558-ə hissə-Taha surə-115-120 şərifə ayəon

558-ə hissə

وَلَقَدْ عَهِدْنَا إِلَى آدَمَ مِن قَبْلُ فَنَسِيَ وَلَمْ نَجِدْ لَهُ عَزْماً (115) 

Bərosti əmə çımi bənav de Odəmi əhd bastemone. əmmo əy çı yodo bekardeşe və əvımon bəştə əhdi sabit iyən mohkəm nıvindemone.

Taha surə tosə ım vırə ayəon veyni,çı həzrəte Mosə(ə) iyən Bəni-İsrayili sərquzəşton iyən çəvon de fironi bıə mıborizə barədə be.çın surə əmandəni ayəon bə həzrəte Odəm(ə) iyən çəy jimoni həmro Həvva(ə) və de əvon deşmonəti kardə şəytoni işorə kardedə.

Çoko ki,çı Kərimə-Ğıroni ayəonku dərəsey bedə,Odəm(ə) iyən Həvvo(ə) jimoni sıftədə bənə vəhışti bıə qıləy boğədə sakin bin ki,əyo çəvon rifoh iyən jimoni şərayit hozzı bıəbe.çəvon qiyədə hələ hiç qıləy vəzifə nıbe iyən ozodə şikilədə Xıdovəndi nemətonku bəhrə bardedəbin.de ın holi Xıdovənd bəvon tovsiyəş kardəbe ki, bə ım doon hiç qıləyni nez məmandənən və çəyku məhənən iyən mığət bıbənən ki, şəyton şıməni bə dast nıdəno.əmmo əvon bə ın tovsiyə ciddi dığğətışon nıkarde və çoko lozım be əvışon ciddi nıqətoşone tainki,giriftor bin və çı vəhıştiku xaric bin.

Çın ayəku umutedəmon:

1-ğoymə irodə iyən əzmi nıbey,Xıdovəndi tanə jıə iyən mızəmmət kardə vırəonku.

2-Xıdovəndi de insoni əhd-peymonış bastə ki,ıştə kəroməti hifzkəy.əmmo insonon sabitğədəm nin.

وَإِذْ قُلْنَا لِلْمَلَائِكَةِ اسْجُدُوا لِآدَمَ فَسَجَدُوا إِلَّا إِبْلِيسَ أَبَى (116) 

Və qıləy zəmon ki, bə firiştəon votemone: bə Odəmi səjdəkənən. çən, həmməy səjdə kardeşone, sovə İblisi ki, əy imtino kardeşe.

فَقُلْنَا يَا آدَمُ إِنَّ هَذَا عَدُوٌّ لَّكَ وَلِزَوْجِكَ فَلَا يُخْرِجَنَّكُمَا مِنَ الْجَنَّةِ فَتَشْقَى (117) 

Çən, votemone: ha Odəm ha! həyğətən, ım(İblis) ıştı iyən ıştı jimoni həmro deşmone. çən,(mığət bıbənən ki, əv) şıməni çı vəhıştiku benığando ki,(şımə) bə əzob-əziyyət və məşəğğət ebəqıniyon.

Insoni xılğəti bədiqə,çəy bəpe bıey bo məlayikon oşko bıey xoto,Xıdovəndi bəvon əmrış karde ki, Odəm(ə)-i mığobilədə xaze bıbon iyən bəy səjdəkəyn.iblis həm ki, çı cıni toyfəku be və bəçəy ziyodə ibodəti xoto çı mələkon restədə ğərolış qətəbe, bəbe bə ilahi ım əmri itoət kardənin be.əmmo əy ımış ğəbul nıkardeşe iyən bə əmri nıpemande.

Xıdovənd həmonə sıftəku çı İblsi iyən çəy nəsli bo bəşəri deşmon bıeyış bəvon rosneşe ta bızınon bəy itoət kardey oxo de bədbəxtəti obərəxe iyən çı insoni dastiku oroməti və asayişi bəstəne.

Çın ayəonku umutedəmon:

1-inson çı qırd məxloğatisə,hətta çı məlayikonsə həm bəpeye və Xıdovəndi ım kəromətış bəy əto kardəşe.

2-şəytoni de insoni deşmonəti(ısət çı jen bıbu ya merd)çəy xılğəti sıftəku bıə iyən de tovə ğıyoməti dəvom pəydu bəkay.

إِنَّ لَكَ أَلَّا تَجُوعَ فِيهَا وَلَا تَعْرَى (118) 

Və bərosti əy(vəhıştədə) nə vəşi bəqəteş və nə uryon bəbeyş.

وَأَنَّكَ لَا تَظْمَأُ فِيهَا وَلَا تَضْحَى (119) 

Və əyo(vəhıştədə) nə təşnə bəbeyş və nə həşi hərorətiku əziyyət bəvindeyş.

Xıdovəndi çı sıftəku bo Odəm(ə) iyən boçəy jimoni həmro qıləy məkanış hozzı karde və həmonə vırə joqo vəsf kardedə ki,həmonə əzəmətinə boğ de ziyodə neməton pur be.liza hiçfaxti əyo vəşi qəteydənin iyən əyo həvosat anəndə mulayim və təmize ki, əyo nə bə odəmi əziyyət kardə qamiku xəbə heste və nə əyo odəm təşi qəteydə.

Insoni iminə dərəcə ehtiyoc bıə çiyon,ısət ov,xorək,libos ya məskən bıbu,jıqo qıləy mınosibə formədə əyo hozzıe və bo əy bə dast vardey xoto bə hiç qıləy əzob-əziyyəti ehtiyoc ni.

Çın ayəonku umutedəmon:

1-dınyo jimon de məşəğğət iyən zəhməti bə ivrəy. Bənə vəşyəti vətəşnəti.ımon bə şəytoni əmron pemandey xotoe.

2-bə ilahi əmron pemandey,insoni bə vəhışt bardedə ki,əyo həni hiç qıləy əzob-əziyyət movcud ni.

فَوَسْوَسَ إِلَيْهِ الشَّيْطَانُ قَالَ يَا آدَمُ هَلْ أَدُلُّكَ عَلَى شَجَرَةِ الْخُلْدِ وَمُلْكٍ لَّا يَبْلَى (120) 

Çən, şəyton bəy vəsvəsə kardeşe(və) voteşe: ha Odəm ha! ayə(dılı heste) bə tı əbədiyə(jimoni) do iyən dayimiyə mılki(podşoəti) roy nışon bıdəm?

Oxoyədə Xıdovəndi bə Odəm(ə)-i xəbərdorəti doə çiyon bə əməl ome.macəra ımbe ki, bə Odəm(ə)-i səjdə nıkardə şəyton qıləy noməlumə formədə zohir be və deştə məkrinə sıxanon Xıdovəndi bəvon nəhy kardə çiyış çəvon nəzədə əbədiş cilvəş doe. əy Odəm(ə)-ış bə vəsvəsəş dıço karde iyən əv ki,bə əbədiyə jimoni meylış hestebe, bə şəytoni hiyləgərə sıxanon və bəçəy doə və`dəonış bovə kardeşe.

Çın ayəku umutedəmon:

1-şəyton insoni məcbur kardedəni,bəlkəm vəsvəsə kardedə.

2-şəytoni nufuzi ro,insoni nəfsaniyə meylonin.zira de ın roy inson ziyodə bə giriftorətiyon dıço bedə.