780-ə hissə-Səba surə-25-30 şərifə ayəon

780-ə hissə

قُل لَّا تُسْأَلُونَ عَمَّا أَجْرَمْنَا وَلَا نُسْأَلُ عَمَّا تَعْمَلُونَ(25) 

(Ha pəyğombər ha!)Vuji: (şımə)bəçəmə mırtəkib bıə çi xoto istintoğ nibəbiyon və əmə(həm) bəşmə kardə əməlon xoto istintoğ nibəbemon.

قُلْ يَجْمَعُ بَيْنَنَا رَبُّنَا ثُمَّ يَفْتَحُ بَيْنَنَا بِالْحَقِّ وَهُوَ الْفَتَّاحُ الْعَلِيمُ (26) 

Bıvot: çəmə pərvərdıqor əmə iyən şıməni(ğıyoməti ruji) qırdə bəkay. peşo çəmə miyono həxədə mıhokimə bəkarde və əve əzınə hakim.

قُلْ أَرُونِي الَّذِينَ أَلْحَقْتُم بِهِ شُرَكَاء كَلَّا بَلْ هُوَ اللَّهُ الْعَزِيزُ الْحَكِيمُ (27) 

Vuji: şımə bo Xıdo şəriki unvanədə ilhoğ kardə kəson bəmı nışon bıdənən. hiçvaxti jıqo ni. bəlkəm, əv məğlub nıbə, hikməti soyb bıə Xıdoe.

Vəynə proqramədə votemone ki, Xıdo-Rəsul(s) milləti bə həxə roy tərəf dəvət kardeyədə, çəvonku tələb kardeydə ki, əndişə iyən fikkəyn və həxə roy bıvıjnon iyən təbiiye hakəs bəştə vıjniyə çi iyən əməl və rəftoron cəvobdehe. ın ayəon hamyedə: ğıyoməti ruji həm, hakəsiku bəçəy vıjniyə çi əsos, çəyku sıvol-cəvob bəbe. həlbəttə, milləti miyono hakiməti kardey, bə osmon iyən zəmini ofəyə Xıdovəndi ohdəy və əv çı həmmə insonon holonku aqahe. əv bə həx iyən həyğəti əsos, hukm bədoe iyən hakəsi bəçəy əməlon cəzo bərosne.

Dınyoədə həmmə insonon iddio kardedən ki, çəvon fik, əməl iyən qətə ro dırıste və həxı çı botıliku co kardey qıləy hostonə ko ni. əmmo ğıyoməti ruji həni bo iddio kardey qıləy vırə ni. bəlkəm, Xıdovənde-Xalığ bəştə elmi əsos, həxı çı botıliku mıəyyən iyən əvoni çı iyandeyku co bəkarde.

Peşonə ayə ijən bə mışrikon xitob kardə holədə hamyedə: şımə bo Xıdo şərik fik kardə çi, real ni və əv fəğət şımə zənn iyən qımon kardə çiye.ım qıləy çi ni ki, ımi isbot kardey lozıme. əvon fəğət idastə çu iyən sığin ki, ləyoğətışon ni hestemoni aləmədə çı Xıdo şərik bıbon.

Çın ayəonku umutedəmon:

1-ğıyoməti ruji koon mığoyisə meyar, həx iyən botıle, nə inki, ğohuməti əloğəon. liza hakəsi əməlon fəğət de həxı mığoyisə bəbe. nəinki, de co koon.

2-de muxatəbon votemoni vaxti, əvoni cinoyətko iyən qınoko məzınəmon. Xıdo-Rəsul(s) bə mışrikon hamyeşe: Xıdovənd əməni bəçəmə qınon xoto iyən şıməni bəşmə koon xoto sıvol-cəvob bəkay.

3-çı bəşəri xiyoliyə məbudon hiç qıləyni ıştəni çı Xıdo şərik zıneydənin.ım fəğət cohilə insone ki, əvoni boştə xalığ vıjniyedə iyən əvoni Xıdo şərik ğərol doydə.

وَمَا أَرْسَلْنَاكَ إِلَّا كَافَّةً لِّلنَّاسِ بَشِيراً وَنَذِيراً وَلَكِنَّ أَكْثَرَ النَّاسِ لَا يَعْلَمُونَ (28) 

Və əmə tımon bo həmmə milləti mıjdəvoniədə iyən tarsədə peyğombəri unvanədə vığandemone. əmmo məxloği veyni zınedəni.

