541-ə hissə-Taha surə-19-23 şərifə ayəon

541-ə hissə

قَالَ أَلْقِهَا يَا مُوسَى (19) 

(Xıdovəndi)Bə Mosə hamyeşe! Ha Mosə ha! (ıştə dastə bıə ) əso(həvləkə) şodə!

فَأَلْقَاهَا فَإِذَا هِيَ حَيَّةٌ تَسْعَى (20) 

(Mosə) Əvış ğande. çən,(əso) de surəti fırsiyə qıləy mor be.

قَالَ خُذْهَا وَلَا تَخَفْ سَنُعِيدُهَا سِيرَتَهَا الْأُولَى (21) 

(Xıdovəndi) Hamyeşe: əy peqət və mətars.əmə dərhol əy bəçəy sıftənə holi obəqordınemon.

Dəvardə proqramədə votemone ki,Mədyəniku bə Misr şıə royədə,Tuva vadiyədə Xıdovənd Mosə(ə)-ış bə peyğombərəti məğami rosneşe iyən de əy sıxanış karde. çəy risoləti elan kardey bədiqə,Xıdovənd çandə qılə mecuzə ğudrətış bə həzrəte Mosə(ə)-i ətoş karde ta məxloğ çəy sıxanon ğəbulkəyn iyən əy çı Xıdo tərəfiku bıey bızınon.

In ayəon çə ə həzrəti iminə mecuzə bəyon kardedə ki,əv həm əso bə mori təbdil bıeye. təbiiye ki,Mosə(ə) ıştən həm iminə kərə de jıqo qıləy səhnə vindey,bəçəy nıtarsey iyən əy inkor nıkardey xoto,Xıdovəndi bəy çı sıftəku nıvoteşe ki,tı ıştə əso bə zəmin ğandeyədə əv bə  mori obəqarde.

Umumən ım təbiiyə tars,çın mecuzə çı Xıdo tərəfiku bıey nışon doydə.zira sehrbozon həm bənə əy koon əncom doydəbinvə əvon ıştə kardə koonku tarseydə nıbin. zira ım çəvon ıştən fik və əməli məhsul be.bə peyğombəron əks ki,ıştə mecuzə əncom doeyədə hiç qıləy rolışon ni və de ilahi irodə deçəvon dasti əncom bedə.

Çın ayəonku umutedəmon:

1-jimoni baxş kardey ya əy bə dumo sıey,Xıdovəndi ğudrəti jiyədəy və əso bə mori təbdil kardey iyən əy bəçəy iminə formə vardey,çı Xıdo elm iyən ğudrəti palu hiççi ni.

2-bo məxloği dəvət kardey iyən təbliği koyədə bəbe çok-çoki hozzı bıbu. Mosə(ə) ki, ğərole həmonə mori çı fironi mığobilədə həvləkəy ta əv əşivo və əjdəho bıbu, bəbe ıştən çı naviku ım səhnə bıvindo.

وَاضْمُمْ يَدَكَ إِلَى جَنَاحِكَ تَخْرُجْ بَيْضَاء مِنْ غَيْرِ سُوءٍ آيَةً أُخْرَى (22) 

Və ıştə dasti bəştə kəşəbıni ji bobə ta sipyi və hiç qıləy ayb nıbə holədə bıbuy ki,(ım həm botı) co qıləy nışonə bıbu.

لِنُرِيَكَ مِنْ آيَاتِنَا الْكُبْرَى (23) 

Ta ıştə dıjdə nışonəon bətı nışon bıdəmon.

Həzrəte Mosə(ə)-i dıminə mecuzə ki,Xıdovəndi hejo çı sftəku bə ə həzrəti nışonış doe,”yədi bəyza” (sipyə dast)be ki,çoko əv ıştə dasti bəştə yəxə ji dənoydəbe və bə bi bekardedəbe,de ilahi irodə çəy sipyəti vavriski doydəbe. Harçənd ımrujnə təhrif bıə Tovratədə omə ki,həzrəte Mosə(ə) bə “bərəs"(xorə) və “pisi”(ekzemə ya pusti noxəşəti) dıço bıəbe,əmmo ım sipyəti çəy bə bərəs ya pisinoxəşəti mıbtəlo bıey nışon doydə nıbe.

Həlbəttə həzrəte Mosə(ə)-i co mecuzəonış həm bıə ki, coqlə vırəonədə çəyku oko doə bıə. əmmo ım dıqlə mecuzə,ilahi yolə mecuzəonku bıə ki,de həzrəte Mosə(ə)-i dasti zohir bıə.

Çın ayəonku umutedəmon:

1-ilahi ğudrəti dast oje və əv çiçi irodəkəy əncom bədoe.mecuzə qıləy beconə çiyədə bıbu ya çı Mosə(ə)-i dastədə fərğ kardedəni.

2-məxloği bə Xıdo tərəf dəvət kardə peyğombəron, bəbe ıştən ilahi ayəon bıvindo və de yəğıni ım məsuliyyətinə ko bəştə ohdə peqəto.