574-ə hissə-Ənbiya surə-57-61 şərifə ayəon

574-ə hissə

وَتَاللَّهِ لَأَكِيدَنَّ أَصْنَامَكُم بَعْدَ أَن تُوَلُّوا مُدْبِرِينَ (57)‏

Və ğəsəm bə Xıdo ki, şımə nıbə faxti bo şımə bıton(məhviro) qıləy plan bəkəşem.

فَجَعَلَهُمْ جُذَاذاً إِلَّا كَبِيراً لَّهُمْ لَعَلَّهُمْ إِلَيْهِ يَرْجِعُونَ (58) 

Çən,(qıləy mınosibə fırsətədə) ğərəz çəvon dıjdə qılə, qırd əvonış tikə-tikəş karde ta ğasbu əvon bəçəy soyəx boon(çəvon hıtə vijdanon oğo bıbu).

Navnə proqramədə çı İbreyim(ə)-i de bıtpərəston diyaloqi barədə bəhsımon karde. İbreyim(ə) çəvonku tələbış karde ki,əvon ıştə bıtpərəstəti dəlilon bo əy bəyonkəyn. əmmo çəvon dəlil fəğət ımbe ki,əmə ıştə dədə-bobonımon jıqo vində və həni co qıləy ağli iyən məntığiyə dəlilışon nıvarde.

Həzrəte İbreyim(ə) de əvon hese-pes və munozirə kardey bəpeşt,çoko ki,dərəse deəvon mıbohisə kardey hiç qıləy təsirış ni və əvon ıştə səhvi sərəseydənin,elanış karde ki, rə qıləy zəmonədə qıləy ko bəkay və çı bıton ocizəti bəvon nışon bədoe. əmmo bıtpərəston çəy sıxanışon ciddi nıqəte və bəçəy təhdidon əhəmiyyətışon nıdoe. 

Həzrəte İbreyim(ə) qıləy çokə fırsəti dumo be ki,ıştə bərnomə bə vırə bırosni. nəhoyətən, qıləy idə ruj ome rəse və qırd məxloğ çı şəhriku bə xaric beşin və fəğət ə həzrət şəhrədə mande.əv bə bıtxonə şe və qırd bıtonış ısə çı hırd bıbu ya dıjd, həmməş poəş karde noşe.əmmo çəvonku fəğət iqılə dıjdə bıtış solim oqəteşe.qıləy dıjdə bıt ki, millət bəy de məxsusə çəşi diyə kardedəbin və əy vey mığəddəs zıneydəbin.

Ibreyim(ə)-i dıjdə bıti oqəteyku hədəf ımbe ki,çoko ki,məxloği vindeşe qırd bıton volo-volo bıən və fəğət həmonə dıjdə bıt solim mandə,təbiiye əy mıttəhəm bəkan ki, əy ım koonış əncom doə və ımonış arıştə.jıqo bıənıbe,əv həm bəbe arıştey bıəninbe.

Çın ayəonku umutedəmon:

1-ilahi peyğombəron vəzifəşon heste ki,sıftədə de diyaloq və istidloli vositə,çən peşo əməli iyən praktiki surətədə de bıt və bıtpərəstəti mıborizə bobəy.

2-dıjdə koon, bə proqramə və planon kəşe ehtiyocış heste ta de mıvəffəğiyyəti bə oxo bırəso. peyğombəron həm de məntığiyə proqrami iyən bə Xıdo təvəkkul kardə holədə ıştə kooon bə və bardedəbin.

قَالُوا مَن فَعَلَ هَذَا بِآلِهَتِنَا إِنَّهُ لَمِنَ الظَّالِمِينَ (59) 

(Əvon bə bıtxonə omə faxti)Voteşone: ki deçəmə xıdoon jıqo(qıləy koş) kardə? Hukmən əv çı sıtəmkoronkue.

قَالُوا سَمِعْنَا فَتًى يَذْكُرُهُمْ يُقَالُ لَهُ إِبْرَاهِيمُ (60) 

Voteşone: qıləy cıvonə zoə ki, bəy İbreyim voteydən, məsəmone bə bıton ələyh yavə sıxan kardedəbe.

Idə mərosim bə oxo rəsey bədiqə,bıtpərəston bə şəhr oqardin və bə bıtxonə omin. əmmo əvon əyo çı arıştə bıə iyən volo-volo bıə bıtonku iborət qıləy dıjdə təpəşon mışohidə karde. fəryodoşon jıe ki,kon şəxsi  ım mısibətonış bəçəmə bıton sə vardəşe. hakəs bıəbu,əy həm bəçəmə bıton və həmən bəmə yolə sıtəmış kardə. təbiiye ki, əmə həm bəbe bəy şiddətinə cəzo bıdəmon.İbreyim(ə)-i bəçəvon bıton ələyh kardə yavə sıxanon məsə kəson,voteşone ki,həmonə İbreyim(ə) nomo bıə cıvonə zoə ın koonış kardə və əvışon mıttəhəm karde.

Çın ayəonku umutedəmon:

1-inhirofiyə əğedə boyis bedə ki,inson inhirofə mıhokimə bıkəy və şırki həx iyən tohidi zılm bızıno.

2-cıvonon kardey bəzıneyn camiyədə çı hidoyət iyən ruşdi koyədə muhimmə rol ifokəyn və çı yolon səhvi bəvon dərosnin.

قَالُوا فَأْتُوا بِهِ عَلَى أَعْيُنِ النَّاسِ لَعَلَّهُمْ يَشْهَدُونَ (61) 

(Ğovmi yolon)Voteşone: çən, əy bə məxloği çəşi və biyənən ta əvon(bəçəy qınokor bıey) şoydətikəyn.

Çoko ki, çı məxloğiku i dastə İbreyim(ə)-şon mıttəhəm karde,çə ğovmi yolon voteşone: çən, şımə bışənən İbreyim(ə)-i biyənən ta ım fərdon əy mıəyyənkəyn və bəçəy bın yavə koy xoto şoydətikəyn.bın zəmon mıhokimə bəkamon və əy bəçəy əməli cəzo bərosnemon.

De İbreym(ə)-i qəte iyən dastgir karde,de çə məntəğə sıtəmkorə podşo bıə Nəmrudi huzuri qıləy məhkəmə təşkil doşone və ım mıvəhhid iyən şucoətinə cıvonə zoə çı ğazi və hakimi sıvolon mığobilədə,de cəsorəti çı bıtpərəston əğedəş həmmə məhkumış karde və ıştə kardə koş mıdofiyə kardeşe. macəra dumo peşonə ayəonədə təğib bəkamon.