540-ə hissə-Taha surə-13-18 şərifə ayəon

540-ə hissə

وَأَنَا اخْتَرْتُكَ فَاسْتَمِعْ لِمَا يُوحَى (13) 

(Ha Mosə ha!) Az tınım(bə peyğombərəti) vıjneme. çən, bətı vəhy bıə çi quş bıdə.

إِنَّنِي أَنَا اللَّهُ لَا إِلَهَ إِلَّا أَنَا فَاعْبُدْنِي وَأَقِمِ الصَّلَاةَ لِذِكْرِي (14) 

Həyğətən, mı Allah(Xıdom). sovə mı co məbud ni. çən, bəmı bandəçəti bıkə iyən mıni bə yod dənoeyro nımoj bıvot.

Dəvardə proqamədə votemone ki, həzrəte Mosə(ə) çı Mədyəniku bə Misri tərəf hicrət kardeyədə,bə mığəddəsə sərzəmin bıə Tuva vadi rəse və əyo Xıdovənde-Aləm bəy xitobış karde. 

In ayəon bəyon kardedə ki,Xıdovəndi bəy elanış karde ki,tınım bə peyğombərəti məğamım vıjniyə.çımi bədiqə tı bo vəhyi ğəbul kardey hozzı bıbu və əy dılosoxt bıməs və ğəbulkə.sovə i bıə Xıdo co məbudi pərəstış məkə və çı ibodəti həmməysə çokə qılə bıə nımoji bə vırə bıroson ta həmişə mıni bəştə yod biyə.

Deməkə ki, peyğombəron məmurin cokəson bə Xıdo ibodətiro dəvətkəyn,əmmo Xıdovənd sıftədə  bəvon xitob kardedə və sərosnedə ki,qımon nıkəyn çəvon həni bo nımoj vote, Xıdo bandəçəti kardey və co ibodət kardey xoto məsuliiyətışon ni. ım bo qırd dini mıbəlliğon qıləy dərse ki,məxloği bə dini bılındə maarifon dəvət kardey bənav, bəbe sıftədə əvon ıştən bəy əməlkəyn ta əvon bo məxloği ulqu bıbon.

Çın ayəonku umutedəmon:

1-tohid və bə Xıdo yeqanəti mərıfət bıey,çı əğayidi usulon sədə və nımoji bə vırə rosney çı qırd ibodəton sədə ğərolış qətə.

2-çı qırd osmoniyə dinon əməliyə bərnomə və əmr,nımoji ğalibədə hestemoni ofəyə Xıdo pərəstış kardeye.

3-çı nımoiji fəğət ğalib iyən formə vəs kardedəni,bəlkəm çı nımoji ruf Xıdo bə yod dənoye ki, bəy qıləy etıbor iyən erj baxş kardedə.

إِنَّ السَّاعَةَ ءاَتِيَةٌ أَكَادُ أُخْفِيهَا لِتُجْزَى كُلُّ نَفْسٍ بِمَا تَسْعَى (15) 

(Ha Mosə ha!) Şək ni, ğıyoməti ruj bome(bərəse). dılım heste(çəy zəmoni) məxfi oqətom ta bə hakəsi ıştə səy və cəhdi mığobilədə cəzo doey bıbu.

فَلاَ يَصُدَّنَّكَ عَنْهَا مَنْ لاَ يُؤْمِنُ بِهَا وَاتَّبَعَ هَوَاهُ فَتَرْدَى (16) 

Çən, məbodə ğıyoməti inkor kardə iyən bəştə həvaye-həvəsi tabe bıə kəson tıni çə həmonə rujiku nıoqəton ki,(oxoyədə) həlok bəbeyş.

Çı tohid iyən nıbuvvəti əslon bəyoni dəvomədə ki,çı həmmə osmoniyə dinon əsosinə əslonkue, ın ayəon bə qırd ənbiya seminə təlimon rukni işorə kardedə və hamyedə: harçənd ğıyoməti vağe bıey bə hiçkəsi hətta bə peyğombəron həm oşko ni və ğərəz Xıdo hiçki çəy zəmoniku xəbəş ni,əmmo çəy vağe bıey ğətiye və həmmə insonon bə ğıyoməti səhnə varid bəbeyn.çoko ki,hiçkəs zıneydəni keynə bəmarde və qırd insonon ısət çı zumand ya zəyif, oxoyədə iruj bəmardeyn.

