774-ə hissə-Səba surə-1-5 şərifə ayəon

774-ə hissə

De Əhzabi mıborəkə surə bə oxo rəsey, bın bərnomədə əmə Səba mıborəkə surə bino kardedəmon. ım surə Məkkədə nozil bıə və bın surədə de Səba ğovmi sərquzəşti bəyoni mınosibəti, bəy Səba nomışon noə.

Sıftədə bə Səba mıborəkə surə 1 iyən 2-ə ayəon quş doydəmon:

بسم الله الرحمن الرحيم

الْحَمْدُ لِلَّهِ الَّذِي لَهُ مَا فِي السَّمَاوَاتِ وَمَا فِي الْأَرْضِ وَلَهُ الْحَمْدُ فِي الْآخِرَةِ وَهُوَ الْحَكِيمُ الْخَبِيرُ(1) 

Sıtoyiş bə Xıdo məxsuse ki, osmon iyən zəminədə bıə çiyon soybe və axırətədə(həm) həmdo-sıtoyiş fəğət bəy məxsuse və əv hikməti soyb, aqahe.

يَعْلَمُ مَا يَلِجُ فِي الْأَرْضِ وَمَا يَخْرُجُ مِنْهَا وَمَا يَنزِلُ مِنَ السَّمَاءِ وَمَا يَعْرُجُ فِيهَا وَهُوَ الرَّحِيمُ الْغَفُورُ(2) 

Bə zəmini daxil bıə çiyon iyən çəyo xaric bıə çiyon və osmoniku nozil bıə çiyon və çəyku bəpe şıə çiyon(qırd) zıneydə və əv mehribon, əbaxşe.

Qırd əmə bənə bandon, cənqəlon, dıyoon bıə təbiiyə mənzərəonku reçinə rəsm əsəron və novbə nov heyvonon mışohidə kardeyədə bəmə təsir kardeydə və beixtiyor bə həmonə sənət əsəron ofəyəkəsi əhsən votedəmon iyən əy tarif kardedəmon. ayə ikəs ki, ım osmon iyən zəminış və veyə ğəşənqə mənzərəon ofəyəşe və boəmə çəvon təsvirış bə rəsm kəşəşe, bə sıtoyiş iyən tarıfi loyığ ni?

Kərimə-Ğıroni penc qılə surə de Xıdovəndi həmd iyən sıtoyişi bino bedə. çəvon həmməysə kırtə qılə Həmdi mıborəkə surəy ki, əyro əmə ıştə nımojonədə tilovət kardedəmon. çın surəonku qıləyni Səba mıborəkə surəy ki, bə ın xosə hestemoni aləmi xəlğ kardey xoto, de Xıdo sıtoyişi bino bedə.

Əv ki, həm hestemoni aləmış ofəyə və həmən çəy qırd koonku xəbədoe. hiççi çəy elmiku məxfi ni və əv, dınyo bəştə elm iyən hikməti əsos idorə kardedə.

Axırətədə həm vəhışti əhl əy həmdo-sıtoyiş bəkayn. çıro ki,əv bəştə ədolət iyən fəziləti əsos de əxloği rəftor kardedə və bo çokə ko soybon dıjdə mıkofotonış hozzı kardə.

Çın ayəonku umutedəmon:

1-həyğiyə sıtoyiş bə Xıdo məxsuse və har sıtoyiş bıə kəmoli soyb, həyğədə həmonə sıtoyişış ofəyəşe.

2-Xıdovəndi bə dınyo iyən insoni bıə elm, qıləy kulliyə elm ni. bəlkəm, əv çı hestemoni aləmi qırd hissəonku, hətto vey hırdə çiyonku həm xəbədoe.

وَقَالَ الَّذِينَ كَفَرُوا لَا تَأْتِينَا السَّاعَةُ قُلْ بَلَى وَرَبِّي لَتَأْتِيَنَّكُمْ عَالِمِ الْغَيْبِ لَا يَعْزُبُ عَنْهُ مِثْقَالُ ذَرَّةٍ فِي السَّمَاوَاتِ وَلَا فِي الْأَرْضِ وَلَا أَصْغَرُ مِن ذَلِكَ وَلَا أَكْبَرُ إِلَّا فِي كِتَابٍ مُّبِينٍ (3) 

Və kofir bıə şəxson voteşone: ğıyomət boəmə nibome. vuji: çıro? Bəçımı ğeybi zınə rəbbi ğəssəm ki, (əv)bəşmə soyəx həm bome. osmon iyən zəminədə bıə izərrə çiyon çəyku niyon ni. çəyku qədə və ya çəyku dıjdə çi ni ki, (ilahi)ruşinə kitobədə ğeyd nıbu.

