536-ə hissə-Məryəmi surə-87-92 şərifə ayəon

536-ə hissə

لَا يَمْلِكُونَ الشَّفَاعَةَ إِلَّا مَنِ اتَّخَذَ عِندَ الرَّحْمَنِ عَهْداً (87) 

(Həmonə ruji)  Ğərəz de Rəhmonə Xıdo əhd(sıə) bastə kəson,əvon çı şəfoəti soyb nin.

Dəvardə bərnomədə votemone ki,mışrikon itərəfiyo deştə mol iyən sərvəti fəxr kardedəbin və co tərəfiku joqo bəştə xiyoliyə məbudon dılışon dəvastəbe ki,bə çəvon har şərayitədə bəvon koməq kardey bovəşon hestebe.

In ayə hamyedə:ğıyoməti ruji həmonə xiyoliyə məbudon bə mışrikon şəfoət doey ğadir nin və əvoni çı cəhəndımi otəşiku xilos kardey nibəzıneyn.bəlkəm,bənə peyğombər və imomon bıə Xıdo ovliyaon fəğət b cokəson şəfoət doey bəzıneyn. zira çəvon bın ko çı Xıdo tərəfiku iznışon hestebe.

Umumən ğıyoməti ruji şərayit iyən ğanunonış heste.nə bə hakəsi şəfoət doey bəbe və nə hakəs şəfoət doey bəzıne.bəlkəm,mominə inson əğedə iyən əməli usulış dırıst iyən səhih bıə,əmmo bə kali qınoon və xətoon mırtəkib bıə qınokoron şəfoət bəkayn. əvon bə ilahi ovliyaon təvəsssul bəkayn və mumkine bın zəmon bəvon şəfoət bıbu. həlbəttə çəvon əfv bıey bə çın koyku bə şıkrəy ki,Xıdovənd çanəndə bə şəfoətəkəyon çı şəfoəti icozə bıdo.

Binobərin dınyoədə hiçkəs umudəvo nıbu ki,ğıyoməti ruji şəfoət bəy nəsib bəbe. əve ısə çanəndə bıpyişe qıno bıkəy.zira məlum ni bə kom şəxs çanəndə ğıyoməti ruji bəy şəfoət bəkayn.

Çın ayəku umutedəmon:

1-şəfoət çı Xıdovəndi ixtiyorədəy və bə hakəsi çanəndə səlohiyyətış bıbu anəndə həm əto bəkayn.

2-ilahi ovliyaon de Xıdo izni,bə cokəson şəfoət doey ğadirin və ım Xıdovəndi bəştə bandəon bıə rəhmət iyən lutfi cilvəonkue.

وَقَالُوا اتَّخَذَ الرَّحْمَنُ وَلَداً(88) 

Və(kofiron) voteşone: Rəhmonə Xıdo(boştə) qıləy fərzəndış peqətə.

لَقَدْ جِئْتُمْ شَيْئاً إِدّاً (89) 

Bərosti əvon vey yavə sıxanışon vote.

Çı mışrikon əğayidonku qıləyni bo Xıdo fərzənd ğərol doey be.çoko ki,çəvon əksər etığodışon hestebe məlayikon çı Xıdovəndi kinonin.vey əcib ıme ki,islomiku bənav bıə dinonədə həm ım inhirofiyə əğedə rəvocış pəydu kardəbe və bə Kərimə-Ğıroni ayəon əsos yəhudiyon Uzeyr(ə)-i Xıdo fərzənd zıneydəbin.məsihiyon həm həzrəte İsa-Məsih(ə)-i Xıdo zoə zıneydəbin və ım bə navnə dinon təhrif bıey dəlilonku qıləyniye.

Kərimə-Ğıron de ğətiyyəti çın inhirofiyə əğedə vədə mandedə və hamyedə:jıqo qıləy norəvoə nisbət vey bevəce ki,əvon əy bə Xıdo nisbət doydən və əy bəştə zıvon cari kardedən.

Çın ayəonku umutedəmon:

1-hakəsi bə Xıdo fərzəndi nisbəti doey,qıləy norəvo və yavə behtone,harçənd həmonə şəxs ilahi ovliyaonku həm bıbu.zira Xalıği de məxloği rabitə bənə pı deştə fərzəndi rabitə ni.

2-bo Xıdo harcurnə fərzənd ğayil bıey etığod,həyğətədə bə Xıdo şırk kardeye və çı tohidi royku xaric bıeye.

تَكَادُ السَّمَاوَاتُ يَتَفَطَّرْنَ مِنْهُ وَتَنشَقُّ الْأَرْضُ وَتَخِرُّ الْجِبَالُ هَدّاً (90) 

Kam mandəbe bə ım sıxani xoto, osmonon volo bıbu və zəmin poə bıbu və bandon de şiddəti bırıjon.

أَن دَعَوْا لِلرَّحْمَنِ وَلَداً (91) 

Zira bo Rəhmonə Xıdo qıləy fərzənd ğayil bin.

وَمَا يَنبَغِي لِلرَّحْمَنِ أَن يَتَّخِذَ وَلَداً (92) 

Qıləy holədə ki, bə Rəhmonə Xıdo ovlad peqətey damedəni.

Çun hestemoni aləm bə tohidi əsos bina bıə və bə Xıdo fərzəndi soyb bıey nisbəti doey ki, qıləy norəvoə nisbəte,de tohidi əğıdə i omeydəni.liza ın ayəon hamyedə: jıqo bızın osmon iyən zəmin bə ım şırk aludə əğıdə xoto,kam mandə bırıjo.

De qıləy co bəyoni bə Xıdo şırk kardey anəndə dıjde ki,osmon iyən zəmin həm bəy tov vardey zıneydəni.əmmo şımə mışrikə insonon bə jıqo mırdolə qınon mırtəkib bıdon və jıqo qıləy sıxan bəştə zıvon cari kardedon.qıləy holədə ki,umumən bo Xıdo fərzəndi soyb bıey kəmol ni,bəlkəm çı Xıdo məğami beji vardey iyən qıləy noğisə məğame ki, Xıdovənd ıştə bandəonku qıləyni boştə fərzənd bıvıjno.

Çın ayəonku umutedəmon:

1-qınoon əncom doey, bə hestemoni soxtemoni volo bıey boyis bəbe,harçənd Xıdovənd bəy mane həm bıbu.çoko ki,bə co ayəon əsos ehanə Kərimə-Ğıron bə bandi nozil bıəbe, çı Xıdo xəşiyyət və tarsiku vırto-volo əbin.

2-şırk hestemoni aləmədə vey təhlukəninə fəsode ki,beconə təbyət həm çəy mığobilədə reaksiya nışon doydə.

3-fərzəndi soyb bıey şərt,jimoni həmro vucude.əmmo hiçkəs çı Xıdo həmto ni iyən bənə əy ni ta çəy jen-əğılış bıbu.