784-ə hissə-Səba surə-42-45 şərifə ayəon

784-ə hissə

فَالْيَوْمَ لَا يَمْلِكُ بَعْضُكُمْ لِبَعْضٍ نَّفْعاً وَلَا ضَرّاً وَنَقُولُ لِلَّذِينَ ظَلَمُوا ذُوقُوا عَذَابَ النَّارِ الَّتِي كُنتُم بِهَا تُكَذِّبُونَ (42) 

Çən, ımruj şıməku hiçki bə iyande nə qıləy xəy və nə qıləy şər rosney bəzıneyn və bə zolımon votey bəbe: şımə du hisob kardə cəhəndımi otəşi əzobi bıçaştənən.

Vəynə proqramədə Xıdovənde-Aləm bə mışrikon xitob kardə holədə hamyeşe: şımə iddio kardedon firiştəon pərəstış kardedon. qıləy holədə ki, məlayikon ıştən ğıyoməti ruji jıqo qıləy ko inkor kardedən və voteydən ki, şımə bə şəytoni pemandedon iyən çəyku komək tələb kardedon.

In ayə hamyedə:ğıyoməti ruji ğərəz Xıdovəndi iyən çəy piyəkəson, hiçkəs bə cokəsi nə xeyr və nə zərəl rosney nibəzıne. məsələn, ikəs ki, cəhəndımi əhle, əy bə vəhışt bəbarde və ya ikəsi çı vəhıştiku bə cəhəndım bəbarde. çə ruji malik iyən soyb, fəğət Xıdoe. əve çı Xıdo dini iyən ıştə həxədə bə həmməysə veyə dıjdə zılmi mırtəkib bıə mışrikon, həmonə ruji bə cəhəndım giriftor bəbeyn. boçi ki, əvon dınyoədə əy inkor kardedəbin iyən ımi məhal və ğeyri-mumkinə ko  hisob kardedəbin.

Çın ayəku umutedəmon:

1-ğıyoməti ruji şərayit de dınyo şərayiti fərğ kardedə. dınyoədə insonon ğadirin ki, bə cokəson xəy ya zərəl bırosnon. əmmo ğıyoməti ruji hiçkəs bəştə soyb bıey əzıni, ısət çı bımando bə cokəson xəy ya zərəl bırosno.

2-ğərəz Xıdo bə cokəson soyəx şıey, bəştə zılm kardeye. əmmo Xıdovəndi bənə pəyğombər iyən ovliayon vositə ğərol doə şəxson istisnan.

وَإِذَا تُتْلَى عَلَيْهِمْ آيَاتُنَا بَيِّنَاتٍ قَالُوا مَا هَذَا إِلَّا رَجُلٌ يُرِيدُ أَن يَصُدَّكُمْ عَمَّا كَانَ يَعْبُدُ آبَاؤُكُمْ وَقَالُوا مَا هَذَا إِلَّا إِفْكٌ مُّفْتَرًى وَقَالَ الَّذِينَ كَفَرُوا لِلْحَقِّ لَمَّا جَاءهُمْ إِنْ هَذَا إِلَّا سِحْرٌ مُّبِينٌ (43) 

Və havaxti çəmə ruşinə ayəon boəvon handey bıbu, voteydən: çın merdi dıli piyə çi şımə pıon pərəstış kardə çiyonku şıməni oqordıneysə co çi ni və votedən: ım Ğıron boftə bıə dusyə co çi ni və bə kofir bıə fərdon soyəx həx omeyədə voteşone (ım)qıləy oşkoə sehr iyən codusə co qıləy çi ni.

Navnə ayəon dəvomədə ki, çı mışrikon ğıyoməti ruji təkzib kardeyku bəhs kardedəbe, ın ayəon çəvon dınyoədə bə Ğıroni inkor kardey ko işorə kardedə və hamyedə: əvon bəştə dədə-bobo bemənoə təəssıbon xoto, bə Ğıron iyən pəyğombəri məntıği dığğət nıkardə holədə Kərimə-Ğıroni bə həşə jedən iyən boəy ğəbul kardeyro hozzı nin. çumçıko, Ğıroni təlimon bəçəvon əbo-əjdodi təlimon əks be.

Çı mışrikon Kərimə-Ğıroni barədə kardə dıminə iddio ım beki, çəy ayəon çı Xıdo sıxanon ni, bəlkəm qıləy insoni sıxanonin ki, duyədə əy bə Xıdo nisbət doydə.

Mışrikon seminə iftiro ım be ki, bə Ğıroni tərəf cəzb bıə iyən çı peyğombəri sıxanon ğəbul kardə kəson, bəçəy kəlom iyən bəyoni sehri xotoe,nəinki, əv çı Xıdo tərəfiku omə.

Təbiiye ki, Ğıroni çı mışrikon zıvoniku nəğl kardə ım se qılə şubhəon, tarıxi dırozi mıxtəlifə dastəon tərəfiku mevcud bıə və çın se qılə bəhsonku iqlə, dılqə və ya se qıləyni çı peyğombəron mıxolifon tərəfiku votey bıə.

