778-ə hissə-Səba surə-18-21 şərifə ayəon

778-ə hissə

وَجَعَلْنَا بَيْنَهُمْ وَبَيْنَ الْقُرَى الَّتِي بَارَكْنَا فِيهَا قُرًى ظَاهِرَةً وَقَدَّرْنَا فِيهَا السَّيْرَ سِيرُوا فِيهَا لَيَالِيَ وَأَيَّاماً آمِنِينَ (18) 

Və çəvon de çəmə bərəkət doə məntəğəon miyono oşkoə ovdonəon ğərol domone iyən çə obodiyon miyono mınosibə formədə səfəon mıəyyən kardemone(və bəvon votemone:) bın məntəğəonədə de əmniyyəti bəşəv-bəruj səfəkənən.

فَقَالُوا رَبَّنَا بَاعِدْ بَيْنَ أَسْفَارِنَا وَظَلَمُوا أَنفُسَهُمْ فَجَعَلْنَاهُمْ أَحَادِيثَ وَمَزَّقْنَاهُمْ كُلَّ مُمَزَّقٍ إِنَّ فِي ذَلِكَ لَآيَاتٍ لِّكُلِّ صَبَّارٍ شَكُورٍ (19) 

Çən,(de nunkuyəti voteşone:) Xıdolim ha! çəmə səfəon miyono qıləy fosilə eğand(çəmə məsofə diyərokə) və ıştən bəştə zılm kardeşone. çən, əmə əvonımon(bo cokəson ibrətiro) zıvononədə daston kardemone iyən kulli surətədə volo-volo kardemone. həyğətən,(çəvon) bın(nunkuyətiyədə) bo səbrəkə iyən şukrəkəyon(ibrəti) nışonəon heste.

Vəynə proqramədə bə Yəmənədə jiyə Səba ğovmi sərquzəşti icmoli surətədə işorə kardemone. ın ayəon sıftədə hamyedə: Xıdovənde-Aləm boəvon jıqo ziyodə nemətonış hozzı kardəşbe ki, həmonə dıjdə məntəğə həmmə vırəonədə obod iyən bə iyande nez bıə diyon bə əməl oməbe. çəvon zəminon iyən kaştemoni sahəon jıqo havz bəbe iyən vıl və beməyon pur be ki, roonış kırt və diyonış bə iyənde nezış kardəşbe. çı neməton ziyod bıeysə əlovə, həmonə məntəğəonədə əmnı-əmonət həm hakim be və kulliyə surətədə qıləy rifohinə jimon və çokə asayiş bo çə vırə camaati hozzı bıəbe. həmmə kəsi sə de ko-fəaliyyəti tas bıəbe iyən ilahi veyə nemətonku əvon çokə bəhrə bardedəbin.

Əmmo vəzyəti jıqo dəvomış pəydu nıkarde və çı milləti veyni ğəflət iyən eyşo-işrət, boyis be ki, əvon Xıdo ıştə yodo bekon. əvon de eyşo-işrəti məşğul bedəbin iyən deştə dastədə bıə neməton fəxr kardedəbin. jıqo bızın əvon çı jıqo ziyodə asayiş iyən çokə rifohinə jimoniku si bıəbin və jıqo votedəbin: əmə piyedəmone çəmə şərayit əvəz bıbu və əmə jıqo bə iyande nez məbəmon. çəmə miyono qıləy fosilə bıbu çok bəbe və əmə tikəy yəndeku bə diyəro bıbəmon.

Jıqo nunkuyəti iyən bə neməton kufr kardey, boyis be ki, çəvon məntəğə ovdonəti iyən inkişofi amil bıə sədd, xərob bıbu. macəra jıqo be ki, bə mıxtəlifə amilon xoto, çə həmonə tulə səddi divoon çı dıləku zəyfəti və bə dıjdə seylon cari bıeyxoto, rıjiye və dıjdə oveyzi həmmə vırəş eqəte. ın hodisə boyis be ki, havz iyən qıləy obodə məntəğə bıə Səba sərzəmini sivilizasiyə bə qıləy xərobə bıə iyən lehmə zəmini təbdil be. qıləy ibrətamizə tale ki, peşo məxloği miyono bə zıvononədə əzbər bıə qıləy dastoni oqarde ki, çokonə həmonə havz iyən ovdonə vırə, bə qıləy ancəvər iyən həloğə məntəğə təbdil be.

Çın ayəonku umutedəmon:

1-bə neməton nunkuyəti karde, bəçəy çı dastiku şıey iyən bə problemon icod bıey boyis bedə.

2-bənə nuşukrəti bıə kali qınon cəzo, dınyoədə bə insoni və beşedə və bə insoni fərdi, xıyzoni iyən iştimayi jimoni təsir kardedə.

