629-ə hissə-Nuri surə-48-52 şərifə ayəon

629-ə hissə

وَإِذَا دُعُوا إِلَى اللَّهِ وَرَسُولِهِ لِيَحْكُمَ بَيْنَهُمْ إِذَا فَرِيقٌ مِّنْهُم مُّعْرِضُونَ (48) 

Və hafaxti bə Xıdo iyən bəçəy rəsuli tərəf vanq jıey bıbu ta peyğombər çəvon miyono hukm bıkəy, bın zəmon çəvonku i dastə dim qordıneydən.

وَإِن يَكُن لَّهُمُ الْحَقُّ يَأْتُوا إِلَيْهِ مُذْعِنِينَ (49) 

Əmmo əgər həx de əvon bıbu rozi iyən təslim bıə holədə peyğombəri palu bomeyn.

أَفِي قُلُوبِهِم مَّرَضٌ أَمِ ارْتَابُوا أَمْ يَخَافُونَ أَن يَحِيفَ اللَّهُ عَلَيْهِمْ وَرَسُولُهُ بَلْ أُوْلَئِكَ هُمُ الظَّالِمُونَ (50) 

Ayə çəvon dılonədə noxəşəti heste ya bə şəkki dıço bıən ya tarseydən ki, Xıdovənd iyən çəy peyğombər çəvon həxı zay bəkayn. (ne jıqo ni)bəlkəm əvon ıştən sıtəmkoronin.

Vəynə proqramədə bəyon kardemone ki,nifoği bə islomi camiyə nufuz pəydu kardey çanəndə zərəlış heste.ın ayəon bə nifoği vadi giriftor bıey iyən imoni zəyif bıey nışonəon işorə kardedə və hamyedə:hafaxti çəvon de co mısılmınon miyono qıləy ixtilof bə meydon boy,ehanə əvon həxədə bıbon, çı pəyğombəri doə hukmi ğəbul bəkayn və bə ə həzrəti doə hukmi təslim bəbeyn. əmmo əgər pəyğombəri sadir kardə hukm bəçəvon ələyh bıbu,deməkə ki,zıneydən pəyğombər çı Xıdo hukmi bəyon kardedə,əvon ijən ıştə dimi bəqordıneyn və bə ə həzrəti doə ğəroli tabe nibəbeyn.

Imruj həm bo imoni iddioədə bıə ziyodə insonon çı koon dırıst ya nodırıst bıey meyar həx iyən botıl ni,bəlkəm şəxsi ya umumi mənafeyonin. harçi boçəvon xəyri bıbu, həx bəzıneyn və harçi bəçəvon zərəli bıbu,əy botıl bəzıneyn. ım ko de imoni əhvol-ruhiyyə i omeydəni.

Ayəon dəvomədə bə ım dı curə standardəti və riyokorəti rəğ-rişə işorə kardedə və hamyedə: eqoistəti iyən dınyotələbəti ruhiyyə bəvırə rəseydə ki, inson harçi bəştə ziyon bıvindo əy rədd və inkor bəkay,həta əgər çı Xıdo-Rəsuli(s)-i hukm həm bıbu. qahi faxti camaati i hissə jıqo behəyo bedən ki, bə Xıdo iyən bəçəy rəsuli, zılmi nisbəti doydən və qımon kardedən ki, bəçəvon mənafe iyən dıli piyə çiyon mıtobiğ bıə harçi həmonə ədoləte.

Çın ayəonku umutedəmon:

1-imoni həyğiyə nışonə, Xıdo iyən çəy rəsuli əmron mığobilədə təslim bıeye, harçənd ım əmron bəçəy meyl və nəzə əks həm bıbu.

2-de ədoləti hukm doey,bə iqrup insoni xoş omeydəni. jıqo ki, hətta əgər peyğombər həm hakim bıbu iyən de ədoləti hukm bıdo, idastə odəmon əy qıləy zolımonə hukm zıneydən və əy ğəbul kardeydənin.