Çın ayəku umutedəmon:

1-dəvardə nəslon mirosi oqətey, bə ğədimi iyən tarıxi əsəron ayide, nəinki, çəvon nodırıstə bovə iyən rəftoron oqəte iyən tərvici xotoye. bə dəvardə nəslon kur-kuronə formədə təğlıd kardey, bə inkişofi mane bedə iyən camiyə çı ruşd iyən ozavziyeku oqəteydə.

2-peyğombəron milləti miyono de rostəvıjəti, pokəti iyən sədoğəti məşhur bin iyən hiçvaxti çı du iyən kələki əhl bıənin və bə cokəson norəvoə nisbətışon doəni. ısət çı bımando əvon ıştəku kitob bınıvışton və əy duyədə bə Xıdo nisbət bıdon.

3-sehro-codu bə təcrubəninə ostadon tərəfiku bıə təlimi ehtiyociş heste və həlbəttə, de təcrubəninə sehrbozon vositə botıl bıey imkonış həm heste. qıləy holədə ki, peyğombəron hiçvaxti çı sehrboz iyən coduqəron palu şıənin və çəvonku təlimışon vindəni. əvon çı dınyo ofəyə Xıdovəndi tərəfiku məmurin ki, bəşəri bə rostə roy tərəf hidoyətkon və əvon sırfən həxə sıxan votedən.

وَمَا آتَيْنَاهُم مِّن كُتُبٍ يَدْرُسُونَهَا وَمَا أَرْسَلْنَا إِلَيْهِمْ قَبْلَكَ مِن نَّذِيرٍ (44) 

Və əmə bə(ərəbə mışrikon) osmoniyə kitobımon doəmon nıbe ki, əvon əy bəhandon iyən umuton və(əmə) bəçəvon səmt qıləy tarsədə vığandəmon ni.

وَكَذَّبَ الَّذِينَ مِن قَبْلِهِمْ وَمَا بَلَغُوا مِعْشَارَ مَا آتَيْنَاهُمْ فَكَذَّبُوا رُسُلِي فَكَيْفَ كَانَ نَكِيرِ (45) 

Və çəvon bənav bıə kəson(həm peyğombəron) təkzib kardeşone. qıləy holədə ki,(ıştı ğovmon kofiron) bəçəmə dəvardə ğovmon doə çiyonku(ğudrət iyən imkonatonku) i hissə(həm) nayil bıənıbin. çən, əvon çımı peyğombəron təkzib kardeşone. çən,(bıvind) çımı bəvon(nisbətədə) doə əzob çokonə be.

Çı mışrikon bə pəyğombəri(s) iyən bəçəy osmoniyə kitobi ğandə iftiro cəvobədə, ın ayəon hamyedə: çımi bənav bə Ğureyşi tərəf nə qıləy pəyğombər omə və nə bəvon qıləy kitob nozil bıə ta bəvon istinod kardə holədə əvon Kərimə-Ğıroni botıl bızınon iyən çəy vardəkəsi sehrboz iyən coduqər.

Ehanə çımi bənav bəçəvon tərəf qıləy kitobi soyb bıə peyğombər oməbe və şımə islomi pəyğombəri təlimon iyən çəy kitobiçə navkonə peyğombəron iyən deçəvon osmoniyə kitobon miyono qıləy ziddiyyət vindəyonbe, bəvədə əy botıl iyən nodırıst hisob əkardiyon. əmmo şımə ki, de ilahi vəhyi hiç qıləy oşnoəti nıbə holədə bə çiçi əsos, Ğıroni ayəon çı pəyğombər(s) boftə iyən pesoxtə çi zıneydon iyən əy mıttəhəm kardedon?.

Ayəon dəvomədə hamyedə: Məkkə mışrikon çı islomi pəyğombəri(s) mığobilədə mandedəbin, qıləy holədə ki, çəvon zu iyən ğudrət bəçəmə nobud kardə ğovmon nisbətədə dadə i ğıvvəşon həm nıbe.

Çın ayəonku umutedəmon:

1-dini koon inkor iyən təsdığ kardey, bəbe bə dini mətnon sənədi iyən peyğombəron sınnət və rəftoron əsos bıbu və əvoni fəğət de bəşəri ağl iyən elmi mığoyisə ya rədd və ğəbul kardey nibəbe.

2-dini deşmınon sərvət iyən ğudrət, ilahi ğudrəti mığobilədə hiççi ni. çən, bəbe çəvonku bə tars iyən vəhşəti dıço bıey lozım ni. bəlkəm, bəbede bə Xıdo təvəkkul kardey həxə royədə bımando iyən mığovimət nışon bıdo.

3-dəvardə nəslon tarıx bo ımrujnə iyən vəomə nəslon ibrəti ovəynəy ta əvon deştə ğudrəti məğrur nıbon iyən Xıdo dini mığobilədə nımandon. veyə dıjdə cəmyət iyən sivilzasiyəon, bəştə həxı inkori kardey xoto, məhv iyən həlok bıən şıən.