miadi inkor kardə kəson Xıdo həm inkor kardedən və umumən fərz kardey əbıni ki, Xıdo ğəbul kardə kəs,miadi ğəbul nıkəy.çən,miadi təkzib kardə kəson, dinışon nıbə və ilahi sərostə royku mınhərif bıə fərdonin.əvon çı zəlolət iyən həlokəti batlağədən və ım fərdon ğıyoməti ruji bəştə kufr iyən inkori xoto,çəvonku sıvol-cəvob bəbe və çəvon bə həxı ələyh beşe,bəçəvon inodkorəti xoto bıey isbot bıbu, əvon bə cəhəndım şodey bəbe və əyo əvon bəştə cəzoon bərəseyn.əmmo çəvon ım inkor kardey, bəçəvon aqah nıbey iyən cəholəti xoto bıbu,Xıdovənd əvoni əfv bəkay.

In ayə hamyedə: ğıyoməti ruji kofiron de şəytonon(ısət çı cın bıbu ya inson) bə ico məhşur bəbeyn və ım həmnişini dınyodə deəvon bıə bə həmkorəti iyən həmfiki əsos bəbe.

Çın ayəku umutedəmon:

1-Xıdovəndi ğıyoməti barədə doə çəşnaviyon,ciddi bıqətəmon və ıştəni bo jıqo qıləy ruji məhkəmədə huzur pəydu kardey hozzıkəmon.

2-dınyoədə bəştə yoləşəxəti iyən təkəbbırətiro bə dini həyğəton məsxərə kardə kəson, ğıyoməti ruji de cəhəndımi vindey,həni tov vardey əzınin və de zılləti bə ico bəsə zonusə nıştovney bəbeyn.

ثُمَّ لَنَنزِعَنَّ مِن كُلِّ شِيعَةٍ أَيُّهُمْ أَشَدُّ عَلَى الرَّحْمَنِ عِتِيّاً (69) 

Peşo har dastəku bə Rəhmonə(Xıdo) vey hişkəqiyəti kardə(tabe nıbə)kəson co bəkamon.

ثُمَّ لَنَحْنُ أَعْلَمُ بِالَّذِينَ هُمْ أَوْلَى بِهَا صِلِيّاً (70) 

Bə zəmon əmə zıneydəmon çəvon kon qılə bo cəhəndımədə sutey vey loyığin.

Navnə ayəon dəvomədə ki,qırd kofiron ğıyoməti ruji məhkəmədə hozzı bəbeyn,ın ayəon hamyedə: joqo ni ki,qırd cəhəndımi əhl iqlə təbəğə və vırədən,bəlkəm ilahi ədolət tələb kardedə ki,hakəs bəştə qıno miğdori əsos,cəzo bəvinde.liza qınokoron bə təbəğə əsos çı yəndeyku co bəbeyn və bə veyə tuğyonkorəti iyən hizoperoməti kardə şəxson ziyodə əzob doey bəbe.

Ğasbu votey bəbe:qınokoron seqlə dastən.iqlə dastə şəxsən qıno əncom doydən. iqlə hissə həm co kəson əvoni bə qıno tərəf dəvət kardedən və çı qıno əbzoron çəvon ixtiyorədə ğərol doydən.seminə qrup əvonin ki,bə cokəson qıno iyən xilofə ko rozin. bədihiye ki,çın seqlə qınokorə dastə cəzo həm fərğ kardedə.

Çın ayəonku umutedəmon:

1-Xıdovənd çı rəhmət iyən məhəbbəti sərçeşməy.əmmo bəşər çəy rizoyəti cəlb kardey əvəzi, bəçəy ələyh beşedə iyən əy ğəzəbin kardedə.

2-cəhəndımi təbəğəonış heste və bə qıno zəyif iyən şiddəti əsos,çı əzobi mizon və şiddət həm fərğ kardedə.ilahi noməhdudə elm mıəyyən kardedə ki,kom şəxs kom qılə mərtəbədə ğərol qətənine.