547-ə hissə-Taha surə-61-66 şərifə ayəon

547-ə hissə

قَالَ لَهُم مُّوسَى وَيْلَكُمْ لَا تَفْتَرُوا عَلَى اللَّهِ كَذِباً فَيُسْحِتَكُمْ بِعَذَابٍ وَقَدْ خَابَ مَنِ افْتَرَى (61) 

Mosə bəvon(bə fironıjon) voteşe: vay bıbu bəşmə holi!bə Xıdo iftiro məğandənən ki, əv de qıləy(saxtə) əzobi şıməni həlok bəkay iyən şımə rəğ-rişə bəbırne. və bə rosti bə Xıdo duə iftiro ğandə kəson nokom iyən ziyonkor bəbeyn.

فَتَنَازَعُوا أَمْرَهُم بَيْنَهُمْ وَأَسَرُّوا النَّجْوَى (62) 

Çən, əvon ıştə miyono de hesı-pesı məşğul bin və məxfiyonə de yənde pıç-pıç kardeşone.

Dəvardə proqramədə ərzımon karde ki,firon çı həzrəte Mosə(ə)-i mecuzəon mığobilədə, sehrbozonış vanqış je ta bəştə qımoni əsos ə həzrəti rısvokəy.əmmo həzrəte Mosə(ə) piyeşe ki,ğərole ım bərnomə və mısobiğə çı qırd məxloği huzurədə əncom bıbu ta firon iyən çəy sehrbozon çı umum-məxloği miyono rısvo bıbon və həyğət bə isbot bırəso və de ımrujnə təbiri çın təhdidiku qıləy dıjdə fırsəti unvanədə istifodə kardey ıştə həxə ayini elankəy.

Camaat qırd idə ruji bə və`də doə bıə vırə cəm bin.həzrəte Mosə(ə) bə sehrboz iyən co fironıjon xitob kardə holədə hamyeşe:bo Xıdo şərik ğərol doey iyən çəy mecuzəon sehr zıney,bə Xıdo iftiro ğandeye ki,ım bəşmə həlokət, məğlubiyyət, xusran iyən nobud bıey boyis bəbe.

Həzrəte Mosə(ə)-i çım sıxanon təsiriku çəvon miyono ixtilofon bə vucud ome. əmmo ıştə sıxanon ahəstə şikilədə iyən çı cokəson nıməsə formədə çəyku bəhsışon karde ta məxlğ əvoni nıməson.

Odəmi dığğəti cəlbəkə çi ıme ki,həzrəte Mosə(ə) sehrbozon mığobilədə mıboriz tələb kardey əvəzi,əvonış çı bıtpərəstətiku nəhyış karde iyən əvonış bə i bıə Xıdo tərəf dəvətış karde. çəy ım rəftor ki,çəy həx bıey nışonə be,boyis be ki,kali məxloğ oğo bıbu və bə şəkki dıço bıbon.əvon ehtimolışon doe ki,Mosə(ə) Xıdo peyğombəre iyən çəy təhdidon təsir bəkay.

Çın ayəonku umutedəmon:

1-De du iyən iftiro hiçfaxti bə nəticə nibərəsemon.bın surətədə məğlubiyyət iyən noumudəti əməni çəş kardedə.

2-çı deşmınon miyono həm ixtilof heste.əmmo əvon ıştə ixtilofon çı mominonku məxfi kardedən.

قَالُوا إِنْ هَذَانِ لَسَاحِرَانِ يُرِيدَانِ أَن يُخْرِجَاكُم مِّنْ أَرْضِكُم بِسِحْرِهِمَا وَيَذْهَبَا بِطَرِيقَتِكُمُ الْمُثْلَى (63) 

(Fironıjon) Voteşone: həyğətən ,ım dı nəfər(Mosə və Harun) şək ni(əvon) caduqərin(və) dılışon heste deştə sehri vositə şıməni çın sərzəminiku bə bi bekəyn və şımə aliyə ayini çı miyoniku bobən.

