548-ə hissə-Taha surə-67-71 şərifə ayəon

548-ə hissə

فَأَوْجَسَ فِي نَفْسِهِ خِيفَةً مُّوسَى (67) 

Çən, Mosə ıştə dılədə tarsış hissış karde ki,məbodə məxloğ bımi bovəkəyn.

قُلْنَا لَا تَخَفْ إِنَّكَ أَنتَ الْأَعْلَى (68) 

Əmə(bə Mosə) votemone: mətars, həyğətən, tı ıştən çəvonsə barziş.

وَأَلْقِ مَا فِي يَمِينِكَ تَلْقَفْ مَا صَنَعُوا إِنَّمَا صَنَعُوا كَيْدُ سَاحِرٍ وَلَا يُفْلِحُ السَّاحِرُ حَيْثُ أَتَى (69) 

Iştə rostə dastədə bıə çi bığand bıdə şəvon qırd(pe) soxtə çiyon ebordıno. həyğətən, çəvon (pe) soxtə çiyon hiyləsə co qıləy çi ni və sehrbozon bə kon vırə bışon, bəştə məğsədi nibərəseyn.

Dəvardə proqramədə votemone ki,Firon boştə ğudrəti nışon doey iyən həzrəte Mosə(ə)-i məxloği miyono rısvo kardey xoto,əmrış karde ki,çı Misri sərzəmini qırd sehrbozon qırdəkəyn ta əvon deştə xarığul-addə koon de Mosə(ə) mıborizə bobəyn. həzrəte Mosə(ə) ım təklifış ğəbul karde iyən ziyodə məxloği vədə hozzı be. mıəyyən bıə ruji həmmə məxloğ cəm bin.həzrəte Mosə(ə) bə caduqəron voteşe: sıftədə şımə çiçon heste,nışon bıdənən və bekənən bə meydon.

Əvon ıştə sehri əbzoron rukardeşone bəsə zəminisə.çəvon şodə əbzoron bə məxloği çəş bənə hərəkət kardə moron çiye.ın ayəon hamyedə:həzrəte Mosə(ə) de ım səhnə vindey tarse və norohət be ki,ısənə millət ımi qıləy həyğət bızınon və əvon çı mecuzə de sehri miyono hiç qıləy fərğ nonəyn.bın zəmon Xıdovənd bəy vəhyış karde ki, tı bın mıborizədə ğalib bomeyş.çən,ıştə dastədə bıə ləvo bığand ta çəvon sehri əşyaon ebordıni və hiççi boəvon nıhaşti.

Çın ayəonku umutedəmon:

1-çı həxı tərəfdoron ha vırədə bə tarsı dıço bıbon,bəbe bəvon dılvandi bıdəy iyən əvoni de Xıdo imdodon umudəvokəy.

2-ha zəmonədə bo camaati bə dast dənoeyro ziyodə əbzoron movcude.əmmo ilahi rəhbəron de mınosibə ğədəmon həmmə məkrinə planon vəy qəteydən və oxoyədə hiyləqəron rısvo bedən və həx ğalib omeydə.

فَأُلْقِيَ السَّحَرَةُ سُجَّداً قَالُوا آمَنَّا بِرَبِّ هَارُونَ وَمُوسَى (70) 

Çən, (çoko çı Mosə mecuzəonışon vinde) caduqəron bə səjdə eqınin və voteşone: əmə bə Haruni iyən Mosə pərvərdıqori imon vardəmone.

Çun sehrbozon ıştən zıneydəbin sehr çiçe,əve sərəsin ki,həzrəte Mosə(ə)-i əncom doə çi, sehr ni,bəlkəm həyğəte.əvon zıneşone ki,ım ko çı adiyə bəşəri dastiku omə koni. ım ilahi mecuzəy ki,çu bə heyvoni peqordıneydə və əv bənə qıləy hevoni əməl kardedə.liza qırd əvon çı Mosə(ə)-i mığobilədə sə təzim kardedən iyən çəy ayini ğəbul kardedən.əvon oşkoə holətədə və çı məxloği çəşi vədə ıştə bə Mosə(ə)-i imon vardey elan kardedən.

Çın ayəku umutedəmon:

1-inson i ləzədə ıştə əğıdə əvəz kardey bəzıne və çı kufriku bə imoni tərəf və ya çı imoniku bə kufri tərəf oqardey bəzıne.

2-de mınhərifon rəftorədə hejo ehtimol bıdəmon ki,əvon tobəkəyn iyən bə həxə ro tərəf oqardon. çən,bəçəvon hidoyəti umudəvo bıbəmon.

قَالَ آمَنتُمْ لَهُ قَبْلَ أَنْ آذَنَ لَكُمْ إِنَّهُ لَكَبِيرُكُمُ الَّذِي عَلَّمَكُمُ السِّحْرَ فَلَأُقَطِّعَنَّ أَيْدِيَكُمْ وَأَرْجُلَكُم مِّنْ خِلَافٍ وَلَأُصَلِّبَنَّكُمْ فِي جُذُوعِ النَّخْلِ وَلَتَعْلَمُنَّ أَيُّنَا أَشَدُّ عَذَاباً وَأَبْقَى (71) 

(Fironi vəzyətış jıqo vinde)Voteşe: ayə az bəşmə icozə nıdoe şımə bəy imon vardeyone? Şək ni əv bəşımə sehro-codu umutə şımə yole. çən, hukmən şımə dast-lınqi(çarpaz) bə iyənde əks ğət bəkam iyən şıməni xımoə do xıçəsə bə dar bəjem və rəyrə bəzıniyon ki, çəmə kom qıləyni işkəncə və cəzo vey saxt iyən şiddətine.

Təbiiye be ki,firon çı sehrbozon imon vardeyku xeyli ğeyzin bıəbe.zira əv çəvonku çı məxloği miyono Mosə(ə)-i rısvo kardeyış tələb kardə be,nəinki,bə ə həzrəti imon vardey və əvon deştə de ımko fironi ıştənışon rısvo karde.əmmo firon çı Xıdovəndi irodə iyən ğudrətiku ğafil be.zira əv bıpyişe deşmon həm bə xəy səbəb bəbe və milləti mınhərif kardə kəson,ıştən çəvon hidoyəti cəhətədə səbəb və əbzor bedən.

Firon sehrbozon bə i bıə Xıdo imon vardey bədiqə rısvo nıbey xoto,bəvon şərış ğande ki, şımə ım planon çı naviku kəşəonbe.şımə həmmə çı Mosə(ə)-i şaqirdoniyon.əv şımə sehrbozon yole iyən bo mıni rısvo kardey xoto jıqo qıləy bərnoməon tərtibon doə.çən,şımə qırd bə dar ebəhaştem iyən şımə dast-lınqi cəpo-rast bəbırniyem ta bə cokəson ibrəti boyis bıbu.

Əmmo qırd ım təhdidon hiç qıləy təsirışon nıbe,zira çı sahiron və sehrbozon imon həyği iyən botıni be və cismiyə işkəncə əvoni sıst kardey nıəzıni ya çəvon əğıdə əvəz kardey nıəzıni.

Çın ayəku umutedəmon:

1-bənə fironi bıə tağutə hukumətonədə,əğıdə vıjniye ozod ni və jıqo hukuməton məxloği bəştə tabe kardedən.

2-behton iyən təhdid,çı həxı tərəfdoron mığobilədə mandə fironiyə hukuməton vey rayic bıə əbzoronkue.

3-bənə fironi hukumətonədə işkəncə iyən ğətl joqo rəvocış pəydu kardə ki, hukuməton əy bəyon kardeyku hiç qıləy tarsışon ni.