582-ə hissə-Ənbiya surə-100-104 şərifə ayəon

582-ə hissə

لَهُمْ فِيهَا زَفِيرٌ وَهُمْ فِيهَا لَا يَسْمَعُونَ (100) 

Bo əvon əyo(cəhəndımədə) dardnokə ahu-nolə heste və əvon əyo hiç qıləy cəvob nibəməseyn.

Vəynə proqamonədə bə ğıyoməti ruji mışrikon bıə holon işorə be.ın ayə çə bəhsi dəvomədə hamyedə: çı cəhəndımi əhli həsrət iyən ğəmqinəti jıqeo ki,əvon hejo fəryod bəjen iyən zikməvulə bəjen və ozod bıey iyən nicotiro koməq tələb bəkan. əmmo əvon hiç qıləy nicot baxş kardə sədo nibəməseyn və boçəvon xilosiro hiç qıləy umud nibəbe. deməkə ki,cəhəndımi əhl həmmə ivrədə ahu-nolə kardən iyən fəryod jedən əmmo çəvon ım dıjdə əzob çəvon ğəmiku hiççi bəkam nibəkay.zira əvon yənde sədo və zikməvulə nibəməseyn ta hisskəyn ki,ım bəlo qıləy umumiyə  darde və nəticədə bəy tov vardey boəvon hoston bıbu.çın ayəku umutedəmon ki, ahu-nolən vırə becəvob bəbe və ım ıştən qıləy dardinə əzobe ki,çı insoni ahu-nolə məsey nibəbe.

إِنَّ الَّذِينَ سَبَقَتْ لَهُم مِّنَّا الْحُسْنَى أُوْلَئِكَ عَنْهَا مُبْعَدُونَ (101)‏

Həyğətən, naviku çəmə bəvon çokə və`də doə kəson əvon, çə həmonə cəhəndımiku bə diyəro oqətey bəbeyn.

لَا يَسْمَعُونَ حَسِيسَهَا وَهُمْ فِي مَا اشْتَهَتْ أَنفُسُهُمْ خَالِدُونَ (102) 

Əvon çı cəhəndımi otəşi şuləon sədo nibəməseyn və əvon ıştə dıli piyə çiyonədə əbədi bəmandeyn.

Çı cəhəndımi əhli holəton bəyoni bədiqə ım ayəon bə vəhışti əhli vəzyəti işorə kardedə və hamyedə:əmə bə muminon dınyodə doə qırd və`dəon bəfo kardemone. əvon nəinki, bə cəhəndım nibəşeyn,bəlkəm çı cəhəndımi otəşi vərrə jıə sədo həm nibəməseyn və əvon hiç qıləy təhlukə həm hiss nibəkayn.əvon vəhıştədə ilahi nemtonku de komilə oroməti iyən əmniyyəti bəhrə bəbarden və əyo çiç oruzu bəkan və bıpyoşone boəvon əyo hozzı bəbe.çımisə əlovə çəvon vəhıştədə bıə huzur mıvəğğəti iyən məhdud ni.liza əvon ıştə vəoməyku norohət nin.

Çın ayəonku umutedəmon:

1-bə vəhışt varid bıə kəson bə cəhəndım opnıbəqarden,əmmo çı cəhəndımi əhliku veyə insonon  ıştə cəzo kəşey iyən pok bıey bədiqə bə vəhışt varid bəbeyn.

2- Xıdovənd dınyodə ıştə nəfsi kontrol kardə və ıştənış çı həromi oqətətəkəson əvəzi bebəşe və çəvon nəfsi əyo çiçışon bıpyo əv bəvon əto bəkay.

لَا يَحْزُنُهُمُ الْفَزَعُ الْأَكْبَرُ وَتَتَلَقَّاهُمُ الْمَلَائِكَةُ هَذَا يَوْمُكُمُ الَّذِي كُنتُمْ تُوعَدُونَ (103) 

Həmonə ruji vey vəhşətədə ijən əvon ğəmqin nibəbeyn və firştəon boəvoni mıloğat kardeyro(vindeyro) bəçəvon və bebəşeyn və bəvoteyn: ım bəşmə və`də dodə bıə həmonə ruje.

Ğıtyoməti hovlnok iyən dəhşətin bıey,qıləy vey dıjdə vəhşəte ki,insonon əy dərk bəkayn. əmmo jıqo qıləy vəhşət bə muminon iztirobi boyis nibəbe.əvon komilə əmniyyət və oromətiyədə vəhıştədə jimon bəkayn.qıləy holədə ki,firiştəon bəçəvon və bebəşeyn iyən bəvon xəşomə və təbrik bəvoteyn.İmom Əli(ə) qıləy ğəşənqə sıxənədə hamyedə: ha imoni əhl ha!çokə koonədə cəhd bıkənən.de çokə kon məşğul bıbənən ta axırəti dınyoədə çı Xıdo hamsuyə bıbənən. peyğombəron şımə rəfığ iyən dust bəbeyn iyən məlayikon bəşmə ziyorət bomeyn.

Çın ayəku umtedəmon:

1-dınyoədə bə iztirob iyən vəhşəti boyis bıə amilon çanəndə dıjd həm bıbon,çı ğıyoməti ruji iztirob iyən mısibəton mığobilədə kam iyən hiççiye.

2-ğıyomərti ruji çı muminon səbarzəti iyən kofiron xar və zılləti ruj bəbe.

يَوْمَ نَطْوِي السَّمَاء كَطَيِّ السِّجِلِّ لِلْكُتُبِ كَمَا بَدَأْنَا أَوَّلَ خَلْقٍ نُّعِيدُهُ وَعْداً عَلَيْنَا إِنَّا كُنَّا فَاعِلِينَ (104) 

Qıləy ruj ki, osmoni bənə nıvıştə bıə koğəzi mur bədomon pebəpuştemon və çoko xılğətımon bino karde,əy ijən oj bəkamon.ım çəmə ohdədə qıləy və`dəy və əmə hukmən ım və`də əncom bədomon.

In ayəon ım əzəmətinə hestemoni aləmi bə qıləy kitob iyən nıvıştə bıə nomə təşbih kardedə ki, əv oj bedə və  bəvədə qıləy mətləb nıvıştey bedə və ğıyoməti ruji ım bənə koğəzi mur doey pepuştey bəbe.çoko nomə bənə koğəzi pepuştey bedə,çəy nıvıştəyon məhv kardey mənoədə ni və dınyo bəyənde jıey həm çəy məhvi mənoədə ni,bəlkəm çəy əczoon bəyənde qıniye iyən qıləy co tojə soxtemonış  bıə dınyo bə əməl omey mənoədəy.liza ayə dəvomədə hamyedə :çoko ki,dınyo xılğətımon bino karde, oxoyədə  ijən əy bəyənde bəjənemon və ğıyoməti ruji əy sənibəton oj bəkamon və ım ko saxt və çətin həm ni.

Çın ayəku umutedəmon:

1-dınyo movcud bıə soxtemon əbədi ni və kulliyə şikilədə əvəz bəbe.

2- ğıyoməti bərpo karde bo Xıdo hostone və boəyım bənə qıləy koğəzi mur doeye.