565-ə hissə-Ənbiya surə-16-20 şərifə ayəon

565-ə hissə

وَمَا خَلَقْنَا السَّمَاء وَالْأَرْضَ وَمَا بَيْنَهُمَا لَاعِبِينَ (16) 

Əmə osmon, zəminiyən çəvon miyono bıə çiyon hənək və sətasponey ofəyomon ni.

لَوْ أَرَدْنَا أَن نَّتَّخِذَ لَهْواً لَّاتَّخَذْنَاهُ مِن لَّدُنَّا إِن كُنَّا فَاعِلِينَ (17) 

(Və)Əgər piyəmonbe, sətasponey bıvıjnəmon, əy ıştə paluku(bəştə mınosib) əvıjnimon.

Navnə bərnomədə bə zolımon dınyoədə doə bıə cəzoku bəhs kardemone.ın ayəon hamyedə: quya ım zolımon dınyo xılğəti qıləy behədəfə ko zıneydən və qımon kardedən ki, Xıdovənde-Aləmi ım dınyoş boştə sətasponeyro ofəyəşe.liza ıştəni ıştə ım əməl və rəftoron mığobilədə məsul iyən cəvobdeh zıneydəni və əv de ləhvo-ləib iyən deştə sətasponey məşğule.qıləy holədə ki,ehanə Xıdovənd dumo hənək iyən sətasponey bıəbe,boştə sətasponeyro ıştə toyfəku qıləy çi xəlğ əkəy.

Bəqəm hestemoni dınyo de çəy qırd ım əzəməti qıləy bihudə və behədəf təsəvvır kardey bəbe? bəqəm qıləy hikməti soyb iyən veyəzın nıbə Xıdo jıqo qıləy dınyo xəlğ kardey bızne?

Həlbəttə məbdə iyən miadi inkor kardə kəson nəzəku,ım dınyo təsadufən iyən çı naviku hiç qıləy proqramış nıbə holədə bə məl omə və məlum ni əv bə kon vırə şeydə iyən çəy oxo çoko bəbe? Ehanə çı dınyo qıləy oxo iyən bə bərnomə əsos nibu, çən boçi inson boştə koon qıləy hədəf iyən proqramə vıjniyedə iyən boştə koon xoto qıləy məsuliyyət  icod kardedə?

Çın ayəonku umutedəmon:

1-hestemoni aləm de qıləy hədəfi ofəyə bıə və inson əy boştə sətasponey vıjniye əzıni iyən de harcurnə rəftor kardey əzıni.

2-zılm iyən sıtəm boyis bedə ki,inson dınyo qıləy hisob-kitobış iyən proqramməş nıbə holədə bızıno və ğıyoməti çı yodo bekəy.

بَلْ نَقْذِفُ بِالْحَقِّ عَلَى الْبَاطِلِ فَيَدْمَغُهُ فَإِذَا هُوَ زَاهِقٌ وَلَكُمُ الْوَيْلُ مِمَّا تَصِفُونَ (18) 

Bəlkəm, əmə de həxı botıli jedəmon ta əv çı miyoniku bışo. və botıl rəyrə məhvo-nobud bıənine. və(Xıdovəndi) de ın(bemənoə)sıfəton vəsf kardey xoto vay bıbu bəşmə!

Vəynə ayə dəvomədə ın ayə hamyedə:xılğəti aləm bə həxı əsos ofəyə bıə və hikməti soyb bıə Xıdo dınyoş bə həxı əsos ğym ofəyəşe iyən bəvədə hiç qıləy botıl ni.liza ə çi hejo bəmande ki,bə həxı əsos bıbu.ehanə botıl covlan bıko iyən ıştəni nışon bıdo, oxoyədə məhv bıənine.zira əv de hestemoni soxtemoni ziddiyyətış heste. bın miyono ım həxe ki,bə botıli səbarz bəbe iyən əy çı miyoniku bəbay, nəinki, bərəks.

Ayə oxoyədə hamyedə:ım çokonəye ki,i hissə inson dınyo behədəf fik kardeydən iyən əy sətasponey və hənək təsəvvır kardeydən? əvon boçi çı xılğəti dəğiğə sırron vindeydənin və deçəy vositə çı həkimə Xıdo vucudi dərk kardeydənin?

Çın ayəku umutedəmon:

1-həx bə botıli ğalib bome və ım çı Xıdo ğanune ki,botıl məhv bıənine.

2-çı botıli buruz iyən zuhur bə insonon ixtiyori iyən bə Xıdovəndi mohlət doey ğanuni əsose. əmmo oxoyədə botıl çı miyoniku şıənine və həx əbədiye.

وَلَهُ مَن فِي السَّمَاوَاتِ وَالْأَرْضِ وَمَنْ عِندَهُ لَا يَسْتَكْبِرُونَ عَنْ عِبَادَتِهِ وَلَا يَسْتَحْسِرُونَ (19) 

Osmon iyən zəminədə bıə har məxloğ bəy məxsuse və çəy palu bıəkəson(firiştəon) bəştə ibodəti xoto yoləşəxəti kardeydənin iyən oqıneydənin.

يُسَبِّحُونَ اللَّيْلَ وَالنَّهَارَ لَا يَفْتُرُونَ (20) 

Əvon bəşəv-bəruj lır nıbə holədə Xıdovəndi təsbih kardeydən(pok zınə holədə əy pərəstış kardedən).

In ayəon bə Xıdovəndi hestemoni aləmədə bıə mutləğə malikiyyəti təkid kardedə və hamyedə: bəqəm zolımon iyən kofiron zıneydənin ki,əvon və qırd insonon, bəlkəm qırd cınon və mələkon Xıdo ofəyəşe və əv çı qırd məxloğati malik və soybe və hiçkəs və hiççi çəy sultə jiku xaricədə ni.co tərəfiku Xıdovənde-Aləm bə kofiron iyən imon nıvardə kəson ibodət iyən imoni ehtuyocış ni.bə Xıdo dərqo mığərrəb iyən nezə mələkon əy hejo təsbih və sıtoyiş kardedən iyən əy pərəstış kardeyku sısti qəteydənin.əgər Xıdovənd əvoni bə imon iyən əməle-salehəti dəvət kardeyədəbu, ım boçəvon ozavziye iyən kəmoli xotoe və Xıdovəndi bəçəvon ibodəti hiç qıləy ehtiyocış ni.

Çın ayəonku umutedəmon:

1-ibodəti tərk kardey inov təkəbbırətiye.çı cokəson mığobilədə təkəbbırəti qıləy bə xoş nomə koybu, çən boçi ıştə Xalıği vədə yoləşəxəti bıkəmon.

2-inson çanəndə bə Xıdo vey nez bıbu,anəndə çəy mərıfət və zıney həm bəpe bəbe iyən əv çı veyə ibodəti dumo bəbe və bəvədə sısti nibəqəte.