538-ə hissə-Taha surə-1-6 şərifə ayəon

538-ə hissə

De Xıdovənde-Xalıği lutfi “Məryəmi “mıborəkə surə vəynə proqramonədə bə oxo rosnemone və bın bərnomədə Taha mıborəkə surə bino kardedəmon ki, çı Kərimə-Ğıroni vistminə surəy.sıftədə bə çın surə i iyən dıminə ayəon quş doydəmon:

بسم الله الرحمن الرحيم

طه (1) 

Taha.

مَا أَنزَلْنَا عَلَيْكَ الْقُرْآنَ لِتَشْقَى (2) 

Əmə Ğıronro bətı nozil nıkardemone ki,tı bə zəhmət eqınoş.

Im surə min cumlə çə surəonkue ki,de muğəttəə hərfon bino bedə.bənə Bəğərə surə ki, de “ə.l.m”-mi bino bıə.

Çoko ki, çımi bənav votemone ım hərfon,çı Kərimə-Ğıroni rəmzonkue ki,hafaxti Xıdovənd irodəkəy,çəy sırron bo bəşəri oşko bəbe.bə zəmon çı Ğıroni əzəmət iyən ecazi cəhəton ziyod ruşin bəbe.kali rəvoyətonədə həm bə ın hərfon bəzi qılə işorə bıə.

Im surə de muğəttəə hərfon yəni de Taha bino bıə və həmonə nom həm bın surə noey bıə. çoko ki,rəvoyətonədə omə,”Taha”çı Peyğombəre-Əkrəmi(s) rəmziyə nomonku qıləyniye.liza peşonə ayə de bə ə həzrəti xitobi bino bıə.jıqo bızın Xıdovənd “ya Muhəmməd” votey əvəzi,hamyəşe:”Taha”!

Peşonə ayə hamyedə:Kərimə-Ğıronro bətı nozil nıkardemone ki,tı ıştəni bə əziyyət eğandoş. (çı Ğıroni tilovət ya ğıroət bıbu ya çəy təblıği royədə) .çoko ki, rəvoyətonədə omə,peyğombər(s) anəndə bəşəvnəy nımoj əhandi və Ğıron tilovət əkəy ki, çəy lınqon əpandomi və ə həzrət bə zəhmət eəqıni.həmçinin ilahi ayəon ibloğ və rosney royədə,joqo məxloği de eşğ və dıləsutəti də`vət əkəy və ıştəni bə zəhmət eəğandi ki,Xıdovənde-Aləm bın ayədə iyən kali co ayəonədə bə ə həzrəti xitob kardedə və hamyedə:boçi ıştəni jıqo bə zəhmət eğandedəş?

Çın ayəonku umutedəmon:

1-Xıdovəndi piyəşni ki,çəy bandəon ıştə dini vəzifəon bə vırə rosneyədə bə zəhmət eqınon.

2-Kərimə-Ğıron bo məxloği iyən çəvon koon bə zəhmət eğandeyro nozil bıəni. bəlkəm, hakəs ıştə zu və ğudrəti əndozədə məsuliyətış heste,nəinki,çəysə vey.

إِلَّا تَذْكِرَةً لِّمَن يَخْشَى (3) 

Əmə fəğət əvımon bo(Xıdoku) tarsə kəson qıləy pand və təzəkkur(vığandemone).

تَنزِيلاً مِّمَّنْ خَلَقَ الْأَرْضَ وَالسَّمَاوَاتِ الْعُلَى (4) 

Əv çı zəmin iyən bılındə osmonon xəlğəkə kəsi tərəfiku nozil bıə.

Navnə ayə bə peyğombəre-əkrəmi(s) xitob kardedə və hamyedə:din iyən Ğıroni təbliği koonədə ıştəni vey bə zəhmət eməğand.zira fəğət ə şəxson norohətinki,bə nopokəti giriftor bıən və bəvon təzəkkur doə bın ayəonədə bıə çiyonku ibrət peqəteydən. ımi zikr kardey lozıme ki,çı dini həyğəton kulliyyat çı insonon fitrətonədə bə əmonət noə bıə.bə Xıdo imon həm qıləy fitriyə koe.çən,har qıləy inson əy ıştə vijdonədə pəydu kardedə.liza Kərimə-Ğıroni ayəon həmonə fitriyə həyğəton bə odəmi yod vardedə və əy nəticəş çı dınyo koonədə sə tasponey bıə ğəflətiku ozod kardedə.

Çın ayəonku umutedəmon:

1-inson hejo bə pand və nəsyəti ehtiyocış heste və Kərimə-Ğıron həmməysə çokə pand doə kitobe.

2-dılədə norohətçiyətişon bıə iyən məsuliyyət hiss kardə kəson iyən çı nopokətiyonku bə diyəro bıə kəson,çı Ğıroni ayəonku bəhrə bardedən.

3-Ğıroni noziləkə,hestemoni Aləmi ofəyə həmonə Xıdovənde-Xəllağe.çən,təkvin iyən təşrii, har dıqlə iqlə mərkəziku sərçəşmə peqəteydə.

الرَّحْمَنُ عَلَى الْعَرْشِ اسْتَوَى (5) 

(Əv qıləy əbaxşə Xıdo bıə) Rəhmone ki, bə ərşi musəllət bıə.

لَهُ مَا فِي السَّمَاوَاتِ وَمَا فِي الْأَرْضِ وَمَا بَيْنَهُمَا وَمَا تَحْتَ الثَّرَى (6) 

Osmonon iyən zəmini və çəvon miyono bıə və çı zəmini jiyədə bıə çiyon bəy məxsuse.

Vəynə ayəon Xıdovəndi osmonon iyən zəmini xəlğəkə unvanədə təğdım kardedəbe. ın ayəon çın mətləbi dəvomədə hamyedə:əv nəinki,Xalığe,bəlkəm,həm hakimevə çı hestemoni aləmi koon deçəy dasti tədbir kardeydə(ısət çı oşko iyən məxfi bıbu).

“Ərş”-i kəlmə çı taxti mənoədəy və çun sultanon bo hukumət kardeyro bəsə taxtisə nışteydəbin, ım kəlmə çı ğudrət iyən səltənətiku qıləy kinayəy.ın ayəon çı pərvərdıqore-aləmi bə hestemoni-aləmi bıə komilə təsəllut iyən əhotəku və çəy əmri bə təmom aləmi qırd əczo bıə əmri nufuzi bəyon kardedə.əmmo çun çı xılğəti mənşə iyən ilahi rububiyyət və hukuməti rəhmət bə oxo rəsənin ni,bın ayəonədə Xıdovənd, ıştəni “Rəhmon” təğdım kardedə.

Çın ayəonku umutedəmon:

1-hestemoni aləmi,min cumlə çı insonon tədbir,bə ilahi rəhməti əsose.

2-Xıdovəndi bə hestemoni qırd əczaon bıə təsəllut və sultə,yeksane və həmmə çi çəy mığobilədə muti iyən bəçəy əmri tabeye.