543-ə hissə-Taha surə-37-42 şərifə ayəon

543-ə hissə

وَلَقَدْ مَنَنَّا عَلَيْكَ مَرَّةً أُخْرَى (37)‏

Və bə rosti əmə çımi bənav bətı(nemət)ehson kardemone.

إِذْ أَوْحَيْنَا إِلَى أُمِّكَ مَا يُوحَى (38) 

Bə zəmon ki, bəştı mo ilhom bıə çi vəhy kardemone.

أَنِ اقْذِفِيهِ فِي التَّابُوتِ فَاقْذِفِيهِ فِي الْيَمِّ فَلْيُلْقِهِ الْيَمُّ بِالسَّاحِلِ يَأْخُذْهُ عَدُوٌّ لِّي وَعَدُوٌّ لَّهُ وَأَلْقَيْتُ عَلَيْكَ مَحَبَّةً مِّنِّي وَلِتُصْنَعَ عَلَى عَيْنِي (39) 

(Bəy vəhy kardemone ki) Iştə hırdəni bə sondoxi dılə bınə. çən, həmonə(sondoxi) bə dıyo şodə ta dıyo(ləpəon) əy bə sahil bırosni və çımı iyən çəy deşmon əy(çı dıyoku) peqəti. və(Ha Mosə ha!) mı ıştə tərəfiku qıləy məhəbbət bətı ğandıme. (ta tıni bıpyişone) və tı çımı nəzə jiyədə perəsoş(hozzı bıboş).

Vəynə bərnomədə votemone ki,çoko Mosə(ə) Xıdovəndi tərəfikuməmur be ki,bo Fironi hidoyətiro məmur be,Xıdovənde-Aləm çəy bo Harun(ə)-i barədə bıə tələbış ğəbul karde iyən lozım bıə imkonatış boəy hozzış karde.

In ayəon bə həzrəte Mosə(ə)-i xitob kardedə və hamyedə:əmə dəvardə soronədə həm bə fironi sarayi daxil bıeyro,botı şərayitımon hozzı karde.əv həmonə zəmon be ki,tı ğundağədə bıə qıləy tifil biş və bə zəmon fironi əmrış kardəbe ki,bə dınyo omə qırd tojə zoə hırdənon bıkışton.bə zəmon əmə bəştı mo ilhom kardemone ki, tıni bə qıləy sondoxi dılə bınəy və bə Nili ru dılə vadəy.peşo Nili rumon məmur karde ki, tıni səlomət bə dıyo fironi sarayi nez bıə sahili tərəf biyəy.həmonə zəmon firon deştə jimoni həmro dıyo kəno bin və tınışon çı dıyoku peqəteşone və tı ki, çəvon deşmon biş,tınışon boştə fərzənd vıjniye və əmonədə vırədə dıjd biş.qırd ım koon çəmə nəzorəti  jiyədə bə əməl ome və ım çəmə bətı bıə lutf iyən ehsoni nışonə be ki,tınımon nicot doe.

Çın ayəonku umutedəmon:

1-Xıdovəndi irodə bə həmmə çiyon ğalibe.çoko ki,fironi dılış hestebe Mosə(ə) bə dınyo nıvoy,əmmo Xıdo Mosə(ə)-ış çı fironi ıştən kədə yolış karde.

2-ilahi sınnətonku qıləyni ıme ki,Xıdovənde-Aləm ıştə ovliyaon məhəbbəti bə məxloği dılon eğandedə.

إِذْ تَمْشِي أُخْتُكَ فَتَقُولُ هَلْ أَدُلُّكُمْ عَلَى مَن يَكْفُلُهُ فَرَجَعْنَاكَ إِلَى أُمِّكَ كَيْ تَقَرَّ عَيْنُهَا وَلَا تَحْزَنَ وَقَتَلْتَ نَفْساً فَنَجَّيْنَاكَ مِنَ الْغَمِّ وَفَتَنَّاكَ فُتُوناً فَلَبِثْتَ سِنِينَ فِي أَهْلِ مَدْيَنَ ثُمَّ جِئْتَ عَلَى قَدَرٍ يَا مُوسَى (40) 

Bə zəmon ki, ıştı hovə(həmonə sondoxi dumo) şedəbe ta bıvoti: ayə dılon heste çəy perosniyero iyən boəy dayəti kardey ğəbul kardə kəsi bəşmə xəbə bıdəm? çən,(jıləvoni) əmə tınımon bəştı moə oqordınemone ta çəy çəşon ruşin bıbu və(əv) ğəmqin nıbu. və (ha Mosə ha) tı  (çı fironıjonku) qıləy  fərd bə ğətl rosne(bəçəyro ğəmqin bıəbiş). çən,tınımon çı ğəmiku nicot domone iyən tınımon mıxtəlifə imtovononədə dəvordınemone.çən,çandə soron çı Mədyəni məxloği miyono(Şueybi kəno) mandiş. peşo(ısə) mıəyyən bıə zəmonədə(bo risoləti ğəbul kardey) oməş.

