785-ə hissə-Səba surə-46-47 şərifə ayəon

785-ə hissə

قُلْ إِنَّمَا أَعِظُكُم بِوَاحِدَةٍ أَن تَقُومُوا لِلَّهِ مَثْنَى وَفُرَادَى ثُمَّ تَتَفَكَّرُوا مَا بِصَاحِبِكُم مِّن جِنَّةٍ إِنْ هُوَ إِلَّا نَذِيرٌ لَّكُم بَيْنَ يَدَيْ عَذَابٍ شَدِيدٍ(46) 

(Ha pəyğombər ha!)Vuji: mı bəşmə fəğət qıləy pand doydəm. dı-dı, iqlə-iqlə bo Xıdo xoto ğıyomkənən. peşo fik-famkənən(təfəkkurkənən) ta bızınən ki, şımə rəfığədə hiç qıləy cındoəti ni. əve ki, şıməni çı omə əzobiku torsıneydə.

Səba mıborəkə surə ın iyən peşonə ayəonədə, Xıdovənde-Aləm bəştə pəyğombəri əmr kardedə ta de oşkoə holəti ıştə dəvəti bo milləti elonko. bın ayədə iminə nuktə unvanədə hamyedə: ha pəyğombər ha! bə məxloği vuji ki, çımı dəvət bo şımə iyən bo şımə camiyə islohiroe. ehanə şımə piyedəyone ki, çı yavətiyon, qıno iyən fəsodi batlağiku ozod bıbon iyən bəştə kardə koon əzobi giriftor nıbon, bəbe boştə ıştəni iyən boştə camiyə islohi xoto ğıyomkənən. həlbəttə, qıləy ğıyom ki, bə imoni əsos iyən bo Xıdo xoto bıbu, nəinki, bə maddi iyən dınyəvi niyyəton xoto.

Əgər şımə ciddiyə formədə iyən bo Xıdo xoto hozzı bıbon, bəbe har qıləy hərəkəti bənav, ıştə bovəon de fik iyən əndişə səhih iyən islohkənən. çın çi həxədə fikkənən ki, Xıdovəndi boçi şımənış ofəyə iyən şıməku çiç tələb kardedə? şımə erəxənən bunim Xıdovənde-Xalığ de kon hədəfi ıştə peyğombərış bəşmə tərəf vığandəşe? həmçinin şımə ıştə koy oxo və ağıbəti həxədə həm fik-famkənən.

Ehanə lıski fikkon, dəbərəsiyon ki, Xıdovəndi ıştə peyğombərış bo insonon irşod iyən hidoyəti xoto vığandəşe iyən çəy hədəfış həm fəğət insonon əncom doə yavə koonku bə diyəro kardey iyən bəvon tars doeye. çən, çokonə mumkine ikəs ki, milləti bo təfəkkur iyən əndişə kardey dəvət kardedə, ıştən səfi iyən cındo bıbu. ıştənən jıqo ki, çə həzrəti mıxolifon bəy jəqo şər bığandon? aya hakəs bəmı iyən bəşmə çımı aqah nıbə qıləy dıjdə xətər iyən təhlukəku xəbə bıdo iyən mıni bıtorsıno, səfi iyən cındoye? Qıləy holədə ki, əv çın təhlukəku vey çok aqahe.

Həlbəttə, boştə cəmiyyəti islohi koyədə bəbe cokəson çəş məkəmon və məvotəmon ki, de iqlə vıli əvəsor nibəbe və ya məvotəmon ki, çı camiyə əksəriyyət səhfə royədən, əve çəmə dastiku hiççi nibome. bəlkəm, bəbe dı-dı və ya hiç nıbu i nəfər-inəfər, boştə iyən bo camiyə islohi xoto cəhd bıkəmon iyən çı cokəson be etinoəti bəçəmə ıştə vəzifə bə vırə rosney koy mane nıbu.

Çın ayəku umutedəmon:

1-de nışte iyən sıxan vote ko dırıst iyən komil nibəbe. bəbe ğıyomkəy iyən bəsəpoysə beheşto. həlbəttə, bo Xıdo xoto.