3-Kərimə-Ğıron tovsiyə kardedə ki,inson bəbe boştə ımrujnə jimonədə ibrət qəteyro, dəvardə ğovmon sərquzəşton mutaliyəko.

وَلَقَدْ صَدَّقَ عَلَيْهِمْ إِبْلِيسُ ظَنَّهُ فَاتَّبَعُوهُ إِلَّا فَرِيقاً مِّنَ الْمُؤْمِنِينَ (20) 

Və həlbəttə, İblisi çəvon həxədə bıə qımon rost beşe(votedəbe ki, mı Odəmi əvlodon bə zəloləti dıço bəkardem). çən, ğərəz muminonku qıləy kamə dastə həmməkəs bəy tabe bin.

وَمَا كَانَ لَهُ عَلَيْهِم مِّن سُلْطَانٍ إِلَّا لِنَعْلَمَ مَن يُؤْمِنُ بِالْآخِرَةِ مِمَّنْ هُوَ مِنْهَا فِي شَكٍّ وَرَبُّكَ عَلَى كُلِّ شَيْءٍ حَفِيظٌ (21) 

Və həlbəttə, İblisi çəvon sape hiç qıləy ğələbəş(hukm) nıbe(çəy ko fəğət vəsvəsəy) ta bə axırəti bovəş bıə kəsi(bəçəy vəsvəsəon mığovimət nışon doə kəson) de bə axırəti nisbətədə şəkkədə bıə kəsi məlumkəmon və ıştı pərvərdıqor bə həmmə çiyon hıvoskəy(nəzorətəkəy).

İblis bə Odəm(ə) iyən Həvvoş vəsvəsəş karde, əve ilahi dərqoku tojniye be. əv ğəssəmış harde ki, Odəm(ə)-i fərzəndon həm çı royku bebəkarde və jıqo qımon kardedəbe ki, jıqo qıləy çi bə vırə bərosne.

In ayəon hamyedə: qımon nıbu ki, şəytoni bəsə millətisə hukmış heste və əvoni bə isyon iyən qıno məcbur kardedə, hiçvaxti jıqo ni. bəlkəm, çəy ko fəğət vəsvəsə kardeye və ehanə Xıdovəndi bın koyədə çəy dastış oj haştəşebu iyən bəy icozə doydə ki, əv jıqo koon əncom bıdo, ım bəçəy xotoye ki, çı milləti imtovoni zəminə hozzı bıbu. yəni mıəyyən bıbu ki, kon şəxson bə ğıyoməti imonışon heste və bə şəytoni vəsvəsəon təsiri ji dəşedənin və kon kəson ğıyoməti barədə bə şəkkı-şubhəon dıço bıən və de şəytoni qədə vəsvəsə bə qıno mırtəkib bedən. təbiyii surətədə imon iyən irodəşon sıst və zəyif bıə şəxson vey rə bəştə nəfsaniyə meylon iyən xarici təsiron ji dəşedən və çı şəytoni vəsvəsəon mığobilədə mığovimət nışon doey ğıvvəş bedəni.

Şək ni ki, Xıdovənde-Aləm ıştə bandəon kardə əməlonku aqahe.əmmo əv bəştə elmi əsos, bəştə bandəon mıkofat ya cəzo doydəni. çanədə ki, çəy bandə qıləy koş əncom doəni, bın zəmon çı mıkofot ya cəzo mənoş ni. dırıst bənə qıləy mellimi ki, zıneydə ki, ım şoqird dərsəhand iyən zırənqe, əmmo çanədə ki, çəyku imtovon nıstəno və çı imtovoni koğəzi səhih nınıvışto, bəy ğəbuliyə numrə doydəni. təbiiye mellimi ıştə şoqirdi elmiku kifoyət ğədərədə aqahətiş heste, əmmo bəbe şoqird ımi praktiki surətədə deştə imtovonədə dəvardey təsdığko və ıştə elmi ğudrəti nışon bıdo.

Çın ayəonku umutedəmon:

1-şəytoni bə insoni nufuz kardey roonku qıləyni, çəy bə ilahi neməton nunkuyəti kardeye. Səba ğovm bə ilahi neməton kufr kardey xoto, şəytoni bəvon nufuzış karde.

2-Xıdovənd itərəfo bə insoni ixtiyorış doə və co tərəfiku de ağl iyən vəhyi roy, dırıst iyən nodırıstə roş bəy nışonış doə. pəyğombəron iyən ilahi ovliyaon milləti bə çokətiyon tərəf dəvət kardedən və şəyton iyən şəyton sıfətə insonon bə yavə çiyon tərəf əvoni sovğ doydən. bın miyono inson bəbe deştə irodə iyən ixtiyori ıştə roy bıvıjno.