Həzrəte Mosə(ə)-i jimonədə çandə qılə jeni muhimmə rolış bıə.qıləyni çı həzrəte Mosə(ə)-i moəy ki,de ilahi ilhomi vositə,əvış bə dıyo şodeşe.co qıləyni çə həzrəti hove ki, bə fironi saray şe və əvış bəçəy mo tərəf oqordıneşe ki,boəy dayətikəy iyən bəy diyə bıkəy.fironi jimoni həmro həm çı həzrəte Mosə(ə)-i jimonədə qıləy rolış bıə. əy nıhaşteşe ki,firon həzrəte Mosə(ə)-i bıkışto və çə həzrəti conış roxne və həmonə jen peşo bəy imonış varde.

Həlbəttə Xıdovənd ki,piyedəşbe Mosə(ə)-i bo Bəni-İsrayili rəhbər iyən peyğombər bıvıjno, əvış mıxtəlifə hadisəonədə imtovonış karde ta poxte bıbu iyən hozzı bıbu iyən mıəyyənə zəmonədə,əy bo dıjdə məmuriyyəton əncom doey xoto bə Misr oqordıno.

Mosə(ə)-i cıvonəti faxtonədə telə hadisəon bə meydon beşe.min cumlə ım be ki,əy ikərə roysə vindeşe ki,dı nəfər de yənde dave kardedən.qıləyni çı Bəni-İsrayiliku be və co qıləyni fironıjonku be.əv bə məzlumi koməq rəse və bə fironıji tərəfdori qıləy ğoymə mıştış dəkırne və əv ıştə vırədə hejo marde.həmonə macəra boyis be ki, Mosə(ə) məcbur be çı Misriku fərolkəy və bə Mədyəni şəhri bışi iyən əyo de həzrəti Şuəyb(ə)-i kinə izdivacış karde.çın dəvo macəra “Ğısəs”-i surədə omə.

Çın ayəku umutedəmon:

1-mo- Xıdovəndi palu məxsusə vırəş heste.liza pərvərdıqori çı Mosə(ə)-i bəştə mo dovnə oqardey zəminə bıbu ta bəçəy şoyvonəti boyis bıbu.

2-ilahi merdon bo sanqinə məsuliyyəton ğəbul kardeyro,şiddətinə imtovonon vindedən.

وَاصْطَنَعْتُكَ لِنَفْسِي (41) 

(Ha Mosə ha!) Az tınım hozzım kardə və vıjniyəme.

اذْهَبْ أَنتَ وَأَخُوكَ بِآيَاتِي وَلَا تَنِيَا فِي ذِكْرِي (42) 

(Isət) Tı deştə bo de çımı(bəşmə doə) mecuzəon(bə ico bə fironi tərəf) bışənən. və mıni zikr kardeyədə(və çımı risoləti əncom doeyədə) sıstəti məkən.

Xıdovənd bın ayəonədə ıştə bə peyğombər bıə Mosə(ə)-i lutf iyən məhəbbəti oxonə noxtə nışon doydə və hamyedə:ıştı kəşəqırd ın əzob-əziyyəton bəçəyro be ki, tı poxte bıboş iyən çımı tələbon bə vırə bırosniş.ısət həmmə çiyon bo dıjdə məmuriyyəton əncom doey xoto hozzıe.çən,tı deştə bo bə ico bo çımı sıxani iyən çımı mecuzəon nışon doeyro bə fironi tərəf bışi və bın royədə sıstəti məkə ki,mı hejo detı bə icom iyən bətı koməq bəkam.

Çın ayəonku umutedəmon:

1-peyğombəron adiyə şəxson nin ki,Xıdovənd bəçəvon duş qıləy məsuliyyət bınəy, bəlkəm çəvon bə dınyo omə rujiku çı Xıdovəndi nəzorəti jiyədə tərbiyə vindedən ta dıjdə məsuliyyət  bıə risoləti məğami ğəbul kardeyro hozzı bıbon.

2-Xıdo ovliyaon səbarzəti rəmz,bə pərvərdıqore-aləmi dayima iyən komilə şikilədə təvəkkul kardeye.liza de şucoət iyən ğatiyyəti bə nav şedən və hiççiku tarseydənin.