2-bo Xıdo xoto ğıyomədə kəmiyyət iyən şəxson ədəd, əsliyə rol ifo kardedəni. bəlkəm, muhim keyfiyyəte iyən bəbe ın hərəkət xolisonə iyən bo Xıdo xoto bıbu.

3-peyğombər, çandə soron çı milləti miyono jimonış kardə iyən qırd camaat əy qıləy ağılmand, tədbirin, sadığ iyən əmonətdorə şəxsi unvanədə zınəşone və bə həzrətədə zərrə ğədərədə qıləy noğisəti mışohidə kardəşon ni. de ın holi pəyğombər bə mışrikon çəvon yavə koon ağıbəti həxədə çəşnavi doə vaxti, ə həzrətışon de səfi iyən cındo nomi mıtttəhəm kardeşone.

قُلْ مَا سَأَلْتُكُم مِّنْ أَجْرٍ فَهُوَ لَكُمْ إِنْ أَجْرِيَ إِلَّا عَلَى اللَّهِ وَهُوَ عَلَى كُلِّ شَيْءٍ شَهِيدٌ (47) 

Bıvot: şıməkum piyə har qıləy mızd(mıkofat), çən, əv bəşmə xeyriye. çımı mızd bə Xıdo ayide(bəçəy ohdəy) və əv bə harçi şoyde.

Vəynə ayə dəvomədə bın ayədə həm bə peyğombəri əmr bedə ta ıştə dəvəti şivə barədə bə milləti jıqo bıvoto: az şıməni bə Xıdo roy tərəf hidoyət kardedəm iyən çı ğıyoməti barədə çəşnavi doydəm və çımı bın koyədə hiç qıləy maddi niyyətım ni və ıştə ın ko mığobilədə həm, şıməku hiç qıləy mızd iyən mokafatım piyedəni. çımı mokafat bə Xıdovəndi ohdəy.

Mı şıməku tələb kardə har qıləy ko mənfəət həm bəşmə ıştəni obəqarde, nəinki, bəmı. ehanə şımə qımon kardedon ki, şıməku boştə qıləy çim piyə, əv həm bımando bo şımə və əgər şıməku qıləy mızdım tələbkardəmebu yəni məsələn votəme ki, çımi əhli-beyti bıpiyənən, ımım həm bəşmə ıştəni xoto piyəme və çın koy foydə bəşmə ıştəni obəqarde. bəvon pemandey nəticə ıme ki, şımə rostə roy pəydu bəkardiyon iyən bə inhirof iyən zəloləti dıço nibəbiyon.

Bənə ın misoli ki, ehanə qıləy ustod bəştə şoqirdi bıvoto ki, çımı bəşmə dərs doə çiyon çok-çoki bəhandənən iyən çımi bəpeştə bəçımı şoqirdon soyəx bışənən, ım dıqlə tələbi xəy hukmən bə şoqirdon ıştəni bərəse, nəinki, bə mellimi. qırd peyğombəron tarıxi dırozi bənə qıləy dıləsutə mellimi cəhdışon kardə ki, səhih iyən dırıstə jimoni roy bə milləti omuton və çımi mığobilədə çəvonku hiç qıləy mızd iyən mokafatışon tələb kardə ni.

Çın ayəku umutedəmon:

1-dini mıbəlliğon bəbe millətiku maddi təvəğğoşon nıbu. əvon bəbe betəmənno bəştə vəzifəon əməlkon iyən de məxloği hidoyəti ko məşğul bıbon.

2-de Xıdo roy vıjniye iyən bə dini əmron əməl kardey, Xıdo iyən peyğombəri boştə ğarzıxo məzınəmon. zira çəmə əncom doə çiyon, bəçəmə ıştən xeyriye, nəinki, bə Xıdo iyən bəçəy peyğombəri.

3-ehanə Xıdo bəçəmə koon şoydebu, çən çıro çı cokəson yavə sıxan iyən behtononku norohət bıdəmon və bo milləti irşodiro ıştə dasto omə ko kardedənimon?