783-ə hissə-Səba surə-38-41 şərifə ayəon

783-ə hissə

وَالَّذِينَ يَسْعَوْنَ فِي آيَاتِنَا مُعَاجِزِينَ أُوْلَئِكَ فِي الْعَذَابِ مُحْضَرُونَ (38) 

Və əkəson ki, boəməni ociz kardero çəmə ayəon(inkorədə) səy kardedən, əvon bə (ilahi)əzobi (tərəf)vanq kardey bəbeyn.

Vəynə bərnomədə oxonə ayə ım nuktə bəyon kardedəbe ki, avlod iyən mol-əmvol çı insoni hərəbaxtəti amil nin. bəlkəm, ım imon iyən salehə əməleki, insoni dınyo iyən axırətədə bə xoşbəxtəti rosneydə iyən çəy vırə ilahi barzə vəhıştədə ğərol doydə.

In ayə bə imoni əhli dastə işorə kardedə və hamyedə: əvon həxı zıney iyən bəy tabe bıey əvəzi, hejo həxı inkor kardey iyən deəy mıborizə bardey fikədən və qımon kardedən ki, bəçəvon ziyodə mol-devlət iyən ğudrəti imkonati xoto, ilahi sultə jiku xaric bıey iyən əzobiku vitey bəzıneyn. ın fərdon bəbe bızınon ki, çəvon ım fik botıle və əvon hukmən ğıyoməti ruji cəm bəbeyn və bəştə əməlon cəzo bərəseyn.

Çın ayəku umutedəmon:

1-ğudrət iyən sərvəti soybon ki, ıştə imkonatonku bo həxı peqordıney iyən əy ociz nışon doeyro oko doydən, əvon ıştən suğut bəkardeyn və bə ilahi irodə ğalib omey nibəzıneyn.

2-islomi deşmınon milləti miyono Ğıroni məğami zəyif kardey xoto, ziyodə cəhd kardedən. əve bəbe qırd mısılmınon məxsusən dini alimon vəzifə deştə hartərəfinə proqrami bə deşmınon ım ko mane bıbon.

قُلْ إِنَّ رَبِّي يَبْسُطُ الرِّزْقَ لِمَن يَشَاءُ مِنْ عِبَادِهِ وَيَقْدِرُ لَهُ وَمَا أَنفَقْتُم مِّن شَيْءٍ فَهُوَ يُخْلِفُهُ وَهُوَ خَيْرُ الرَّازِقِينَ (39)‏

Vuji: beşək çımı pərvərdıqor ıştə bandəonku har qıləyni ki,bıpyoşe ruzi hevuj(ziyod) bəkarde və ya boəy tanq(məhdud) bəqordıne və şımə harçi(çəy royədə) infoğkoyn, baxşkon çən əv(çəy əvəzi) bənoe(bədoe)və əv həmməysə vey çokə ruzi doəkəse.

Navnə ayə dəvomədə ki, deştə mol-əmvol iyən fərzəndon fəxr kardə kəson mızəmmət kardedəbe, ın ayə hamyedə: ım Xıdovənde-Xalığe ki, bə insonon ruzi doydə və bəştə hikmət iyən məsləhəti əsos, əv əy ziyod ya kam kardedə. çən, nə de ruzi ziyod bıey məğrurəti kardey lozım ni və nə deçəy kam bıey bə noumudəti iyən məyusəti dıço bıey lozım ni.

In ayə hamyedə: inson bəbe ha holədə ıştə zu vışkiye ğədərədə ıştə molonku bə ehtiyocinə şəxson infoğ iyən baxşko. zira rızğo-ruzi Xıdovəndi dastədəy və əy və`dəş doə ki, çanədə bə co kəson koməq kardey bıbu, əv çəy əvəzi bədoe. nəinki, çəy rızğo-ruziku bə kam bəbe.

Çın ayəku umutedəmon:

1-Xıdovəndi bandəon rızğo-ruziyədə bıə tafut, bənə bəçəvon zu iyən istedodi, bə ilahi hikməti əsose.

2-Xıdo ki, bə inson iyən bə co məxloğati ruzi doydə, təzminış kardə ki, insoni infoğ kardə har çi əvəzi de qıləy mınosibə formə beşo.

وَيَوْمَ يَحْشُرُهُمْ جَمِيعاً ثُمَّ يَقُولُ لِلْمَلَائِكَةِ أَهَؤُلَاء إِيَّاكُمْ كَانُوا يَعْبُدُونَ (40) 

Və(bəyod dənə) qıləy ruj ki, Xıdovənd həmməy məşhur bəkarde, peşo bə məlayikon bəvote: aya ımon şıməni pərəstış kardedəbin.

قَالُوا سُبْحَانَكَ أَنتَ وَلِيُّنَا مِن دُونِهِم بَلْ كَانُوا يَعْبُدُونَ الْجِنَّ أَكْثَرُهُم بِهِم مُّؤْمِنُونَ (41)

Məlayikon bəvoteyn: Xıdolim ha! tı mınəzzəhiş(pokiş). tı çəmə ğəyyumiş(yoliş) nəinki, çəvon. bəlkəm, əvon cınon pərəstış kardedəbin və çəvon veyni bəvon bovəşon hestebe.

Çı mışrikon xorafiyə bovəonku qıləyni, ğıyoməti ruji bə məlayikon şəfoəti etığod be. liza inov əvon firiştəon pərəstış kardedəbin iyən boəvon qıləy məxsusə vırə ğayil bin. qıləy holədə ki, məlayikon boştə jıqo qıləy məğam ğayil nıbin və bın iddioədə nıbin.

Kərimə-Ğıron de ğıyoməti ruji məhkəmə tərsim kardey hamyedə: məlayikon ıştə məğami mıdofiyə kardə holədə çı mışrikon ım botılə əndişə iyən fiki mığobilədə bəmandeyn və bəvoteyn: əvon bə şəytoniyə əğedə giriftor bıən, bə şəytoni tabe bıən iyən həyğətədə bəy muti bıən. şəyton bıtpərəstəti çəvon nəzədə çok iyən ğəşənq cilvə doydə iyən əvoni bə nodırıstə bovə iyən rəftoron dıço kardedə. jıqo bızın əvon bə i bıə Xıdo imon vardey əvəzi, şəytoni pərəstış kardedən iyən çəy bandə bedən.

Çın ayəonku umutedəmon:

1-mışrikon bo firiştəon qıləy məxsusə məğam ğayilin. əvon etığodışon heste ki, firiştəon ğıyoməti ruji əvoni şəfoət bəkardeyn. liza de mıxtəlifə formə de çəvon pərəstışi məşğul bin ta çəvon şəfoətiku qıləy bəhrə bobən.

2-mığət bıbəmon və bə şəytoni hiyləon bovə məkəmon iyən nodırıstə əndişəon çı səhihə bovəon əvəzi ğəbul məkəmon. vey mumkine ki, şəyton yavə iyən bevəcə koon boəmə çok iyən ğəşənq cilvə bıdoy.