587-ə hissə-Həcci surə-12-16 şərifə ayəon

587-ə hissə

يَدْعُو مِن دُونِ اللَّهِ مَا لَا يَضُرُّهُ وَمَا لَا يَنفَعُهُ ذَلِكَ هُوَ الضَّلَالُ الْبَعِيدُ (12) 

Ğərəz Xıdo qıləy çi piyedəşe ki, nə bəy ziyon rosneydə və nə xəy. ıme həmonə diyəro iyən nığılə zəlolət(inhirof).

يَدْعُو لَمَن ضَرُّهُ أَقْرَبُ مِن نَّفْعِهِ لَبِئْسَ الْمَوْلَى وَلَبِئْسَ الْعَشِيرُ (13) 

Bəlkəm, qıləy şəxsış piyedə ki, çəy zərəl bəsə çəy mənfəətisə ziyode. çı yavə əğə iyən çı bevəcə həmdəm və duste.

Dəvardə bərnomədə votemone ki,imonış zəyif bıə fərdon keynə bə saxti iyən muşkilaton dıço bedən,bino kardedən bo kuframizə sıxanon karde.ın ayəon hamyedə: qədə-qədə çəvon həxə royku bə inhirofi tərəf şıey ziyod bedə və əvon çı Xıdo əvəzi bə xorafaton soyəx şedən.əvon təsəvvır kardedən ki,kali astovəon ya beconə sığon çəvon baxtəvərəti və ya bədbəxtətiyədə rolışon heste.əve de mıxtəlifə formə boştə problemon həll kardey xoto çəvonku koməq tələb kardedən və çı beconə əşyaon mığobilədə inov pərəstış kardedən.

De təəssıfi ımrujnə zohiri cəhəto sivilə dınyoədə həm,bənə aspi nali və çəşə mıə bıə çiyon ki, məxloğ çəvonku boştə baxtəvərətiro oko doydən və çın beconə əşyaonku ıştə baxtəvərəti tələb kardedən.co qılə qrup həm boştə muşkilaton bərtərəf kardey xoto iyən dınyoədə bə rifoh və rohətəti rəseyro,Xıdo əvəzi bənə ıştə bıə insonon hiç qıləy etıroz nıkardə holədə pemandedən.qıləy holədə ki,jıqo fərdon zərəl bəsə çəvon xəysə ziyode və əvon təhlukə faxti bə bəşəri qıləy koməq kardey zıneydənin. bə Fironi pemandə kəson çı Mosə(ə)-i Xıdo əvəzi,Fironi bənə Xıdo pərəstış kardedəbin. əmmo əvon de təhlukə dim-bə dim omeyədə çəyku hiç qıləy koməqışon nıvinde və əvon həm bənə əy Nili ruyədə ğərğ bin.

Çın ayəonku umutedəmon:

1-bə ğərəz Xıdo cokəson çı insoni jimonədə təsirış bıey bovə,qıləy de şırk iyən inhirofi umuj qıniyə qıləy etığode.

2-de əməni çı Xıdo royku oqətə iyən bə co roon okırnə kəson əyşt-nışt kardeyku bə diyəro bımandəmon.

إِنَّ اللَّهَ يُدْخِلُ الَّذِينَ آمَنُوا وَعَمِلُوا الصَّالِحَاتِ جَنَّاتٍ تَجْرِي مِن تَحْتِهَا الْأَنْهَارُ إِنَّ اللَّهَ يَفْعَلُ مَا يُرِيدُ (14) 

Həyğətən, Xıdovənd imoni əhl iyən salehə əməli əhli bə(vəhışti) boğon varid bəkay ki, çəy doon jiku ruon cari bəbe. (bəle)Xıdovənd harçi irodəkəy(əy) əncom bədoe.

Dəvardə ayəonədə bəyon be ki,zəyifə imoni soybon dınyoədə bə inhirofi dıço bəbeyn və axırətədə bə əzobi.ın ayə bə imoninə şəxson sərnıvışt iyən tale işorə kardedə. çın ayə mesaj ımi rosneydə ki,detobə ıştə umri oxo de imoni jimon kardə, pok  iyən çok jimon kardə kəson və de imoni çın dınyoku rehlət kardə kəson,co qıləy dınyoədə çı ilahi dıjdə əcriku bəhrə bəbardeyn.bədihiye Xıdovənd bəştə və`də doə çiyon əməl bəkay.zira əv bəştə bandəon kardə ko aqahe iyən əv bə harçi ğadire və çəvon mıkofoti bəvon əto bəkay.