Tohid iyən şırki bəhsi bəpeştə, ın ayə çı pəyğombəre-əkrəm həzrəte Muhəmməd(s) risoləti canahşumul bıey barədə sohbət kardedə. harçənd sıftədə bə Hicozi məntəğə ərəbə məxloği xitob kardey bıə iyən Ğıron ərəbi zıvonədə nozil bıə, əmmo çəy peyğam iyən mesaj fəğət bə ə həzrəti zəmoni camaati iyən məxsusən bə ərəbi zıvoni ayid ni. bəlkəm, ım mesaj bə qırd dınyo milləton ayide.ısət har ğovm iyən irğ həm bıbu iyən ım de tobə tarıxi oxo şomil bedə.çoko ki, Furğani mıborəkə surə iminə ayədə həm,pəyğombəri dəvəti bə qırd dınyo şomil bıey zıneydə.

Bın ayədə həmçinin həzrəte pəyğombər(s) risoləti əncom doeyədə çə həzrəti tərbiyəvi şivə bəyon kardedə və hamyedə: əv bə həxı tərəf meyl pəydu kardə iyən həxı ğəbul kardə kəson, bə dınyo iyən axırəti hərəbaxtəti rəsey mıjdəvoni doydə və bə həxı peşt qordınə iyən həxı mığobilədə mandə və inodkorəti kardə kəson saxtə əzobi vədə iyən xəbərdorəti doydə.

Əmmo məələsəf milləti veyni ıştə xoşbəxtətiyədə bıə imon iyən kufri roliku xəbəşon ni və bə ın bəşorəton iyən xəbərdorətiyon kam dığğət kardedən.

Çın ayəku umutedəmon:

1-islomi peyğombəri(s) risolət cahanşumule və çə həzrəti çəmə millətiku iyən çəmə irğiku nıbey vavunə, bənə ə şəxsi sıxaniye ki, votedəbe: bəbe fəğət Fələstin iyən Şami millət məsihi və xristiyan bıbon. zira həzrəte İsa(ə) həmonə sərzəminədə çı dınyoku bıə iyən ıştə risolətış əy əncom doə.

2-pəyğombəron ilahi mesajon rosneyədə məmur bıən və əvon milləti dezzu boştə dini ğəbul kardeyro məcbur bıənin.

وَيَقُولُونَ مَتَى هَذَا الْوَعْدُ إِن كُنتُمْ صَادِقِينَ (29) 

Və əvon(de məsxərə) votedən: ehanə rost votedon, ın(ğıyoməti) və`də kon vaxt bəbe?

قُل لَّكُم مِّيعَادُ يَوْمٍ لَّا تَسْتَأْخِرُونَ عَنْهُ سَاعَةً وَلَا تَسْتَقْدِمُونَ (30) 

Bıvot: bəşmə və`də doə bıə qıləy ruj(bome) ki, nə i saat çəyku bə təxir ebəqıniyon və nə bənav dəbəşiyon.

Bə nıbuvvət iyən tohidi bəhsi işorə bıey bədiqə,ın ayəon bə miadi mevzu işorə kardedə və hamyedə: miadi inkor kardə kəson boçəy mumkin nıbey inkori xoto hiç qıly dəlilışon ni, bəlkəm əvon çəy zəmoni mıəyyən nıbey bəhonə vardedən və əve əy təkiz kardedən. çoko ki,qırd camaat zıneydən ki, qıləy ruj bəmardeyn, əmmo hiç kəs ıştə mardə vaxti zıneydəni.

Kərimə-Ğıron bın ayəonədə hamyedə: ğıyomət hukmən bərpo bəbe və Xıdovənd həmonə ruji təyin kardə bıə zəmonədə bərpo bəkarde. ısət tikəy di ya lıski rə bıbu, bilaxirin vağe bəbe və şımə deçəy əloməton vindey həni çəyku fərol kardey və ya əy bə təxir eğandey nibəzıniyon. çən, bın fikədə bıbən ki, bəbe həmonə ruji bəştə əməlon cəvob bıdon, nəinki, həmonə ruji bə həjə jıey fikədə.

Çın ayəonku umutedəmon:

1-ğıyoməti bərpo bıə ruji fəğət Xıdo zıneydə və hətto pəyğombəron həm çəy dəğiğə ruji zıneydənin.

2-bo ğıyoməti ruji bəhonə vardey ya həmonə ruji cəzo iyən mıkofati formə barədə sıxan kardey əvəzi, ıştə rəftor iyən əməlon isloh kardey fikədə bıbəmon ta bə zəmon bə ğıyoməti səhnə təylə dast varid məbəmon.