560-ə hissə-Taha surə-127-130 şərifə ayəon

560-ə hissə

وَكَذَلِكَ نَجْزِي مَنْ أَسْرَفَ وَلَمْ يُؤْمِن بِآيَاتِ رَبِّهِ وَلَعَذَابُ الْآخِرَةِ أَشَدُّ وَأَبْقَى (127) 

Və əmə jıləvoni bə hakəs ki, ıştə həddiku dəvardo iyən isrofkəy və bəştə pərvərdıqori ayəon imon nıvəy, cəzo bədomon və şək ni ki, axırəti əzob vey şiddətin və sabite.

Vəynə proqramədə ki,bə ilahi ğanun iyən sınnəti əsos,bə osmoniyə kitob iyən peyğombəron peşt qordınə kəson,bın dınyoədə bə şiddət iyən jimoni tanqəti giriftor bəbeyn və axırətədə həm bə əbədiyə vəhışti ro pəydu kardey əzınin.

In ayə ijən bə ım nuktə təkid kardedə və hamyedə ki,i dastə odəmon hestin əğıdədə bə kufri dıço bıən iyən əməli cəhəto sıratəl-mıstəğimiku həm xaric bıən iyən ıştə koonədə bə ifrot və təfrıti dıço bedən.əvon Xıdovəndi bəvon əto kardə neməton nodırıst və nosəhihə vırəonədə oko doydən.jıqo fərdon bənə navnə ğovmon bə şiddətinə əzobi giriftor bəbeyn ki,həni bo fərol kardey qıləy ro nibəbe.

Çın ayəku umutedəmon:

1-qıno ki,inov isrof və ilahi neməton hədərə zay kardeye,de bə pərvərdıqore-aləmi imon vardey i omeydəni.

2-ıştə koon muhosibədə çı dınyo xəy və ziyoniku vey,bə ğıyoməti cəzo və mıkofoti əhəmiyyət bıdəmon.

أَفَلَمْ يَهْدِ لَهُمْ كَمْ أَهْلَكْنَا قَبْلَهُم مِّنَ الْقُرُونِ يَمْشُونَ فِي مَسَاكِنِهِمْ إِنَّ فِي ذَلِكَ لَآيَاتٍ لِّأُوْلِي النُّهَى (128) 

Çən, ayə çımi bənav həlokımon kardə məxloğ və(ımruj) çəvon kəonədə şe-omey kardə kəson bo ağılmand bıey(oğoəti) və hidoyəti vəs kardedəni? həyğətən, bəvədə(bə hadisəonədə) bo ağıl iyən əndişə soybon nışonə iyən ibrəton heste.

وَلَوْلَا كَلِمَةٌ سَبَقَتْ مِن رَّبِّكَ لَكَانَ لِزَاماً وَأَجَلٌ مُسَمًّى (129) 

Və ehanə ıştı pərvərdıqori sınnət və təğdır və mıəyyənə zəmon bıənıbe, hukmən bəvon ilahi əzob lozım əbi(ilahi əzob əvoni eəqəti).

In ayəon çı islomi peyğombəri(s) zəmonədə bıə mışrik iyən kofiron barədəy ki,ıştə bə Yəmən, bə Ad ğovmi viron bıə kəon və çəvon bə Şam iyən Səmud ğovmi vironəon bıə səfəronədə iyən bə Lut ğovmi pevuşkıniyə bıə vırəon səfəri zəmon, ımoni vindedəbin,əmmo ijən ibrət peqəteydə nıbin və ıştə inodkorətiku dast kəşeydənıbin.

Qıləy holədə ki,həmonə xərobə vırəon deştə be zıvonə zıvoni,bə vəomə nəsli xəbərdorəti doydə iyən çı zolım,kofir iyən fosiğon oxo bəyon kardedə.

Ayə dəvomədə hamyedə:Xıdovəndi ğanun bə kofiron mohlət doeye ta ğasbu əvon ıştə kuframizə royku dast bıkəşon.çımisə əlovə har qıləy umməti qıləy mıəyyənə əcəlış heste və çəy faxt nırəse,Xıdovənd bəvon əzob nibədoe.

Çın ayəonku umutedəmon:

1-ha kəs çı navkonə camaati tarıxiku pand nıqəto,bə mızəmmət və tanə loyığe.

2-bə dəvardə dovron əsəron nəzə kardeyədə,məxloği veyni bəçəvon zohiri diyə kardedən və çəvonku qıləy ibrət peqəteydənin.

3-qınokor iyən sıtəmkoron,ilahi əzobi bə təxir eqıneyku məğrur nıbon.zira Xıdovənd huccət təmom bıey bədiqə bəvon əzob vığandə.

فَاصْبِرْ عَلَى مَا يَقُولُونَ وَسَبِّحْ بِحَمْدِ رَبِّكَ قَبْلَ طُلُوعِ الشَّمْسِ وَقَبْلَ غُرُوبِهَا وَمِنْ آنَاء اللَّيْلِ فَسَبِّحْ وَأَطْرَافَ النَّهَارِ لَعَلَّكَ تَرْضَى (130) 

Çən, tı bəçəvon votə sıxanon səbrkə və çı həşi pemey bə nav iyən çəy ğurubi(nıştey) bənav de sıtoyişi ıştə pərvərdıqori təsbihkə və şəvi i və`də və ruji niməyjə faxtonədə təsbih bıvot,ğasbu rozi bıbuş.

In ayə çı Məkkə mışrikon behton iyən təhğıron mığobilədə, bə islomi peyğombəri(s) xitob kardedə və hamyedə: bəbe bə ın tel iyən tıkniyə sıxanon tov biyəş və çəş məkə ki, Xıdovənd rəyrə bı nezono bəvon əzob bəvğande ta tı çəvon şərriku əmonədə bımandoş. həlbəttə bo ruhiyyə zumand kardey xoto,lozıme ki,ruji mıəyyənə zəmonədə ısət çı şəv bıbu ya ruj,de Xıdo razo-niyozi və ibodəti məşğul bıbu ta ıştı de Xıdovəndi miyono qıləy ğoymə rabitə bərğərol bıbu.bın surətədə ıştı mıxolifon rəftor bətı ıştə risoləti əncom doeyədə hiç qıləy təsirış nibəbe iyən tı ıştə koyku məyus və noumud nibəbeyş.bəlkəm bə Xıdo lutfon umudəvo bəbeyş iyən ıştə qonə məsuliyyətiku rozi və xoşhol bəbeyş.

Çın ayəku umutedəmon:

1-imoni əhl bəbe çı dini ələyhdoron rəftoron mığobilədə sabit iyən ğoym bımando iyən ıştə koy əncom doeyədə sıst və lır nıbu.

2-nımoji iğomə karde iyən həmdo-təsbih votey,çı deşmınon inodkorəti iyən təbliğaton vədə bo ıştə ruhiyyə zumand kardeyro vey çokə vositəy.

3-şəv, fəğət bo istirohət və hıteyro çok ni,bəlkəm,çı şəvi i hissə bo deştə Xıdo razo-niyoz kardey xoto bəbe cokəy.