575-ə hissə-Ənbiya surə-62-67 şərifə ayəon

575-ə hissə

قَالُوا أَأَنتَ فَعَلْتَ هَذَا بِآلِهَتِنَا يَا إِبْرَاهِيمُ (62) 

Voteşone: ha İbreyma ha! tı deçəmə Xıdoon jıqo(qıləy ko) kardə?

قَالَ بَلْ فَعَلَهُ كَبِيرُهُمْ هَذَا فَاسْأَلُوهُمْ إِن كَانُوا يَنطِقُونَ (63) 

(İbreymi)Voteşe: bəlkəm, çəvon ım yolə qılə ım koş kardə? çən, şımə çəyku dəparsənən, əgər əvon sıxan kardedənbu?

Navnə proqramədə votemone ki,çoko ki,millət boştə id iyən şoyvonəti dəvordıneyro çı şəhriku bə xaric beşin,həzrəte İbreym(ə) bə butxonə şe və əyo bıə qırd bıtonış de təvə arıştışe.çən,peşo həmonə təvəş noşe çəvon dıjdə qılə amisə və çəyo beşe bə bi.

Məxloğ bə şəhr oqardeyədə de jıqo qıləy vəzyəti dimbədim omin və İbreyim(ə)-şon bə vırə vanq je ki,ta əy mıhokiməkəyn.bın bərnomədə omə çiyon çəvon de İbreym(ə)-i bıə diyaloqiku iborəte.

Ə həzrət milləti çəvon bovəon iyən kardə koon barədə bo təfəkkur kardey vadar kardeyro, solim mandə həmonə dıjdə bıtış bəvon nışonış doe və voteşe:şımə boçi co kəson mıttəhəm kardedon? Ğasbu ım bıti ıştə rəğibon çı miyoniku bardey xoto ım koş əncom doəbu? Ğasbu əy piyedəşe məxloğ fəğət bəy pərəstışkəyn? Ehanə şımə bəçımı sıxanon bovə kardedəninbu,bəvədə şımə çın arşiyə bıtonku xəbə bıstənən və bıvindənən əvon bəşmə çı cəvob doydən.

Çın ayəonku umutedəmon:

1-ilahi peyğombəron bo məxloği oğo kardey xoto fəğət sıxan voteydənıbin,bəlkəm kali vırəonədə dıjd iyən lozımə koon həm əncom doydəbin.

2-bo dini məfhumon rosneyro  teyatr,numayiş iyən rol ifo kardey qıləy bə xoş omə koonkue. İbreym(ə)-i sıxanon ki,həmonə dıjdə bıti mıttəhəm kardeəbe,du nıbe. bəlkəm, bo məxloği ğəflətədə bıə zehnon oğo kardey xoto be.

فَرَجَعُوا إِلَى أَنفُسِهِمْ فَقَالُوا إِنَّكُمْ أَنتُمُ الظَّالِمُونَ (64) 

Çən, əvon bəştə omin və i yande voteşone: həyğətən, şımə ıştən sıtəmkor və zolımıyon.

ثُمَّ نُكِسُوا عَلَى رُؤُوسِهِمْ لَقَدْ عَلِمْتَ مَا هَؤُلَاء يَنطِقُونَ (65) 

Peşo ıştə səşon qəte beji(de xəcoləti)voteşone: (ha İbreyma ha!)bərosti tı oxo ıştən zıneydəş ki, ımon sıxan kardedənin!

Ibreym(ə)-i tədbiri ko bə nəticə rəse və çəvon vıjdonon oğo be. əvon dərəsin ki,İbreym(ə) de bıton arıştey bəvonış sıtəm kardəni,bəlkəm əvon ıştən bəştə ələyh zılmışon kardə və əvon beconə bıton çı Xıdo əvəzi pərəstışon kardə.

Əmmo çı milləti ım holi dəvomış pəydu nıkarde və əvon boştə dədə-bobon əğedə və adət-ənənəon mıdofiyə kardey xoto,binoşon karde de İbreyim(ə)-i məborizə bardey. əvon voteşone:əmə bo mıttəhəmi zıneyro çoko bə arıştə bıə bıton ovard bıkəmon? Qıləy holədə ki,tı ıştən zıneydəş ki,əvon sıxan kardey çəmi zıneydənin? bəqəm tı bəmə ləğ-ləğə kardedəş?

Çın ayəonku umutedəmon:

1-hıtə vijdonon oğo karde iyən bə pokə fıtrəton dığğət kardey,çı peyğombəron vey muhimmə hədəfonku bıə.

2-bo milləti hidoyətiro çəvon ğeyri-ğanuniyə koonku sıvol kardey,çı peyğombəron tərbiyəviyə şivəonkue.

قَالَ أَفَتَعْبُدُونَ مِن دُونِ اللَّهِ مَا لَا يَنفَعُكُمْ شَيْئاً وَلَا يَضُرُّكُمْ (66) 

(İbreyimi voteşe): Çən, ayə şımə Xıdo əvəzi qıləy çi pərəstış kardedon ki, boşımə nə qıləy mənfəətış heste və nə bəşmə qıləy zərəl rosneydəni.

أُفٍّ لَّكُمْ وَلِمَا تَعْبُدُونَ مِن دُونِ اللَّهِ أَفَلَا تَعْقِلُونَ (67) 

Tuf bıbu bəşmə iyən bəşmə ğərəz Xıdo ibodət kardə har çi! Ayə fik-fam kardedəniyon?

Həzrəte İbreym(ə) çoko ki,dərəse məxloğ həxı ğəbul kardeyışon piyedəni və ıştə cəddo-əbo nodırıstə əğedəonku dast kəşedənin və çəvon koon mıdofiyə kardedən, sıftədə de məntıği və istidloliyə sıxanon voteşe:şımə de çı dəlili şımə jimonədə hiç qıləy rolış nıbə iyən bəşmə hiç qıləy zərəl rosney nızınə bıton pərəstış kardedon? çəvon nə bəşmə qıləy xəy rosney iyən nə qıləy zərəli şıməku bə diyəro kardey ğudrətışon ni. çən, peşo de qıləy ojə-oşkoə holəti iyən ıştəni çın koyku bə diyəro qətə holədə elanış karde ki,əv ıştə əğedədə ğoym bəmande və ıştə de çəvon bıtpərəstəti mıborizəku dast nibəkəşe.İbreym(ə) nəinki,çı bıton arıştey koyku peşmon nıbe, bəlkəm bəştə rostə royədə bıey həm təkidış karde.əv bə milləti votedəbe: boçi kur-kuronə şikilədə təğlid iyən təəssıbiku dast kəşeydəniyon və lıski təfəkkur kardedəniyon? Şımə boçi bəştə dədə-bobon pemandey əvəzi,ıştə ağliku oko doydəniyon?

Çın ayəonku umutedəmon:

1-pərəstışi təbiiyə ruhiyyə,bə xəy və mənfəəti rəsey iyən çı xətər və şərronku nicot pəydu kardeye ki, sovə Xıdo hiçkəs bımi ğadir ni.

2-hiss və emossiyaonku bəhrə bardey və bə yavə və bevəcə koon xoto ğeyzin bıey, qıləy bə xoş omə kooe.

3-bəştə inodkorəti xoto,həxı ğəbul nıkardə kəson,bə sə-sıxan iyən mızəmmət kardey loyığin.