776-ə hissə-Səba surə-10-13 şərifə ayəon

776-ə hissə

وَلَقَدْ آتَيْنَا دَاوُودَ مِنَّا فَضْلاً يَا جِبَالُ أَوِّبِي مَعَهُ وَالطَّيْرَ وَأَلَنَّا لَهُ الْحَدِيدَ (10) 

Və həyğətən, əmə ıştə tərəfiku bə Davudi fəzilət domone. (və votemone)ha bandon iyən pərəndəon ha! deəy(Xıdo təsbihədə) həmsədo bıbənən və osonro boəy nam kardemone.

أَنِ اعْمَلْ سَابِغَاتٍ وَقَدِّرْ فِي السَّرْدِ وَاعْمَلُوا صَالِحاً إِنِّي بِمَا تَعْمَلُونَ بَصِيرٌ (11) 

(Və votemone ha Davud ha!)Hovuj (sıvık)iyən komilə zirehon bısoxt və çəy soxtemoni dırıst bıpam iyən loyığinə ko əncom bıdənən. həyğətən, mı şımə əncom doə çiyon vindedəm.

Vəynə proqramədə 9-ə ayə oxoyədə bə “Əbdu-Munib”-i yəni bə ilahi dərqoyədə nolə kardey iyən oqardey işorə be(Sadi mıborəkə surə 24-ə ayədə bə ın mevzu işorə bıə ki, həzrəte Davud(ə) Xıdo dərqoyədə tobə iyən inobə kardedəbe). ın ayəonədə çı həzrəte Davud(ə) iyən çəy fərzənd həzrəte Suleymon(ə)-i jimoniku i hissəku sıxan votey bıə.

Sıftədə hamyedə: Xıdovənde-Aləm bə həzrəte Davud(ə)-i məxsusə nemətonış əto karde. maddi iyən mənəviyə neməton ki, Nəmli mıborəkə surədə xulosəvari surətədə bəvon işorə bıə. çəvon iminə qılə bənə cəmodətiku(beconə cism) iborət bıə bandon iyən bənə heyvonon bıə pərəndəon de ə həzrəti bə ico mınocat iyən dıvo kardeye. jıqo ki, havaxti həzrəte Davud(ə) de Xıdo zikri məşğul bedəbe, çəy kəno bıə əşyaon həm deəy bə ico həmsədo bedəbin vəə çəvon zumzumə həmonə fəzo qırd pur kardedəbe. rəvoyətədə həmçnin islomi əziz-qıramiyə pəyğombər(s)-i barədə omə ki, çə həzrəti mıborəkə dastədə bıə hırdə sığon təsbihi nəğmə bə quş rəseydəbe və çəy əshab həm ımi məsedəbin.

Ayəon dəvomədə bə həzrəte Davud(ə)-i qıləy məxsusə ğudrəti işorə kardedə və hamyedə: əmə bo həzrəte Davud(ə)-i osoni nam kardemone ta əv zireh bısoxto və de ın roy ıştəni iyən ıştə yaro-yavəron çı deşmınonku hifzko. zohirən çı Davud(ə)-i bənav canqəvəron bo ıştəni çı deşmoni şımşi, tiy iyən nizəonku nığo doeyro osoni səyfəonku oko doydəbin ki, vey qon iyən zəhmətış vey be. əmmo de ilahi irodə Davud(ə) kardeyış zıne osoni bənə nozıkə toğı bırışto və dayrəvi surətədə hozzıko. çən, peşo həmonə həlğəon bənə oləti bıbofto ta canqəvəron həmonə ım zirehon bəştə tankon və çı deşmıni şımşi iyən tiyonku əmonədə bımandon.

In ayəon oxoyədə bə Davud(ə)-i xitob kardə holədə hamyedə: çın əbzoronku istifodə kardey piyədə, çəvonku dırıst, səhih iyən bə xoş omə royədə oko bıdə ki, Xıdovənd bə həmmə koon aqahe.

Çın ayəonku umutedəmon:

1-Xıdovəndi dərqoyədə de tobə iyən inobə məşğul bıə kəson, ilahi məxsusə lutf iyən inoyətiku bəhrə bəbarden.

2-hestemoni aləmi qırd movcudaton ısət çı cəmodat, nəbotat ya heyvonat bıbon, şuurışon heste və əvon həmmə bə ilahi fərmoni mutin(çoko ki,bın ayədə bə bandon iyən heyvonaton xitob bıə).

3-zəmini ji mədənon iyən sape mənbəonku bo bəşəri mənfəəton cəhəto bəhrə bardey, Xıdovəndi təkid kardə çiyonkuye.

4-sənət və sənaye bəbe de dığğət iyən keyfiyyəti bə ico bıbu və çı bəşəri məsləhəti cəhətədə çəyku oko doey bıbu.

