563-ə hissə-Ənbiya surə-7-10 şərifə ayəon

563-ə hissə

وَمَا أَرْسَلْنَا قَبْلَكَ إِلاَّ رِجَالاً نُّوحِي إِلَيْهِمْ فَاسْأَلُواْ أَهْلَ الذِّكْرِ إِن كُنتُمْ لاَ تَعْلَمُونَ (7) 

Və(ha peyğombər ha! vuji:) əmə ıştı bənav(hiç qıləy) peyğombər nıvğandemone mələk bıbu, əvon həm merdon bin ki, əmə bəvon vəhy kardemone. çən, əgər zıneydəniyonbu,çı zınə kəsonku xəbə bıstənən.

وَمَا جَعَلْنَاهُمْ جَسَداً لَّا يَأْكُلُونَ الطَّعَامَ وَمَا كَانُوا خَالِدِينَ (8) 

Və(həmçinin) əmə əvonımon xorək nıhardə bədəm ğərol nıdomone iyən çəvon əbədiyə umrışon nıbe(ki nımardon).

Vəynə proqamədə votemone ki, Məkkə mışrikon iyən islomi peyğombəri(s) mıxolifon de mıxtəlifə formə bəhonə dumo bin.qahi faxti voteydəbin:əv həm qıləy adiyə bəşəre və çəy sıxan həm qıləy sehre. qahi faxti voteydəbin:peyğombəri vəhyi unvanədə votə çiyon qıləy bəyənde qıniyə hanonin ki,əv əvoni həyğət zıneydə. kali faxti həm voteydəbin: əv qıləy şayire və çəy sıxan şayiranə təxəyyulonin ki,duyədə bə Xıdo nisbət doydə. və oxoyədə voteydən:ehanə rost voteydon ki, əv çı Xıdo vığandə peyğombəre, bəbe çoko navnə peyğombəron mecuzə vardedəbin,əv həm bənə əvon boəmə jəqo mecuzəon biyəy.

Bəzi cəvobon vəynə bərnoməonədə doey bıə.ın ayəon çə bəhsi dəvomədə hamyedə:tarıxi dırozi qırd peyğombəron çı bəşəri toyfəku bıən və Xıdovənde-Aləm hiç faxti bo məxloği qıləy mələkış vığandəni.ehanə  mıxolifon zıneydəninbu,çı navnə peyğombəron tərəfdoron alimonku dəparsin ta həni co qıləy bəhonə nıvəyn və nıvotin ki,ey kaş,bəbe çı bəşəri əvəzi bo əmə bənə bəşəri ehtiyocınış bıə və dayimiyə jimonış qıləy firiştəş vığandəbe.

Çın ayəonku umutedəmon:

1-bəşəri deştə Xalıği rabitə bərğərol kardey iyən çəyku vəhy ğəbul kardey istedad və zərfiyyətış heste.həlbəttə hakəs ki,Xıdovəndi əvış bıpyo.

2-çı alim iyən zınə kəsonku xəbə sıey,Kərimə-Ğıroni bə məxloği kardə sıfarışonkue.

3-peyğombəron  maddi iyən co insoniyə cəhətiku çı məxloğiku hiç qıləy fərğ kardedənin. çoko co insonon mardedən iyən bın dınyoədə əbədi jimon kardedənin, əvon həm jəqo.

ثُمَّ صَدَقْنَاهُمُ الْوَعْدَ فَأَنجَيْنَاهُمْ وَمَن نَّشَاء وَأَهْلَكْنَا الْمُسْرِفِينَ (9) 

Peşo əmə bəvon doə və`dəon bə vırə rosnemone. çən, əvon iyən hakəs ki, piyemone nicot domone və isrofəkəyon həlok kardemone.

Im ayə bə mominon bəşorət iyən bə mıxolifon xəbərdorəti doə holətədə hamyedə: əmə bə peyğombəron və`dəmon doə be ki,çəvon deşmınon planon bəyənde bəjemon. və əgər əvon ıştə inodkorətiku dast nıkəşon iyən çı həddiku dəvardon, əmə oxoyədə bəştə doə və`dəon bəfo kardemone və mominon nicot domone iyən həddiku dəvardə kəson həlok kardemone.

Çın ayəku umutedəmon:

1-Xıdovəndi bəştə peyğombəron doə ğələbə və`dəon,hətmi iyən ğətiye.tarıx nışon doydə ki, zolımon məhv bıən həx hejo əbədi mandə.

2-isrof fəğət maddiyə koonədə ni.həxı mığobilədə mandə kəs,bəştə nəfsi zılmış kardə iyən bə isrofi dıço bıə.

لَقَدْ أَنزَلْنَا إِلَيْكُمْ كِتَاباً فِيهِ ذِكْرُكُمْ أَفَلَا تَعْقِلُونَ (10)‏

Həyğətən, bə şımə qıləy kitob nozil kardemone ki, boşımə xoto qıləy pande. ayə fik-fam(əndişə) kardedəniyon?

Çı mıxolifon norəvoə sıxanon mığobilədə ki,voteydəbin Kərimə-Ğıron çı peyğombəri bəyənde qıniyə hanonin,ın ayə hamyedə:Ğıroni ayəon bə milləti sabit mandey boyis bedə.bəçəvon baxtəvərəti iyən oroməti boyis bıə çiyon bəçəvon yod dənoydə iyən bəçəvon bədbəxtəti iyən həlokəti boyis bıə çiyon barədə xəbərdorəti doydə. həlbəttə fəğət ə şəxson çəy nəsyət və pandonku bəhrə bardedən ki,əvon əndişə iyən fik-fam kardedən və əvon ıştə həvaye-nəfsi və nəfsi tələb kardə yavə çiyon dumo nin.harçənd mıxolifon çı Ğıroni barədə ğeyri –ağli iddionışon heste, əmmo ım kitob qırd milləti çəy ayəon barədə bo təfəkkur kardey dəvət kardedə və hamyedə: çı Ğıroni maarifiku bəhrə bardey şərt,çəy barədə təfəkkur iyən əndişə kardeye.

Çın ayəku umutedəmon:

1-Kərimə-Ğıron çı bəşəri camiyə ruşd iyən sabitğədəməti amile.insoni ıştəku ğafil mandey, əy təhdid kardə vey dıjdə təhlukəy.ım qıləy holədəy ki,Ğıron insoni çın ğəflətiku xaric kardedə.

2-ilahi peyğombəron iyən çəvon nicot doə təlimon təkzib kardey, çı beməxəti nışonəy. zira Kərimə-Ğıroni maarif de ağli həmahənqe.