564-ə hissə-Ənbiya surə-11-15 şərifə ayəon

564-ə hissə

وَكَمْ قَصَمْنَا مِن قَرْيَةٍ كَانَتْ ظَالِمَةً وَأَنشَأْنَا بَعْدَهَا قَوْماً آخَرِينَ (11) 

Əmə çəvrə camaatış zolım bıə çandə qılə məmləkətımon məhv kardemone.

فَلَمَّا أَحَسُّوا بَأْسَنَا إِذَا هُم مِّنْهَا يَرْكُضُونَ (12) 

Çən, çoko(sıtəmkorə ğovm) çəmə əzobi(omey) hissışon karde, binoşon karde bo vitey.

Navnə proqramədə ərzımon karde ki,Məkkə mışrikon de mıxtəlifə formə de islomi peyğombəri(s) muxalifət kardedəbin iyən ıştə bəhonəonku dast kəşeydə nıbin.ın ayəon bəvon çəşnavi doə holədə hamyedə ki,bə ilahi ayəon kufr karde iyən peyğombəron təkzib kardey və bəvon əzob-əziyyət karde,vey yolə zılme və har qıləy camiyədə zılm iyən sıtəm rəvoc pəydukəy,bəbe çı ilahi əzobi intizorədə bımandon. ilahi ım ğoymə ğanun ki,zolımon məhv kardedə iyən cokəson çəvon vırədə ğərol doydə.

Həlbəttə sıtəmkoron anəndə məğrur iyən inodkor bin ki,bovə kardedənin ki,ilahi əzob əvoni ebəqəte. əvon çoko çı ilahi əzobi nışonəonışon deştə çəşi vinde,dılışon hestebe fərolkəyn,əmmo bə zəmon həni ko-çı koyku dəvardəbe və həni bo fərol kardey iyən nicoti ro nıbe.

Çın ayəonku umutedəmon:

1-camiyədə zılmo-sıtəmi pevolo kardey,həlokət iyən məhv bıey dumo ıştə vardedə və ım ilahi sabitə ğanune.

2-Xıdovənd zolımonro həmınə bın dınyoədə tənbih kardedə ta bə cokəson ibrət boyis bıbu.

لَا تَرْكُضُوا وَارْجِعُوا إِلَى مَا أُتْرِفْتُمْ فِيهِ وَمَسَاكِنِكُمْ لَعَلَّكُمْ تُسْأَلُونَ (13) 

(Əmmo xitob rəse ki)Fərol məkənən. və bəştə kə iyən keyf kardə vırəon oqardənən. ğasbu şıməku sıvol-cəvob bıbu.

In ayə zolımon mızəmmət iyən bəvon sə-sıxan kardə holədə hamyedə:quya əzobi məlayikon bəvon voteydən:bə kon vırə fərol kardeydon viteydon?hiç nıbu bəştə həmonə jimon kardə kə-bəon iyən bəştə ləzzət bardə vırəon tərəf oqardənən və ıştə ləzzət bardə çiyonku bəhrə bobənən.ğasbu qıləy ehtiyocinə şəxsi ıştə ehtiyoci dastış bəşmə tərəf dırozış karde və şımə ğasbu bəy qıləy çiyon doe.harçənd ımi navko jıqo kardeydə nıbiyon və boçimi xoto ğasbu əvon həm ıştə cəzo doeyku dast bıkəşon.

Çın ayəku umutedəmon:

1-ilahi ğəzəbiku fərol kardey mumkin ni.çən,ıştə rəftoron islohi fikədə bıbəmon.

2-ifrot dərəcədə ləzzət bardey iyən de eyşo-işrəti məşğul bıey,çı camiyə ehtiyocinə şəxsonku ğafil mandey amile və ilahi əzobi nozil bıey zəminə hozzı kardedə.

قَالُوا يَا وَيْلَنَا إِنَّا كُنَّا ظَالِمِينَ (14) 

(Və çoko çəmə əzobışon ciddi vinde)Voteşone: vay bıbu bəmə! həyğətən, əmə sıtəmkor bimon.

فَمَا زَالَت تِّلْكَ دَعْوَاهُمْ حَتَّى جَعَلْنَاهُمْ حَصِيداً خَامِدِينَ (15) 

Əvon hejo ım sıxani(tikrorən) voteydəbin tainki, əmə əvonınımon bənə aləfi dıvımone və əvonımon həmuş iyən be hərəkət karde.

De əzobi nışonəon vindey,zolımon binoşon karde bo fərol kardey və etırof kardey ta ğasbu bəvon sıvıkə cəzo bıdəyn.əmmo ım etırofon hiç qıləy ğeymətışon nıbe. zira əvon iztiroriyə holətədə ım koşon əncom doəbe.nəinki, deştə ixtiyori.

Ehanə çı əzobi vindey bənav,sıtəmkoron çı ğəfləti haniku oğo bıəbin iyən ıştə kardə koyku peşmon və çəy əvəzi beşey dumo bıəbin,Xıdovənd həm əvoni ğəbul əkəy və bəvon ıştə koon isloh kardey xoto qıləy fırsət ədəy.əmmo çı ilahi əzobi nozil bıey astanədə ıştə peşmonəti izhor kardey,ğəbul bıənin ni.çoko ki,xıdoəti iddioədə bıə iyən tuğyon kardə firon,ıştə dıyoədə ğərğ və tasə faxti,ıştə peşmonətiş zohir karde. əmmo çəy ım peşmonəti bın faxti hiç qıləy foydəş nıbe.

Bə ın ayəon əsos deməkə ki,zolımon de “ya vəyləna” yəni vay bıbu bəmə votey, ıştə qıno iyən zılmon etırof kardedəbin və dayima əy tikror kardedəbin,əmmo ilahi əzobi çəvon rəğ-rişəş bırniye və bəvon sıxan votey icozəş həm nıdoe.

Çın ayəonku umutedəmon:

1-zılmi ağıbət,peşmonətiye.əmmo qıləy zəmon ki,həni hiç qıləy foydəş ni.

2-sıtəm odəmi kə xo kardə qıləy bəloe və çı sıtəmkori yurdi pəledə.