Ğıyoməti fəlsəfə həm bın ayəonədə jıqo bəyon bıə ki,Xıdovənd qırd məxloği ğıyoməti məhkəmə vədə hozzı bəkay ta hakəs bəştə əməlon cəzo bırəson.yəni çokə ko soybon bə vəhışt və yavə ko soybon bə cəhəndım varid bəbeyn.zira bə insonon əməlon xoto bəvon doə bıə mıkofot iyən cəzo vırə və zərfiyyətış kifoyət kardedəni. liza ilahi ədolət tələb kardedə ki,dınyo oxoyədə və ğıyoməti səhnə təşkil beyədə, hakəs ıştə əməlon nəticə ğəbul bəkay.

Ayə dəvomədə hamyedə:məxloği veyni bo mardey bəpeştə bıə dınyo iyən ğıyoməti ruji ğəbul kardey hozzı nin və de curbəcurə sıvol iyən şubhəon pevolo kardey, cokəson həm çı rostə royku bekardey məğsədışon heste.çən,mominon bəbe mığət bıbon və ıştə imoni çı dasto nıdəyn.

Çın ayəonku umutedəmon:

1-ğıyoməti bərpo bıey hətmi iyən ğətiye,harçənd çəy zəmon məxfi həm bıbu.

2-ğıyoməti ruji inkor kardey rişə,bə həvaye-həvəson tabe bıeye.kali fərdon bəştə ğeyri-ğanuniyə həvəson rəseyro və əvon ıştəni ozod hiss kardeyro iyən ıştəni çı ğıyoməti sıvol-cəvobi fikiku ozod kardey xoto,ğıyoməti əsli təkzib kardedən.

3-mominon bəbe ıştə imonədə ğoym iyən poydor bımandon və bızınon ki,çəvon boştə hifz kardey koyədə harcurnə səhlənkorəti,bəçəvon həlokət iyən bədağıbət bıey boyis bəbe.

‏ وَمَا تِلْكَ بِيَمِينِكَ يَا مُوسَى (17) 

(Ha Mosə ha!) Əv çiçe ıştı rostə dastədə?

قَالَ هِيَ عَصَايَ أَتَوَكَّأُ عَلَيْهَا وَأَهُشُّ بِهَا عَلَى غَنَمِي وَلِيَ فِيهَا مَآرِبُ أُخْرَى (18) 

(Mosə) Voteşe: ım çımı əsoy ki, az bəy ıştəni dəhaştedəm iyən boştə pəson(doon) livəon eşandedəm və ıştə co ehtiyocon deəy bərtərəf kardedəm.

Xıdo tərəfiku Mosə(ə) risolət iyən peyğombərəti məğami ğəbul kardey bədiqə, Xıdovəndi bə tohid iyən ğıyoməti ruji təkidış karde və yeqanə Xıdo dılış hestebe Mosə(ə)-i de mecuzəon təchizkəy ki,bə ğıyoməti ruji həx bıey qıləy sənəd bıbu. liza çəyku çəy dastədə bıə çuku ki,adətən əy çoban və pəsəvonon ıştə dastədə novneydən, iminə mecuzə unvanədə oko doeyış tələb karde. əve çı həzrəte Mosə(ə)-iku dəparseşe ki, ıştə rostə dastə bıə çi çiçe və bəştı kon dardi dəvo kardedə? bədihiiye ki, Xıdovənd çın sıvoli cəvobi zıneydəbe,əmmo ım sıvol bo Mosə(ə) –i əso mecuzə nışon doeyro qıləy mığəddəmə be.əmmo Mosə(ə) ki,çəyku xəbəş nıbe, de həmonə sodə koon əncom doə çu işorəş karde. peşonə bərnoməonədə bə ə həzrəti co mecuzəon təfsili surətədə işorə bəkamon.

Çın ayəonku umutedəmon:

1-ğələvonəti və pəsəvonəti çı ənbiya və peyğombəron ko bıə.qılıy ko ki,əvonış bo yolə məsuliyyəton ğəbul kardeyro hozzış karde.

2-Xıdovənd boştə ğudrəti nışon doeyro,bənə dasti çu bıə vey sodə əbzoronku istifodə kardedə.