553-ə hissə-Taha surə-90-94 şərifə ayəon

553-ə hissə

وَلَقَدْ قَالَ لَهُمْ هَارُونُ مِن قَبْلُ يَا قَوْمِ إِنَّمَا فُتِنتُم بِهِ وَإِنَّ رَبَّكُمُ الرَّحْمَنُ فَاتَّبِعُونِي وَأَطِيعُوا أَمْرِي (90) 

Və bərosti Harun(həm) çımi(Mosə omey) bənav bəvon votəşbe: ha çımı ğovm ha! şımə de poynə vositə imtovon beydon və həyğətən şımə pərvərdıqor Rəhmonə Xıdoe. çən, bəmı pemandənən iyən bəçımı əmron itoətkənən.

قَالُوا لَن نَّبْرَحَ عَلَيْهِ عَاكِفِينَ حَتَّى يَرْجِعَ إِلَيْنَا مُوسَى (91) 

(Əmmo mırtədə ğovmi bə Haruni) Voteşone: əmə hejo poynəpərəstətiyədə baği bəmandemon(və çəy pərəstışiku dast nibəkəşemon) tainki, Mosə bəçəmə tərəf oqardo.

Navnə proqramədə votemone ki,həzrəte Mosə(ə)-i ğeybət iyən ğayib və çəy Turi bandədə bıə faxti,qıləy Samiri nomo bıə mınhərifə fərd məxloği əksəriyytış çı həxə royku mınhərif kardeşe iyən poynəpərəstətiş çı məxloği miyono rəvocış doe.

In ayəon hamyedə: Mosə(ə)-i bo həzrəte Harun(ə) ki,çəy canişini unvanədə çı Bəni-İsrayli ğovmi miyono mandəbe,bə məxloği xəbərdorəti doydəbe ki,ın telıku bıə poynə iyən çəy ğeyri-təbiiyə sədo şıməni bə dast nıeğando.ımon həmmə çı imtovoni səbəbonin ki, ruşin bıbu ki çanəndə bə i bıə Xıdo imonış heste.həmonə Xıdo ki, qırd şımə Xalığ iyən pərvərdıqore və əve çı qırd neməton soyb.şımə bə Samiri inhirofiyə əğayidi tabe bıey əvəzi,bəçımı sıxanon pemandənən ki,şıməni bə həyğiyə Xıdo tərəf hidoyət kardedəm.bəqəm şımə yodo beşə ki,həzrəte Mosə(ə) bə Turi bandi tərəf şıə faxti,mınış şımə miyono ıştə canişinış elan kardeşe? Bəşmə lozım iyən vacibe ki, bəçımı sıxanon tabe bıbənən.

Əmmo çı Bəni-İsrayli bə inhirofi bıə isror,boyis be ki,əvon çı Harun(ə)-i ruşinə məntıği ğəbul nıkəyn iyən bəştə poynəpərəstəti dəvom bıdəyn tainki,həzrəte Mosə(ə) çı Turi bandiku oqarde.

Çın ayəonku umutedəmon:

1-qırd mominon çı imtovoni mə`rəzədən ta ruşin bıbu ki çanəndə bə həyğiyə Xıdo imonış heste iyən çı inhirofə əğıdəon mığobilədə ğoym iyən mohkəm mandən.

2-fitnə iyən imtovonədə bə ilahi pokə ovliyaon pemandey,insoni çı inhirofi xətəriku hifz kardeydə.

قَالَ يَا هَارُونُ مَا مَنَعَكَ إِذْ رَأَيْتَهُمْ ضَلُّوا (92) 

(Mosə ıştə bo səymu qətə holədə) Voteşe: ha Harun ha! çəvon ro dəqijniyə(zəmoni) vindeyədə bətı çiç mane be ki, əvoni oqətoş.

أَلَّا تَتَّبِعَنِ أَفَعَصَيْتَ أَمْرِي (93) 

Ya bəmı tabe nıbuş?(boçi boçımı ğovmi nicotiro bəçımı soyəx nıomiş?) ayə bəçımı əmri asi biş?

