551-ə hissə-Taha surə-81-84 şərifə ayəon

551-ə hissə

كُلُوا مِن طَيِّبَاتِ مَا رَزَقْنَاكُمْ وَلَا تَطْغَوْا فِيهِ فَيَحِلَّ عَلَيْكُمْ غَضَبِي وَمَن يَحْلِلْ عَلَيْهِ غَضَبِي فَقَدْ هَوَى (81) 

(Isət) Bo şımə ruzimon kardə pokə çiyonku bəhənən. (əmmo)həddiku dəmavərdənən ki, çımı ğəzəb bəşmə varid bəbe. və hakəs ki,bə çımı ğəzəbi dıço bıbu, əv həlok bəbe.

Navnə proqramədə votemone ki, Xıdovənd çandə qılə vırədə bə həzrəte Mosə(ə) tərəfdoron koməqış karde və əvoni çı fironi çənqaliku ozod kardey bədiqə, ıştə nemətonış çəvon səpe ekardeşe.

In ayə hamyedə: Xıdovəndi şımə ixtiyorədə noə çiyonku bəhrə bobənən. şımə pok iyən həlolə çiyon dumo bıbənən və yoləşəxəti iyən tuğyongərəti məkənən iyən bə ilahi hədd-hududon rioyoətkənən. neməton tuğyon ıme ki, inson çı nemətonku ıştə baxtəvərəti royədə istifodə kardey əvəzi ki, həmonə bə ilahi əmron pemandeye-nunkurətikəy və əvoni çı nıpemandey iyən qıno royədə oko doydə.tuğyongərəti təbiiyə surətədə ilahi ğəhro-ğəzəbi dumo ıştə vardedə.

Çın ayəku umutedəmon:

1-islom bə xorəki səhiyyə cəhəto təmizəti dığğət kardeydə iyən pok və həlol nıbə çiyon, cayiz hisob kardedəni.

2-ilahi nemətonku səhihə şikilədə oko nıdoey iyən əy çı qıno və xilofkorəti royədə istifodə kardey, ilahi ğəhri nozil bıey zəminə hozzı kardedə.

وَإِنِّي لَغَفَّارٌ لِّمَن تَابَ وَآمَنَ وَعَمِلَ صَالِحاً ثُمَّ اهْتَدَى (82) 

Və həlbəttə hakəs ki, tobəkəy iyən imon biyəy və loyığinə ko əncom bıdo,bə hidoyət bırəso, hukmən az əy bəbaxşem.

Vəynə ayədə qınokor iyən yoləşəxə şəxson təhdidi dəvomo,ın ayə ilahi rəhməti bəon bə xətokorə bandəon dimi oj kardedə və hamyedə:həlbəttə əzobi nozil bıey bənav, tobə kardey imkon heste.liza hakəs ıştə dəvardə yavə koon əvəzi beşo iyən de imon və salehə əməli,ilahi hidoyti ğəbulkəy və bə royədə istiğomətkəy,bəvədə bə ilahi rəhmət iyən məğfırəti şomil bəbe.

Ruşine ki, qınoku peşmon bıey,çı tobə kardey royədə iminə ğədəme.əmmo ım kafi ni və bəbe çəy təsir çı insoni fik iyən əmələdə zohir bıbu və mıəyyən bəbe ki,şəxs Xıdo rostə royədə ğərolış qətə və ın roy dayimiyə şikilədə ıştə jimonədə bə oxo bırosni.

Çın ayəku umutedəmon:

1-Xıdovəndi tərbiyəviyə şivədə çı təhdidon kəno təşviğ və çı cəzoon kəno mıkofot movcude.

2-islomi prizmaku,ilahi rəhmətiku məyus bıey,qıləy dıjdə qınoe və hiçkəsi ro bastə bıəni. zira, har şərayitədə bə Xıdo tərəf oqardey iyən ilahi rəhməti ğəbul kardey movcude.

وَمَا أَعْجَلَكَ عَن قَوْمِكَ يَا مُوسَى (83) 

Və(bə Mosə votemone) ha Mosə ha! çiç boyis be tı ıştə ğovmiku de dastpoçəti bənav dəşiş?(boçi rə bəvə dəşiş omiş?).

قَالَ هُمْ أُولَاء عَلَى أَثَرِي وَعَجِلْتُ إِلَيْكَ رَبِّ لِتَرْضَى (84) 

(Mosə voteşe) Əvon(çımı ğovm) çımı dumon və Xıdolimha! (az)boştı rizoyəti xoto bəştı tərəf tadibəsə bim.

In ayəon bə Bəni-İsrayil iyən həzrəte Mosə(ə)-i jimoni iqlə baxşi işorə kardedə. çoko ki, Kərimə-Ğıroni co ayəonədə omə,Mosə(ə) bo Tovrati ğəbul kardey xoto bəbe bə Turi band şıənin be və ğərol be çı Bəni-İsrayiliku həm i dastə ə həzrəti muşayiət kardənin be.

Əmmo çı həzrəte Mosə(ə)-i bə de Xıdo munocot kardey şovğ və iştiyoğ anəndəbe ki, bə rəvoyəton əsos əv royədə çı hıtey iyən hardeyku mande və ıştənış de surəti bəTuri bandı-ku rosneşe.qıləy holədə ki,co kəson addi formədə hərəkət kardedəbin iyən omeydəbin.

Ha holədə həzrəte Mosə(ə) bə Turi bandi rəse və ğərol be ə həzrət i manq əyo bımando və Tovrati ğəbulkəy.əmmo bə ım və`dəqo 10 ruj həm əlovə be iyən oxoyədə həzrəte Mosə(ə) çıl ruj ıştə ğovmiku bə diyəro mande.

Bın ayəonədə həzrəte Mosə(ə)-i deştə pərvərdıqori bıə səmimonə votemoni xoto,bə Turi band omey bəyon kardedə.çəy çın dastpoçəti dəlili,bə Xıdovəndi bıə eşğ be iyən de əy mınocot kardeyro bə nav dəşey be.təbiiye ki,addiyə məxloğ jıqo qıləy ləzzəti dərk kardey zıneydəni iyən boəyro tadibəsə bedənin.

Çın ayəonku umutedəmon:

1-harçənd dınyəvi iyən addiyə koonədə,dastpoçəti bə xoş omeydəni,əmmo ilahi iyən xəyə koonədə əcələ iyən dastpoçəti,Xıdovəndi rizoyəti dumo ıştə vardedə.

2-camiyə rəhbəron bəbe hejo navədə bıbon ta məxloği bə hərəkət vodorkəyn.

3-de Xıdovəndi mınocot,qıləy məxsusə həlovət iyən ləzzətış heste ki,fəğət ilahi ovliyaon çəy ləzzəti dərk kardey zıneydən.