Xıdo inkor kardə və bo hestemoni aləmi mıdəbbirə(tədbir vində) məbdə ğəbul kardey hozzı nıbə kəson, təbiiye ki, ğıyoməti həm təkzib bəkardeyn iyən çı mardey bədiqə jimoni və ğıyoməti ruji məhkəmədə hozzı bıey həm ğəbul nibəkardeyn. əmmo peyğombər(s) de ojə-oşkoə holəti elon kardedə ki, ım çı kofiron qımon, oruzu iyən tələbone ki,mardey bəpeştə ğıyomət nıbu və əvon kardey bızınon ıştə dıli piyə formədə iyən hiç qıləy məhduduyyət nıbə holədə bın dınyoədə əməlkoyn. əmmo bə ilahi vəhyi əsos ki, pəyğombər(s) əy mıstəğim və sərostə formədə ğəbul kardeydəbe, həmmə insonon ısət çı kofir bııbu ya mumin, ğıyoməti ruji məhkəmədə hozzı bəbeyn və bəştə dınyoədə bıə fik iyən rəftoron cəvobdeh bəbe. qıləy məhkəmə ki, bə dınyoədə de ilahi məlayikon vositə nıvıştə və ğeydi əsose, adilonə surətədə bə har fərdi hisobi bərəseyn və hiç qıləy hırd və dıjdə çi həm çı yodo benıbebəşe.

Çın ayəku umutedəmon:

1-miadi inkor kardə kəson boçəy inkori xoto hiç qıləy dəlilışon ni və fəğət bəştə məəhdudə elm iyən zənni əsos deçəy inkori məşğul bedən.

2-həyğətədə inson de əzınə Xıdo dimbədime ki, əv çı bəşəri oşko iyən niyon və zohir iyən botıniku aqahe və çəyku hiççi məxfi kardey nibəbe.

3-maddi nizomədə çı koy kəmiyyət vey təsirine. əmmo axırətədə çı kəmiyyəti əsosinə rolış ni və əyo çı koy niyyət və keyfiyyət muhimme.

لِيَجْزِيَ الَّذِينَ آمَنُوا وَعَمِلُوا الصَّالِحَاتِ أُوْلَئِكَ لَهُم مَّغْفِرَةٌ وَرِزْقٌ كَرِيمٌ (4) 

Ta imon vardə iyən loyığınə ko əncom doə kəson mıkofoti bıdəy. məhz əvonin ki, boəvon məğfırət iyən çokə ruziyon mıəyyən bıə.

وَالَّذِينَ سَعَوْا فِي آيَاتِنَا مُعَاجِزِينَ أُوْلَئِكَ لَهُمْ عَذَابٌ مِّن رِّجْزٍ أَلِيمٌ (5) 

Və əməni ociz kardero çəmə ayəon inkor kardeyədə səy kardə kəson, əvonin ki, boəvon dardnokə cəzoku(saxtə) əzob heste.

Vəynə ayə dəvomədə  ki, ğıyoməti ruji məhkəməku bəhs kardedəbe, ın ayəon bə insonon ağıbəti işorə lardedə və hamyedə: ğıyoməti ruji millət bə dı dastə təğsım bəbeyn. iqlə dastə vəhışti əhlin ki, deştə dınyoədə bıə əməlon, axırətədə ilahi kərimonə və səxovətinə rızğo-ruzi ğəbul kardey ləyoğətışon bə dast vardə. coqlə qrup cəhəndımi əhlin ki, Kərimə-Ğıroni ayəon iyən çəy maarifi inkor və təkzib kardey royədə veyə cəhdışon kardə. əvon fik kardedəbin ki, ilahi ğudrəti jiku fərol kardey və Xıdo ociz kardey bəzıneyn.

Çın ayəonku umutedəmon:

1-ğıyoməti ruji ilahi mıkofoti ğəbul kardey yeqanə ro, imon iyən əməle salehe.

2-ə kəs çı insoni əməlon komil iyən həyğiyə mıkofoti doey bızıne ki, əv bə insoni qırd koon, hətta bəçəy niyyəton həm aqah bıbu.

3-bo Ğıron iyən islomi məktəbi zəyif kardero cəhd kardə deşmınon hiyləonku ğafil məbəmon ki, əvon milləti çı Ğıroniku bə diəro kardey fikədən.