Həzrəte Mosə(ə) bə Turi band şıə faxti,ıştə bo Harun(ə)-iku tələbış karde ki,çı milləti miyono bımando və çəvonku mığət bıbu ki,əvon camiyədə bə inhirof iyən fəsodi rəvoci dıço nıbon. liza oqardeyədə,bə ə həzrəti sə-sıxan iyən xitobış karde ki, çıro bəçımı sıfarışon əməlı nıkarde iyən mınhərifon mığobilədə nımandiş? Boçi de poynəpərəston mıborizə nıbarde iyən iyən bəçımı əmron əks rəftorı karde?

Bədihiye həzrəte Mosə(ə)-i dıləsutəti iyən norohətəti boyis be ki,deştə bo jıqo qıləy tındə rəftorkəy iyən iminə nəzədə əy mığəssır bızıno.

Çın ayəonku umutedəmon:

1-camiyə rəhbəron çı milləti inhirofiyə fik iyən əğıdə mığobilədə məsuliyyətışon heste iyən  əvon ıştəni bə kəno okırney nibəzıneyn.

2-həxə royku beşey iyən yavə ağıbəti təhlukə qırd mominon təhdid kardeydə.

قَالَ يَا ابْنَ أُمَّ لَا تَأْخُذْ بِلِحْيَتِي وَلَا بِرَأْسِي إِنِّي خَشِيتُ أَن تَقُولَ فَرَّقْتَ بَيْنَ بَنِي إِسْرَائِيلَ وَلَمْ تَرْقُبْ قَوْلِي(94) 

Haruni voteşe: (ha çımı bo və)moə zo! Çımi rişi və səymu məqət. həyğətən, az tarsim ki, tı peşo bıvotiş(çımı ğovm) Bəni-İsrayli miyono təfrığə eğande və bə çımı sıxani rioyətı nıkarde?

Çoko ki, votemone həzrəte Mosə(ə) de şiddətinə ğeyzi bəştə bo Harun(ə)-i sə-sıxanış karde ki, boçi Bəni-İsrayili ğovm çımı bədiqə bə poynəpərəsti dıço bin.

Bın ayədə Harun(ə) ıştəni mıdofiyə kardedə  və voteydə:az detı ha deynən iqlə moku bıəmon. çən, tı çımı boəş iyən bəbe bə çımı ələyh mehribon bıboş. nəinki, çımı rişi bıqətoş və ya de norohətçəti çımı səy mu okırnış? əmmo az çın inhirofi mığobilədə ıştə dasto omə kom əncom doe.az çanəndə bəvon xəbərdorətim doe, əmmo əvon nəinki,bəmı quş nıdoşone,bəlkəm kam mandəbe mıni bıkışton.mı bo camiyə vəhdəti hifz kardey xoto ki,tarsim əvon bə dıqlə qrup yəni momin iyən poynəpərəstə dastə poə bəbeyn iyən bə  iyənde coni ebəqıneyn və camiyə bə təgrığə dıço bəbe,əve əvoni moyizə iyən bəvon tars doey bədiqə həni çəvonku dastım kəşe və çəşım karde ta tı booş və çəvon barədə bə qıləy ğərol booş.zira tı ıştən bəmı şıyedə sıfarışı karde ki,məxloği miyono de islohi formə əməlkəm və bə camiyə fəsod iyən xərob bıey boyis bıə har qıləy koyku pərhizkəm.

Çın ayəku umutedəmon:

1-inhirofi və`də ıştə ğeyz iyən xışmi izhor kardey,çı dini ğeyrəti nışonə və ilahi ovliyaon xısusiyyətonkue.

2-de camiyə inhirofə fərdon rəftor bəbe camiyədə bə dave-şəvo iyən mınoğişə boyis nıbu ki, ım ıştən qıləy ziyon dumo ıştə vardedə.