Çın ayəku umutedəmon:

1-imon de əməli bə icoe,çoko ki,əməl nıbə holədə çı imoni ğeymətış nibəbe.çı nicot iyən baxtəvərəti kilid,hejo de əməli bə ivrə bıə imone.

2-kofirə insonon bənə ıştə fərdonku koməq tələb kardedən,dınyoədə bə iyənde dardi dəvo nıkardə kəson,çokonə axırətədə bə iyənde dodi bərəseyn.əmmo mominon fəğət Xıdoku koməq tələb kardedən.zira fəğət əv bəvon koməq kardey bəzıne və əv çı ğıyoməti ruji soyb iyən hakime.

مَن كَانَ يَظُنُّ أَن لَّن يَنصُرَهُ اللَّهُ فِي الدُّنْيَا وَالْآخِرَةِ فَلْيَمْدُدْ بِسَبَبٍ إِلَى السَّمَاء ثُمَّ لِيَقْطَعْ فَلْيَنظُرْ هَلْ يُذْهِبَنَّ كَيْدُهُ مَا يَغِيظُ (15)‏

Hakəs qımonkəy ki, Xıdovənd əy(ıştə peyğombəri) dınyo iyən axırətədə koməq nibəkay(vuji:) qıləy jiyə(rismon) ehaşto(və ıştəni bəy ehaşto) peşo əy bıbırno. bə zəmon erəxi ki, ayə çəy hiylə çəy ğəzəbi bənoştovne?

وَكَذَلِكَ أَنزَلْنَاهُ آيَاتٍ بَيِّنَاتٍ وَأَنَّ اللَّهَ يَهْدِي مَن يُرِيدُ (16) 

Və əmə jıləvoni Ğıroni de ruşinə ayəon nozil kardemone və həlbəttə Xıdovənd hakəsi bıpyişe hidoyət bəkay.

In ayəon bə Məkkə mışrikon bə islomi inkişofi xoto bıə ğəzəb iyən ğeyzi işorə kardedə. zira əvon həm çəş kardedə nıbin ki,Xıdovənde-Aləm bəştə peyğombəri koməq bəkay iyən islomi din və ayni jıqo pevolo bəkay.liza de mıxtəlifə formə ıştə xışm iyən ğeyzi və norohətçəti ibroz kardedəbin.Xıdovənd çəvon cəvobədə hamyedə: ehanə şımə jıqo norohətiyon,bışənən ıştəni de qıləy jiyə ehaştənən ki, ğasbu çın ğeyziku rohət bıbiyon.

Umumən pəxılə kəson çı cokəson ozavziye iyən inkişofi vindey çəşışon ni və əvon ıştə mardey oruzu kardedən və voteydən:ey kaş ki,əmə bıənıbimon və çı fılonkəsi ımrujnəvəzyətımon vində nıbe.Xıdovənd həm bə mıxolifon həmonə holi işorə kardedə və çəvonku tələb kardedə ki,ehanə şımə çı islomi səbarzətiyon mışohidə kardey çəşon ni,bışənın ıştəni bıkıştənən ta rohət bıbənən.zira peyğombəri bo məxloği vardə çiyon,ilahi ruşinə ayəonin ki,hakəs əy tələbkəy və ğəbulkəy,əy dəbərəse və imon bəvarde.əmmo məxloği əksəriyyət nodırıstə çiyon tələb kardedən və bo həxı ğəbul kardey hozzı nin.təbiiye jıqo fərdon hidoyət nibəbeyn.

Çın ayəonku umutedəmon:

1-Xıdovəndi irodə iyən tələbon vədə ğeyzin iyən ğəmqin bıey əvəzi,bəçəy lutf iyən rəhməti umudəvo bıbəmon.zira ım çəmə nicoti vəsiləy.

2-hidoyət Xıdovəndi koe və Ğıron çı bəşəri hidoyəti vəsiləy.ə kəs Ğıroni hidoyətiku bəhrə bardedə ki,Xıdovəndi nur bəçəy dıli dətıvo iyən bə aləmipərvərdıqori imon biyəy.