فَأَجْمِعُوا كَيْدَكُمْ ثُمَّ ائْتُوا صَفّاً وَقَدْ أَفْلَحَ الْيَوْمَ مَنِ اسْتَعْلَى (64)

Çən,(ısət) ıştə qırd(sehri) hiyləon cəmkənən,peşo qıləy səffədə hozzı bıbənən və bə rosti ımruj ğələbə bə kəsi məxsuse ki, bəpeye(çəy sehr ğalib booy).

Həzrəte Mosə(ə)-i sıxanon dəvomədə iyən çəy bə məxloği kali qılə təsir noey, fironıjon boçəy sıxanon vəy qəteyro,dı curə behton və şər bə Mosə(ə) iyən Harun(ə)-i ğandeşone.əvon voteşone ki,ımon deştə de ın sıxanon və koon fikışon heste hukuməti bə dast bıqəton və şıməni şımə diyor və sərzəminku bə bi bekəyn və Bəni-İsrayli bə ğudrət iyən hukumət bırosnon.əvon həmçinin dılışon heste şımə dədə-bobon ğoym iyən mığəddəsə din iyən ayini şımə dastiku bıstənon və şıməni bəştə din və ayini biyəyn.

Təbiiye ki, umum-məxloğ bə ın dıqlə movzu nisbətədə reaksiya nışon doydən və bə həxı pemandedənin.co tərəfiku həm bə sehrbozon voteşone ki,şımə çı harcurnə ixtilofiku bə diyəro bımandənən iyən ıştə qırd ğıvvə cəmkənən və çəvon mığobilədə ğoym iyən mohkəm bımandənən ki,bın meydonədə ğələbə bə aliyə tərəfi nəsib bəbe.

Çın ayəonku umutedəmon:

1-Tağutə rejimon məxlğoi bəsə ilahi ovliyaon səpe rost kardedən ta əvoni ğudrət tələb iyən anti milli iyən anti-mədəni unsur təğdımkəyn.

2-deşmınon de həxı mıborizə bardeyro,ıştə qırd zu və imkonatonku oko doydən  və bın koyədə vəhdət təşkil doydən.ehanə çı həxı tərəfdoronvəhdətışon nıbu,məğlub bəbeyn.

‏ قَالُوا يَا مُوسَى إِمَّا أَن تُلْقِيَ وَإِمَّا أَن نَّكُونَ أَوَّلَ مَنْ أَلْقَى (65) 

(Sehrbozon) Voteşone: Ha Mosə ha! ayə tı(sıftədə ıştə ləvo) şodedəş ya əmə sıftədə(ıştə əsoon) bığandəmon.

قَالَ بَلْ أَلْقُوا فَإِذَا حِبَالُهُمْ وَعِصِيُّهُمْ يُخَيَّلُ إِلَيْهِ مِن سِحْرِهِمْ أَنَّهَا تَسْعَى (66) 

(Mosə) Voteşe: bəlkəm, şımə bığandənən. çən, əvon ıştə jiyə iyən ləvoon ğandeyədə, ğəflətən çəvon əbzoron bəçəvon sehri xoto bəçəy(Mosə) nəzə ome ki, əv hərəkət kardedə.

Bın meydonədə həm həzrəte Mosə(ə) zəminəş hozzı karde ta çəy ələyhdaron ıştə hozzı kardə çiyon bə meydon bekəyn iyən boəvon hiççi baği nımando.əvon həm çı məxloği çəşi vədə ıştə sehr iyən coduon əbzorışon zəminisə şodeşone və qıləy koşon əncom doe ki, Mosə(ə),Harun(ə) iyən co məxloğ jıqo qımonkəyn ki,ım beconə movcudon, bə con oməyn və çı zəminisə poyedən.çın dastoni dəvomi omə bərnoməonədə bəməsemon inşaallah.

Çın ayəonku umutedəmon:

1-həxı mıdofiyə kardə faxti bəbe icozə bıdəy ki,mıxolifon ıştə şubhəonku bəhskəyn, çən peşo bəbe de ğoym və məntığiyə cəvobon əvoni çı meydoniku bə diyərokəy.

2-sehr,çı əşyo həyğəti əvəz kardedəni.bəlkəm,bə insoni nəzə iyən dərki qıləy təsir noydə və əy qıləy co formədə nışon doydə.