وَلِسُلَيْمَانَ الرِّيحَ غُدُوُّهَا شَهْرٌ وَرَوَاحُهَا شَهْرٌ وَأَسَلْنَا لَهُ عَيْنَ الْقِطْرِ وَمِنَ الْجِنِّ مَن يَعْمَلُ بَيْنَ يَدَيْهِ بِإِذْنِ رَبِّهِ وَمَن يَزِغْ مِنْهُمْ عَنْ أَمْرِنَا نُذِقْهُ مِنْ عَذَابِ السَّعِيرِ(12)

Və bo Suleymoni vomon(ram karde) ki, rujobə nezi imanqi roy şedəbe iyən əsr(peştçoştə) vaxti imanqi roy və boəy(sı kardə bıə) mısə çeşmə cari kardemone iyən çı cıniku idastə çəy vədə de Xıdovəndi izni ko kardedəbin və çəvonku har qıləyni ki, bəçəmə əmri pemandedənıbin, bəy mıncır kardə əzobi çaşdovnedəbimon.

يَعْمَلُونَ لَهُ مَا يَشَاءُ مِن مَّحَارِيبَ وَتَمَاثِيلَ وَجِفَانٍ كَالْجَوَابِ وَقُدُورٍ رَّاسِيَاتٍ اعْمَلُوا آلَ دَاوُودَ شُكْراً وَقَلِيلٌ مِّنْ عِبَادِيَ الشَّكُورُ (13) 

Cınon çı Suleymoni piyə harçi, mehrobon(məbədon), heykəlon və bənə hovuzon iyən sabitə ğəzənon bıə dıjdə zərfon(ğabon) boəy soxtedəbin. ha Davudi xıyzon ha!(bə qırd ım neməton xoto) Xıdo şukri bə vırə bırosnənən. əmmo, çımı bandəon kamə hissə şık kardedən.

Bə Xıdovəndi bə həzrəte Davud(ə)-i doə neməton xulosə şikilədə işorə kardey bədiqə, ın ayəon Xıdovəndi bə Davud(ə)-i iyən bəçəy zoə Suleymon(ə)-i əto kardə se qılə lutf və inoyəton zikr kardedə.

Sıftənə lutf həvoyə mərkəb be(bənə ımrujnə həvoədə pərə baloni) həmonə mərkəb çı zəminiku rost bıey bəpeşt, vo Suleymon(ə)-i bəçəy dıli piyə har qıləy noxtə bardedəbe. Suleymon(ə) de ın mərkəbi bə imanqnə məsofə bə nimə ruj rəsedəbe və peştnimeyj oqardedəbe.

Dıminə nemət ımbe ki, bo ehtiyoci bıə harcurnə əbzor iyən çiyon soxtero mısi ov kardey be. məsələn bənə hırd iyən dıjdə ğabon, sabitə ğəzənon və sayirə. ehanə oson de həzrəte Davud(ə)-i nam bıebu, mıs həm Suleymon(ə)-i zəmonədə ov be.

Seminə nemət çımiku iborət be ki,i dastə ram bıə cınon çı həzrəte Suleymon(ə)-i iyən çəy hukuməti xıdmətədə bıey be ki, əvon deçəy əmri vey saxt iyən qonə koon bə vırə rosneydəbin və ehanə bə əmri itoət nıkardəeydə de şiddəti tənbih bedəbin iyən bəvon cəzo doey bedəbe.

Dıminə neməti barədə ımi bıvotəmon ki, ruşine ki, bəşəri bə mısi ov kardey ğudrəti dastış pəydu kardə, əmmo iminə iyən seminə vırəon çə koonkuye ki, de tobə ısət həm bo bəşəri məchul iyən moməlum mandə. vey mumkine maddi pərəstə insonon ımi xorafat bızınon, əmmo imoninə insonon ki, bə ğeyri-maddi iyən ğeybiyə ğıvvon iyən amilon bovəşon heste, ğəbul kardedən ki, bəsə məlum bıə maddiyə səbəbonsə əlovə, bın aləmədə noməlumə maddi iyən ğeyri-maddiyə illəton həm movcude ki, kali ilahi ovliyaon de Xıdovəndi izni bəy dastışon pəydu kardə iyən çəyku bəhrə bardedən.

Çın ayəonku umutedəmon:

1-pəyğombəron iyən ilahi ovliyaon, bə təkvini koon mıdoxilə kardey ğudrətışon heste.

2-Xıdovənd izn doə holədə inson cıni təsxir iyən ram kardey bıəzıne, əmmo ım ko tovsiyə bıəni.

3-sənaye iyən hınə əşyaon soxtey iyən çı mədən və metalonku bəhrə bardey ilahi təlimonku bıə ki, əvış bəştə bəzi pəyğombəron təlimış doə ta çı bəşəri ozavziye iyən inkişofi royədə çəyku oko doey bıbu.

4-mısi ov kardey iyən metal ov kardey sənaye, qıləy dırozə stajış heste və ım bə həzrəte Suleymon(ə)-i zəmoni oqardedə(çoko ki, həzrəte Suleymon(ə)-i zəmonədə de sı kardə bıə mısi ov kardey vositə mısə ğabon, hırd iyən dıjdə zərfon hozzı kardey bedəbe).