3-bə Xıdo şəkk iyən suyi-zənn kardey ıştən zılme.

إِنَّمَا كَانَ قَوْلَ الْمُؤْمِنِينَ إِذَا دُعُوا إِلَى اللَّهِ وَرَسُولِهِ لِيَحْكُمَ بَيْنَهُمْ أَن يَقُولُوا سَمِعْنَا وَأَطَعْنَا وَأُوْلَئِكَ هُمُ الْمُفْلِحُونَ (51) 

(Əmmo)Çoko muminon bə Xıdo iyən peyğombəri tərəf vanq kardey bıbu, ta çəvon miyono hukmkəy, çəvon sıxan ğərəz ımi ni ki, voteydən: ”məsemone iyən itoət kardemone”. ımon həmonə nicot pəydu kardə kəsonin.

وَمَن يُطِعِ اللَّهَ وَرَسُولَهُ وَيَخْشَ اللَّهَ وَيَتَّقْهِ فَأُوْلَئِكَ هُمُ الْفَائِزُونَ (52) 

Və hakəs bə Xıdo iyən bəçəy rəsuli pemando iyən çəyku bıtarso, çən əvon həmonə perəxəkəsonin.

Navnə ayəonədə çı imoni iddoədə bıə kəson, Xıdo iyən çəy rəsuli mığobilədə kali noloyığə hərəkəton bəyon be və votemone ki, əvon çokonə nohəx bıə surətədə ıştəni həx zıneydən və peyğombəri çəvon həxon zay kardəkəs hisob kardedəbin. ın ayəon çım puriddio dastə mığobilədə bə pəyğombər(s)-i rostəvıjə tərəfdoron işorə kardedəvə hamyedə: həyğiyə muminon əvonin ki, həm ıştə sıxanonədə peyğombəri doə hukmi ğəbul kardedən və həmən əmələdə bəçəy sadir kardə əmron pemandedən. əvon nə deştə zıvoni mıxolifət kardedən və nə əmələdə lır və sısıt bedən. bədiihiye jıqo əhvol-ruhiyyə fəğət ilahi təğa iyən bəçəy əmron nıpemandey tarsi sayədə insonədə bə əməl omeydə iyən əy bə hərəbaxtəti və xoşbəxtəti rosneydə.

Çun kali muminon deməkə ki,bə Xıdo əmron mutiin və çəvon ım pemandey de kərohət və norizoyəti bə icoe,ayəon dəvomədə hamyedə: bə pərvərdıqori həxə əmron pemandey bəvədə hosil bəbe ki, əv de dıli xoşi iyən de təslimə formə bıbu və ehanə jıqo bıbu həmonə inson çı jimoni saxt və çətinə imtovononədə hejo səbarz bəbe iyən dınyo və axırətədə bə hərəbaxtəti bərəse.

Bə rəvoyəton əsos İmom Əli(ə)ki, hejo bə Xıdo iyən bəçəy rəsuli təslim bıə, çın ayə vey barizə misdoğ iyən dəlilonkue ki,ə həzrət oxoyədə bə dıjdə feyz iyən xoşbəxtəti rəse.

Çın ayəonku umuteydəmon:     

1-bə hərəbaxtəti rəsey bə Xıdo iyən bəçəy rəsuli əmron pemandey sayədə bə dast omeydə. əmə çı Xıdo əmron mığobilədə ıştə təslim bıey əndozə mığoyisəkəmon, bəvədə ıştə imoni əndozə həm bəzınemon.

2-bo mumini muhimmə məsələ,bəştə vəzifəon əməl kardeye. ısət əv çı bəçəmə xəy bıbu ya bəçəmə ziyoni.

3-pərvərdıqore-aləmi mığobilədə botıniyə şərm iyən həyo karde və bəçəy əmron ələyh nıbeşe, insoni çı jimoni mıxtəlifə səhnəonədə hifz kardedə iyən əy bə məğsəd rosneydə.